ژیان، یانكو تشتێن بچووك!..
د. سالار عوسمان
د ناڤبهرا نێرینێ و تهماشهكرنێ دا، سوحبهتێن گهلك خهلكى نههاتیه گۆتن ههیه و ئێدى دڤێت دهست ب گۆتنێن خوه بكهین، تهماشهكرن، نێرین، ڕامان و تێڕوانین و، ڤێكچوون و جوداهیان، ئهڤ ههموو چهمكانه، جۆرێ تێگههشتنێن مرۆڤان پۆلین دكهن، پرسیاریا نێزیك ئهڤهیه: جوداهی چیه ل ناڤبهرا نێرینێ و تهمشهكرنێ؟ ئهگهر نه تهماشهكرن پێكهاتی بیت بێی ل سهحكرنا ئاسۆیا وێ، ئهوا ب لێنێڕینێ سهحدكهنێ ب ستوونی یه، یا ئێكێ نه پرسیارههلگره و نه خوه ژى ماندى دكهت پشتى دانا بهرسڤێ دا، لێ یا دوویێ، واتا نێڕینێ، ماندیه، ههلگری پرسیارێ و د گهل خوه ژى دا بهرسڤ خولقینهیه!..
ئهڤ كورته پێشهكی یه تنێ بۆ ئهوێ چهندێ یه حهتا بێژین: جڤاكێ كوردی پتر جڤاكهكێ تهماشایی یه و كێمتر نێرینه، پتر جڤاكهكێ ئاسۆی یه و یێ دیتر ستوونی، جڤاكهكه پرسیار، هێز و لڤینا پرسیارێ نهبوویه خهما وى و ههر ب وێ پیڤدانێ یه بهرسڤ ژى بۆ وى نهبوویه خهم!..
ل سهر وێ بنهمایێ و ب پێی ئهوێ تێگههشتنێ، جڤاكێ كوردی پتر ژ مهزنتر دهستپێ دكهت، نهك ژ بچووكتر، ژیان ژ تشتێن مهزن دبینیت نهك ژ تشتێن بچووك، ئهگهر ههڤكێشێ پێچهوان بكهینهڤه و بپرسین: ئهرێ ژیان یا پێكهاتی نینه ژ تشتێن بچووك؟.. ئهرێ تشتێن مهزن ژى ههر ژ بچووك دهست پێ ناكهن؟.. ئهرێ وهك دبێژن: دوورترین رێك ژ پێنگاڤێ دهست پێ ناكهت؟.. ئهرێ بهرێخودانهك بهس نینه بۆ ڕاكێشانا شۆخهكێ و ڕستهیهكی ژدل بهس نینه بۆ ئێكلاكرنا جهدهلا مهزن د ناڤبهرا ئیمانێ و ئیلحادێ دا؟.. ئهرێ پهیڤهك، پهیامهك و ئیلحادێ چاڤهك بهس نینه بۆ ئهوێ چهندێ ئیكهك ژێ زوویر بیت و ئێكهكێ دیتر ژێ ببیته دۆست و قورتالكهر؟..
ئهز وهسا تێدگههم ژیان پێكهاتیه ژ تشتێن بچووك، ههر بۆ نموونه قهترهئاڤا مرۆڤى و زیندهكی، بارانهكا هوور، گڤاشتنا تبلهكێ، كو ئهوێن ههنێ ههر ههموو سهر ب ژیانێ دا دگرن و ژ وى لایێ ڤه پهلهپیتكا تفهنگێ، فهرمانا تاریا قهددیسێ، ئهمری نهگریسی ئهمیرێ، بڕیارا نهعادیلانه یا حاكمهكى و غهزهبا سیاسی یێ دهسترهش ههلكێشانا مهرگێ ته دكهن و ئێدى ئهو تشتێن بچووكن مهزنن و ب رامانهكا دیتر ژ وانا ژى پشكا زۆرا تشتێن مهزنن د بنهڕهت دا بچووك دبن!!..
ههر وهكو چاوا نێڕین و تهماشهكرن پڕن ژ جواداهیێن تێگههشتنێ، ههر ب ههمان شێوه چهمكێ مهزن و بچووك و جۆرێ تێگههشتنێ پێدڤی ب لێكدانهڤهیهكا ستوونی، جودا و نوو ههیه.
ئهڤ تێگههشتنا، كو پێ وهیه ژیان پێكهاتیه ژ تشتێن بچووك، ههر تهنێ بوارێن جڤاكى ڤهناگرێتهڤه، سهرجهم بوارێن جودا یێن ژیانێ ڤهدهگریت، ب بواره زانستی ژى، زانستی ژى ژ ناڤ بچووك دا مهزنه، ههمدیسا بۆ حوكمڕانیێ ژى ههر ڕاسته، فهرمانبهرهكێ پرسگههێ، پۆلیسهك و كارمهندهكێ بازگه ژى دكاریت جوانترین نموونه پێشكێش بكهت و تێگههشتنا مه بۆ حوكمڕانیێ پڕ بكهت ژ هێز و پێز و ڕێز!..
ئێدى دهڤێت ژ بچووك دهست پێ بكهین و مهزن ژبیر بكهینهڤه، ئهگهر مه وهكر، مهزن و مهزنتر وهلات بنیات دانین و ب مهزنتر ژى هچینه ناڤ دیرۆكێ دا.
