ئهركهكێ حكومى … تمامكرنا كابینێ
عسمهت رهجهب
دبیت ئهو خواندهڤانێن ب رێز یێن دووڤچوونا بابهت و نڤێسینێن مه دكهن یێن مه ل دهسپێكا ئۆپراسیۆنێن ئهمنى یێن ئازادكرنا ئهردێ داعشێ بهلاڤكرین ژبۆ دهمێ دو سالان كۆنترۆل ل سهر دكرى, ل دهمێ مه گۆتى رزگاركرنا لهشكرى و ژناڤبرنا داعشا تیرۆرست ب تنێ نهبهسه, چونكو هزرهكا توندهاژۆ یا ههى و پێدڤیه بهێته ژناڤبرن و كونترۆل ل سهر بهێتهكرن دگهل ئازادكرنا ئاخێ, چونكو ل گهل پاشمایێن مایین یێن داعشى و هزرا وان یا توندرهو و د گهل دا ئهو گهندهلیا دراڤى و ئیدارى یا د وهلاتی دا ههى ل گهل تیرۆرێ یا ههڤسهنگه و دبیت ژ وێ بهێزتر بیت د ڤى وهلاتی دا و ببیته رێگر بۆ پێشكهفتن و پێشڤهبرنا كریارا سیاسى د وهلاتی دا, گهندهلى و هزرا توندهاژۆ ههردو كارتێكرنهكا راستهوخوه ل ژیانا ههڤولاتیان دكهن و د ههمان دهم دا كارتێكرنێ ل وهرار و پێشكهفتنا وهلاتى ژی دا دكهت.
ب دیتن و نێرینێن مه وهلات یێ تووشى گوهۆرینێن مهترسیدار دبیت ل سهر نهخشێ رهوشهنبیریا جڤاكى ژ گهلهك واران ڤه ژلایهكیڤه بهربهلاڤبوونا مادێن هۆشبهر و گهندلیێ و هزرا توندرهو د ناڤ جڤاكی دا و ئهڤ چهنده مهترسیهكا راستهوخوهیه ل سهر جڤاكى و حوكمهتێ ژى، لهوما گهلهك كار ههنه حوكمهت ل سهر راوستیت و چارهسهریێن ب لهز بۆ ڤهببینیت و پارێزگاریێ ل سهر ژێرخانا جڤاكى بكهت داكو جڤاك بهر ب لیڤارێن ژبهرئێكچوونا رهوشتى و بنهمایێن مرۆڤایهتیێ نهچیت, و رێیێن رژد و پاراستنێ بگریته بهر ب رێیا بهێزكرنا هێزا قانوونێ و سزادانا وان كهسێن ژ قانوونێ ڤارى دبن, ههر وهسا دهلیڤێن كارى بۆ گهنجان و بێكاران بهێن دیتن و ڕێ ل توندرهویا ئاینى بهێت گرتن, دیسا دوباره دارێژتنا گۆتارهكا ئاراستهكرى و ههڤسكهنگ و دادپهروهرانه بهێته ئاراستهكرن پشتى ژ ئاراستهیێ خوهیا راستهقینه هاتیه لادان و تووشى ژبهرئێكچوونا ژێرخانا جڤاكى و مرۆڤایهتى و ژێبوونا نیشتیمانى بۆى كو كار بكهت ژبۆ رێزگرتنا سهروهریا قانوونێ و گرنتیكرنا مافێن مرۆڤى وجهبجهكرنا دادپهروهریێ ژبۆ گههشتنا زهمینهكا ههڤپشك ژبۆ جهجبهكرنا ئارامى و تهناهى و گهشهیا جڤاكى یا بهردهوام, د ههمان دهم دا كریارا گهشهیا بهردهوام گهشهیا مرۆڤى بخوهڤه بگریت و ئارامانج ژێ خۆشكرنا ئاستێ چاڤدێریا ساخلهمیێ و پهروهردێ و رهوشهنبیریا جڤاكى بیت, زێدهبارى پشكداریا خهلكى د بریارێن گهشهكرنێ دا ب تایبهتى یێن راستهوخوه كارتێكرنێ ل سهر ژیانا وان دكهت, چونكو مرۆڤ تهوهرێ گهشهكا بهردهوامن و پێكهاتهكا گرنگه ژبۆ دادپهروهریێ و وهكههڤی و یهكسانیێ.
ل دووماهیێ وهلاتێ ب هێز دڤێت سهروهریا قانوونێ و ئاراستهیا دورست د گۆتارا ئاینى و حكومی دا ههبیت و دهلیڤێن كارى پهیدا بكهت بزاڤێ بكهت گهنجان دوور بكهت ژ ههڤركیێن ئاینى و مهسهبى و جڤاكى و پشداریكرنا وان د وهرگرتنا بریارێن كو تایبهتمهندبن ب ههر لایهن و پێكهاته و ئاین و مهسهبانڤه و ههر وهسا ههڤركیا ئارام و رۆن و ئاشكرا د ناڤبهرا پارت و لایهنان دا ههبیت، چونكو ههڤسهنگى د گۆتارا نیشتیمانی دا كاكلكا راستهقینهیه, ئهگهر مه بڤێت هێزێ و سهرهوهریێ بدهینه وهلاتى و جڤاكى و رێزگرتنا سهروهریا قانوونێ و بریاریێن برێڤهبرنێ یێن ههمهجۆر و نهتوندتیژ بگرین د برێڤهبرنا سیاسێ دا ژبۆ بدهستڤهئینانا تهناهیێ و ئارامیێ و ئاڤاكرنا ستوونێن گهشهیا جڤاكى یێن بهردهوام ژبۆ گرێنتكرنا ههڤپشكیێ د ئاڤاكرنا وهلاتێ سڤیلێ نوو دا دوور ژ دیارده و كارتێكرنێن ئاینى و مهسهبى و رهگهزى ژبۆ جهبجهكرنا ههڤولاتیبوون و ژیبوونا نیشتیمانى.
