ب وێنە: خودانکرنا تەرش و کەوالی د ناڤ بەفرێ ل گوندێ گوھەرزێ
ئەڤرۆ نیوز، نەوزاد ھلۆری:
خودانکرنا تەرش و كەوالی د وەرزێ زڤستان و سەرما و بەفرێ دا ل ھەموو دەڤەرێن سنوورێ قەزا ئامێدیێ ب زەحمەت کەفتیە، ب تایبەتی بەرواری بالا و دەروبەرێن سەنتەرێ قەزا ئامێدێ.
مێھڤان نھێلی، خودان تەرش و كەوالى ل گوندێ گوھەرزێ سەر بە ناحیا دێرەلووک بو ئەڤرۆ نیوز گۆت: (سالانە ژ بەر ھاتنا بەفرێ ل وەرزێ زڤستانێ کێشە بۆ مە دروست دبن، چونکو ژ لایەکێ ڤە ئالف نامینیت و وەکو پێدڤی مرۆڤ نەشێت ئالفی کۆم بکەت ب تایبەتی پشتی کو فرۆکە و بوردومانێن تورکیا زۆر بووین و دەڤەر ھاتیە سۆتن و ترس پەیدا بوويی، ژ لایەکێ دى ڤە زڤستان و سەرما دبیتە ئەگەر کو مرۆڤ نەشێت تەرش و کەوالێ خوە ببەته دەرڤە و ب ڤێ یەکێ کارتێکرن ل سەر بەرھەمێ تەرش و کەوالی دکەت و شیر نامینیت).
زێدەتر گۆت: (نوکە خوارنا تەرش و کەوالی ژ بەر بەفرێ بوویە چلی و گیا، بەلێ ئەو ژی زۆر کێمە چونکو چلی دکەڤیتە جھێن مەترسی و گیا ژی ھاتیە سۆتن، حوکمەت ژی چو ھاریکاریان بۆ خودانێن تەرش و کەوالی ناکەت ب تایبەتی د ئافێ دا).
