سلێمان رەمەزن: ئاستێ لاوازێ یاریێن بۆری یێ پێشبینیکری بوو
ئەڤرۆ، محەمەدعەلی نوری:
راھێنەرێ تیما یانا زێرەڤانی بۆ رۆژناما ئەڤرۆ دیارکر کو ئاستێ لاوازێ تیما وان د ھەرسێ یاریێن بۆریدا نیشاندای یا پێشبینیکری بوو و ھەکە بەلانس بکەن ھەمبەری بەرھەڤیێن وان یێن کێم و چوونا چەند یارێزانێن کاریکەر لسەر تیمێ، لێ ئەڤە نابیتە رێگر بۆ ئەو ئارمانج و نەخشێ بۆ وەرزێ ئەڤ سالە ھاتیە دانان.
زێدەتر سلێمان رەمەزان بۆ رۆژناما ئەڤرۆ گوت: ئەم دوماھی تیم بووین بەرھەڤی کرین بەری دەستپێکرنا خولێ کێمتر ژ ھەیڤەکێ بوو و ھەتا نوکە ژی بەرھەڤ نینە بۆ ھەڤرکیا، و ھەروەسا چوونا پێنچ یاریزانا ژ یانێ کارتیکرنا نەرێنی لسەر پێکھاتیێ تیمێ کریە و ھەروەسا نەبوونا گرێبەستێن گرانبوھا بۆ یاریزانا ئەگەرەک بوو کێماتی دناڤ تێمێ دا پەیدابن، لێ ئەو یاریزانێن ماین ژبەر ڤیانا وان بۆ یانێ لسەر کۆژمەکێ کێم رازیبووینە.
ھەروەسا ناڤھاتی دیارکر کو سەرباری ڤان ئەگەرا، لێ تیما زێرەڤانی دێ ھەر مینت یا ھەڤرک و زلھێز د ناڤ خولێ دا و باوەری ب شیانێن یاریزانێ خوە ھەیە و گوت: بۆ وەرزێ ئەڤسالە کارگێریا یانێ ژی یا ھاریکارە دگەل کاودانێن تیمێ و دێ ھەموو بزاڤا کەین ئەو ھیڤێن مە ھەین ژ دەست نەدەین، سەرباری وێ یەکێ لدویڤ بەرھەڤیا و ھیڤیێن دەستەکا کارگێریا یانێ تیم نە ھاتیە ھەڤرکیێ.
ژ لایەکێ دویڤە راھێنەرێ زێرەڤانی ئەوچەندە ژی نە ڤەشارت کو کادرێ راھێنەرا بتنێ نەشێن ئارمانجا ھەڤرکیێ لسەر خولێ بچھبینت ھەکەر ئەو کێماتیێن دناڤ تیمێ دا نەھێنە چارەسەرکرن تایبەت پرکرنا جھێن بۆشاتی و گوت: نوکە ئەریشا مە یانێ ئەو شیانێن دارایی نینن ھەموو کێماتیا چارەسەربکەت، لێ دێ ھەموو بزاڤا کەین ئەو یاریزانێن بەردەست بشێن جھێن وان بگرن و ببنە جھێ باوەریێ و زێرەڤانی سەنگا خوە بزڤرینت.