ئاوارەبوونێ ھەڤژینیا پێشوەخت ل ناڤ ئێزدیان زێدەکریە
ئه‌ڤرۆ نيوز:
پشتی دیاردا ھەڤژینیا پێشوەخت د ناڤ جڤاکێ کوردێن ئێزدی دا زێدەبووی، ب تایبەتی ژی د ناڤ کەمپێن ئاواران دا، ڤەکۆلینەک ل دۆر وێ دیاردێ ھاتە کرن، د ئەنجام دا 71% ئەگەرێن ھەڤژینیا پێشوەخت بۆ ئاوارەبوونێ ڤەدگەڕن.
مەحمود ئەلبرغشی، چالاکڤانێ جڤاکی بۆ رۆژناما ئەڤرۆ دیار کر کو پشتی ڤۆلینەک د ناڤ جڤاکێ ئێزدی دا ھاتیە کرن، وەسا ئاشکرابوویە کو رێژا 71% ژ خەلکی دبینن ئاوارەبوون ئەگەرێ زێدەبوونا دیاردا ھەڤژینیا پێشوەختە و گۆت: “ل ھەموو دەڤەر و جھان ل دووڤ وێ ڤەکۆلینا د ناڤ کەمپێن ئاواران و ژ دەرڤەی کەمپان ژی دا ھاتیە ئەنجامدان ل سەر دیاردا ھەڤژینیا پێشوەخت و ژن بەردانێ و فڕەژنیێ وەسا ھاتیە ئاشکراکرن کو رێژا (71%) ژ جڤاکی دبینن ئاوارەبوون یا بوویە ئەگەرێ زێدەبوونا ھەڤژینیا پێشوەخت و رێژا (88%) خەلک دبینن گەنج ھەردو رەگەز کچ و کوڕ ژی ژ بەر ھەڤژینیێ دەستان ژ خواندنێ بەردەن و (83%) ژ جڤاکی وەسان دبینن کو کچا سنێلە نەشێت کاروبارێن ھەڤژینیێ ب رێڤە ببەت”.
ناڤھاتی ئاماژە دا وێ چەندێ ژی کو رێژا (90%) ژ حالەتێن دەروونی ئەگەرێ ھەڤژینیا پێشوەختن و (67%) ژی ژییێ کچ و کوڕان بگەھیتە 20 ھەتا 25 سالیێ پاشی ژیانا ھەڤژینیێ پێک بینن وەسا ژی دبینن ئەڤ ژیە یێ گونجایە بۆ پێکئینانا خێزانێ و رێژا (74%) ھەڤژینیا پێشوەخت و بەردانێ گرێدانەکا پێکڤە ھەی.
وی چالاکڤانێ جڤاکی ئاشکرا ژی کر کو بۆ ماوێ چەند ھەیڤانە کار ل سەر ڤێ ڤەکۆلینێ ھاتیە کرن ل ھەموو دەڤەرێن ئێزدیان بەری ئاوارەبوونێ و پشتی ئاوارەبوونێ ژی.
ڤەکۆلەر ھادی سەعدۆ کار د ڤێ ڤەکۆلینێ دا کریە و گۆت: “مەرەما من ژ ڤێ ڤەکۆلینێ ئەوە بوویە ئەگەرێن دیاردا ھەڤژینیا پێشوەخت بھێنە دیارکرن و رێیێن چارەسەریێ ژی بۆ بھێنە دیتن، چونکو ھەڤژینیا پێشوەخت خرابیێن خوە ل سەر جڤاکێ ھەنە”.