دانە گاز و پەترۆلا ھیلال: بەرھەمئینانا گازێ ل ھەرێما کوردستانێ ٣٠% زێدەکریە
ئەڤرۆ نیوز:
کۆمپانیا دانە گاز ل گەل کۆمپانیا پەترۆلا ھیلال راگەھاند کو ئاستێ بەرھەمئینانا گازێ ل زەڤیا کۆرمۆر ل ھەرێما کوردستانێ ب رێژا ٣٠% زێدەکریە.
ئەڤرۆ رۆژا چارشەمبی ٢١ی چریا دویێ ٢٠١٨ێ کۆمپانیا دانە گاز و کۆمپانیا پەترۆلا ھیلال راگەھاندنەک ل دۆر ئاستێ بەرھەمئینانا گازێ ل زەڤیا کۆرمۆر ل ھەرێما کوردستانێ کو سەرپەرشتیا وێ ژ ئالیێ ھەر دو کۆمپانیان ڤە دھێتەکرن بەلاڤکر.
ل گورەی راگەھاندنێ، ئاستێ وەبەرئینانێ د پرۆژێ گازا کوردستانێ دا ھەتا ئەڤرۆ گەھشتیە ملیارەک و ٤٠٠ ملیۆن دۆلاران، ب ڤێ چەندێ ژی سەرجەمێ گشتی یێ بەرھەمئینانا پەترۆلێ گەھشتە ٢٥٠ ملیۆن بەرمیلان، ب ڤێ چەندێ شیان ٢٠ ملیار دۆلاران پاشکەفت بکەن بۆ بۆدجا ھەرێما کوردستانێ و عیراقێ کو ب گشتی دڤیا بۆ کرینا سووتەمەنیێ ب مەزێخن.