پلاندانان د ناڤبهرا سیستهم و بهرهلایێ دا..
پلاندانان د ناڤبهرا سیستهم و بهرهلایێ دا..
(حوكمهت و پلان)
رهمهزان نهسرهددین كێڤلى
پلان دانان پهیرهوهكێ مرۆڤایهتى یه دهێته داریشتن بۆ دهستنیشانكرنا ئارمانجێن دیاركرى ل دهمهكێ گونجایێ و ب مهرمێن جودا جودا و داریشتنا وان بریارێن پێدڤیه بۆ قووناغا مرۆڤ تێدا دژیت یانژى بۆ ئایندهیهكێ دوور یان نێزیكه و پلان ئێكه ژ گرنگترێن بنهمایێن ئیدارى ل ههر كارهكێ ههبیت چ سیاسى، ئابوورى، جڤاكى، رهوشهنبیرى .. پلانێ پێدڤى ب كۆمهكا پێزانین پێشدهم ههیه، تاكو بهرنامه و ئارمانج و سیاسهتێن گشتى ل سهر وان پێزانینان بهێنه داریشتن و ههردهما ئهو پێزانین ژلایێ لایهنێن پهیوهندیدار و جهێ متمانێ ڤه بهێنه بلند كرن گومان تێدا نینه كارێ پلاندانهرى دێ ب ئاسانتر بیت و دێ زانیت ل كیژ بیاڤى پێدڤى ب وان بهرنامه و پلانان ههیه، چونكو پلان ئامرازێ پهیوهندى یه د ناڤبهرا داخوازى و شیانێن ل بهردهست ئانكو ئهو داخوازیێن دهێنهكرن ئهگهر ته شیان و زانیارێن دورست نهبن تو نهشێی ئهوان داخوازیان بهكهیه پلان و بێخیه د خزمهتا خهلكى دا. و دهما ئهم بهحس ل سیتهمى دكن ئۆتوماتیكى ئهم نهشێن ل سهر ههبوونا سیتهمهكێ بكن بێ پلان لهورا سیستهم و پلان پێكڤه گرێداینه و ئێك یادى تهواو دكت تاكو رێ رهوێ ژیانا رۆژانه یا خهلكى برێڤهبچیت ئانكو ئیدارا ئهڤان كاروباران بهێتهكرن ل گۆر پێدڤیێن و شیانێن ل بهر دهست حوكمهتێ و ههمى پلان ل دهمهكێ سهقامگیر دا دهێنه داریشتن و خالا ههره گرنگ ل پلان دانانێ دا دڤێت پێشبێنیا مهترسى و قهیران و حالهتێن سروشتى بهێتهكرن تاكو پلانێن وى دگونجایێ بن و ل ههر حالهتهكێ مهترسى دا كێمترین خوسارهت ل بهر خهلكى و حوكمهتێ بكهڤن. چونكو پرهنسیپێن گرێدایێ پلاندانێ خوه ل چهند تێگههێن گرنگ دا دبینیت ژ وان (كهتوار، گشتگیر، پشكداربوونا ههمى لایهنێن پهیوندیدار، دهم، جهێ پلان دهێته داریشتن، تهنسیق) حهتاكو دهرئهنجامێ وێ پلان د ئاستێ بهرپرسایهتى دا بن. زۆر ب مخابنی ڤه دبیت ل زۆربهیێ وهلاتێن جیهانێ وهزارهتهك تایبهت ب پلاندانێ ههبیت، بهلێ پرسیارا گوهۆرى ئهوه ئهڤ وهزارهته شیایه وهزیهفهتا خوه یا سهرهكى جێبهجێ بكت و ل ڤێره مهبهستا مه حوكمهتا ههرێما كوردستانێ یه دبیت بۆ بهرسڤدانا ل سهر ڤێ پرسیارێ مه پێدڤى ب دهمهك درێژ و ڤهكۆلینێن ئهكادیمى ههیه تاكو ئهم پشكهكا بهرسڤا خوه وهربگرن، بهلێ ئهڤا ئهم دبینن ژ رهوشا پێشچاڤێن ههڤوهلاتیان پلاندانان ل ئاستهكێ زۆر خراب دایه و گهلهك جاران ئهو گرنیگا پلاندانانێ ئهم نابینین تایبهت ل دهمێ قهیران و حالهتێن سروشتى دا. دێ بینى دو وهزارهتێن خزمهتگوزار كو كارێ وان زۆر نێزیكى ئێكه ئهو تهنسیقا گونجایێ و پێدڤى د ناڤبهرا وان دا نینه كو بشێن پێكڤه كاربكن و كارئاسانیێ بۆ ههڤدو پهیدا بكن تهنها بۆ نموونه دهمێ جاده دهێنه دورستكرن پاش تمامبوونا وێـ ژ نیشكهكێ ڤه وهزارهتكا دێ دێ هێلهكا تایبهت یان كارهكێ ل وێ جادێ دا كت و مهزاختنێن مهزن لێ دهێنه مهزاختن و ئهڤ نموونهیه ل پێشچاڤ مه رۆژانه دیار دبیت لهورا ئهم دشێن بێژن بهرهلایهك ههیه، بهلێ ل سهر هندێ را قووناغ بۆ قووناغ گوهۆرینێن مهزن دورست دبن د ڤى بیاڤى دا ئێدى ل ههرێما كوردستانێ ژى پلانێن كورت و درێژ دهێنه داریشتن و وهزیفهتا حوكمهتا داهاتى ئهوه پلانێ بكت كارهكێ سهرهكى حهتا كو سیاساتێن گشتى یێن حوكمهتێ سهركهفتى بن و ئهو بهرنامێ حوكمهتێ ههیێ ل گۆر بهرنامه و پلانان بهێته داریشتن.
