وەرگرتنا باجێ ژ بەرھەمێ ھەرێما کوردستانێ ناگریت
ئه‌ڤرۆ نيوز:
ل رۆژێن بۆری حوکمەتا عیراقێ دو خالێن گومرکی یێن نوو دگەل ھەرێما کوردستانێ ڤەکرن و بڕیارە ھەر بەرھەمەکێ ل ھەرێما کوردستانێ بچیتە دەڤەرێن عیراقێ باجا گومرکی ل سەر دانن، بەرپرسەکێ وەزارەتا چاندنێ ژی دیار کر کو وەزیرێ چاندنا عیراقێ سۆزدایە باجێ نەدانیتە سەر بەرھەمێ جۆتیارێن ھەرێما کوردستانێ.
دکتۆر خالس ئەحمەد، رێڤەبەرێ گشتی ل وەزارەتا چاندن و ژێدەرێن ئاڤێ یا حوکمەتا ھەرێما کوردستانێ بۆ رۆژناما ئەڤرۆ دیار کر کو دانانا خالێن گومرکی دناڤبەرا ھەرێما کوردستانێ و بەغدا دا دێ ئاستەنگ بۆ بەرھەمێ چاندنا ھەرێما کوردستانێ پەیدابن و جۆتیارێن ھەرێمێ نەشێن وەکو پێدڤی بەرھەمێن خوە رەوانەیی دەڤەرێن ناڤین و باشوورێ عیراقێ بکەن، چونکی تاکە بازاڕ کو ھەرێما کوردستانێ بشێت بەرھەمێن خوە یێن چاندنێ تێدا ساخ بکەت دەڤەرێن ناڤین و باشوورێ عیراقێ نە و بەردەوام ژی بەرھەمێ جۆتیاران بەر ب بازاڕێن عیراقێ چوویە.
ناڤھاتی ئاماژە دا وێ چەندێ کو وەزیرێ چاندنێ بەری نوکە سۆزدابوو باج و گومرک ل سەر چو بەرھەمەکێ چاندنێ نەھێتە دانان یێن کو جۆتیارێن ھەرێما کوردستانێ بخوازن رەوانەیی دەڤەرێن عیراقێ بکەن، لەوڕا پێدڤیە حوکمەتا ھەرێما کوردستانێ دانوستاندنان دگە ل بەغدا بکەت و سۆزا ئەڤی وەزیری ژی کار ل سەر بکەت، ژ بەر کو بڕیاربوو جوداھی نەبیت د ناڤبەرا بەرھەمێ چاندنێ یێ ھەرێما کوردستانێ دگەل پارێزگەھەکا دی یا عیراقێ و گۆت: “دانانا خالێن گومرکی دێ ئاریشە بۆ جۆتیاران پەیدابن و نابیت وەرگرتنا باج و گومرکا بەرھەمێ چاندنێ ڤەگریت”.
