ھێزێن حەشدا شەعبی ل خانەقین زێدەکرن
ئەڤرۆ نيوز:
سەرەرای کو چەندین جارە وەلاتیێن قەزا خانەقین داخوازا دەرخستنا ھێز و میلیشیاتێن حەشدا شەعبی دکەن، ل گەل سالڤەگەرا 16 ئۆکتوبەرێ و ژترسا سەرھلدانا وەلاتێن کورد دژ حەشدا شەعبی ھێزێن حەشدا شەعبی ل وێ قەزایێ دھێنە زێدەکرن.
ئەکبەر حەیدەری گۆت: ھەر چەندە ئەڤە بۆ دەمێ سالەکێ یە قەزا خانەقین ھاتیە داگیرکرن و خەلکێ وێ داخوازا درخستنا میلیشیاتێن حەشدا شەعبی دکەن، بەلێ ھەتا نوکە حەشدا شەعبی لیوایەکا دیتر ئینایە قەزا ناڤبری.
جێگرێ بەرپرسێ لقێ 15 یا پارتی دیموکراتی کوردستان ھەروەسا گۆت: حەشدا شەعبی ب ئەگەرێ ترسا سەرھلدانا خەلکێ خانەقین دژی حەشدا شەعبی ھێزێن خوە زێدەکرینە، ئەو ژی بوویە جھێ دلگرانیا وەلاتیێن کورد.
ل دۆر سەرەدەریا ھێزێن عیراقێ ل گەل کوردان ژی، ئەکبەر حەیدەری گۆت: بارەگایێ لقێً 15 یێ کریە موخابراتا عیراقێ و بەردەوام ئەو کەسێن دھێنە دەستەسەرکرن و ڤەکۆلێن ل گەل دھێنە کرن، کو ھەردەم دژی داگیرکەرانە و دژی وان ھێزان کار دکەن.
ل رۆژا 16 ئۆکتۆبەرێ سالا 2017 باسکەکێ ناڤا ئێکەتیێ دەست ل گەل لەشکرێ عیراقێ و حەشدا شەعبی یا سەر وەلاتێ ئیرانێ ڤە ھەبوو، کەرکووک و دوزخورماتوو و باژێرێ خانەقین رادەستێ لەشکرێ عیراقێ کرن، کو نێزیکی 51% ژ ئاخا کوردستانێ ب ئەگەرێ وێ خیانەتێ ھاتیە داگیرکرن.