بکارئینا ماددێن ھۆشبەر دناف گەنجان زێدە بۆیە
ئه‌ڤرۆ نيوز:
بکارئینانا ماددێن ھۆشبەر ل ھەرێما کوردستانێ زێدە بۆیە و سەرۆکێ رێکخراوا بەرھنگاربوونا ماددێن ھۆشبەر ژی ئاماژە بڤێ چەندێ کر کو ئێک ژ ئەگەرێن زێدەبوونا توندوتیژیێ ل ھەرێما کوردستانێ بکارئینانا ماددێن ھۆشبەرە و گۆت: نھا گەنج زێدەتر شرۆب و حەبکێن بێ ھۆشیێ بکار دئینن و حوکمەت ژی رێگریێ ناکەت.
ئیبراھیم رەمەزان، سەرۆکێ رێکخراوا بەرھنگاریا دژی ماددێن ھۆشبەر بۆ رۆژناما ئەڤرۆ دیار کر کو بکارئینانا ماددێن ھۆشبەر ئەگەرە بۆ زێدەبوونا رێژا توندوتیژیێ و دەمێ کەسەک ماددێن ھۆشبەر بکار دئینیت ل سەر ھزرێن خوە نامینیت و دبیتە ئەگەر ئەف کەسێ بکارئینەر تووشی ئاریشان ببیت و ئالۆزیان پەیدا کەت بۆ دەوروبەرێن خوە.
ئیبراھیم گۆت: ئەف توندوتیژیا نھا د جڤاکی دا مشە بتنێ ئەو نینە یا زەلام ل ھەمبەری ژنێ دکەت، بەلکو ماددێن ھۆشبەر ژی بەھرا خوە د بلندکرنا توندوتیژیێ دا ھەیە، ژبەرکو زۆر جارا دێ بینی گەنجەک یێ ماددێن ھۆشبەر بکاردئینیت و ژلایێ خێزانا ویڤە دھێتە رەت کرن د ئەنجامدا شەڕ و ئاریشە پەیدا دبن، چەندین حالەتێن بەردانێ ھەنە ژێدەرێ وان بکارئینانا ماددێن ھۆشبەرە و رۆژانە ژبەر ڤان حالەتا نڤیسینگەھێن بەرھنگاربوونا توندوتیژیێ دژی ژنان پەیوەندی بمە دکەن.
سەرۆکێ رێکخراوا بەرھنگاربوونا ماددێن ھۆشبەر ئەو چەندە ژی دیار کر کو چەندین ماددە ھەنە نھا ژلایێ وەلاتیێن ھەرێما کوردستانێ دھێنە بکارئینان، مینا حەبکێن ئارتین و جۆرێن شرۆبێ کو دبنە ئەگەرێ بێ ھۆشبوونا کەسێ بکاردئینیت و گۆت: بتایبەتی ژلایێ گەنجانڤە دەمێ جۆرێن وەکی ھێروین و تلیاک بدەست نەکەڤن دێ بەرێ خوە دەتە خوارن و ڤەخوارنا ھندەک شرۆب و حەبکا، ھەتا ژلایێ مادیڤە ژی زۆر د ئەرزانن ئەڤە ژی ئەگەرە بۆ بکارئینانێ، چونکی شڕۆب ھەیە ب ھزار و 500 دینارا مینا ھێروینێ مرۆڤ خوە پێڤە دگریت.
ئیراھیم رەمەزان د بەردەوامیا ئاخفتنێن خوە دا گۆت: وەزارەتا ساخلەمیێ یا خەمسارە ل ھەمبەر فرۆتنا دەرمانێن مەترسیدار ب گەنجان، ئەڤە ددەمەکی دایە کو وەزیرێ ساخلەمیێ بخوە سەرۆکێ لیژنا ژناڤبرنا ماددێن ھۆشبەرە و وەزیرێ ساخلەمیێ دەستھەلاتێن سەرۆکێ حوکمەتێ ھەنە بۆ رێگریکرنێ ل بکارئینانا ماددێن ھۆشبەر لێ چ بڕیاران ژی نادەت.
سەرۆکێ رێکخراوا بەرھنگاریا دژی ماددێن ھۆشبەر دا زانین کو نھا سزایێن ئابوری ل سەر ئیرانێ دا ھاتینە سەپاندن و خەلکێ ئیرانێ زێدەتر پێدڤی ب پارەی ھەیە و گۆت: لەوڕا ژی ئەم پێشبینی دکەین ھاتنا ماددێن ھۆشبەر ل ئیرانێ بۆ ھەرێما کوردستانێ زێدە بکەت، بێگومان خرابیا رەوشا ئابوری یا وەلاتێ ئیرانێ کاریگەری ل سەر ھەرێما کوردستانێ ژی ھەیە، بەری نھا بتنێ وەلاتی و بازرگانان ماددێن ھۆشبەر ل ئیرانێ دئینانە ھەرێما کوردستانێ لێ ژ نھا پێدا دێ حوکمەت بخوە رێیێ دەت بۆ ئینانا وان.