لەھیان چار پرێن دەڤەرا ئامێدیێ ژێر ئاڤ کرن
ئەڤرو نیوز، مەحمود نھێلی:
ژ ئەنجامێ بارینا بارانەکا زۆر چوار پرێن سەرەکی ل سنورێ ناحیا دێرەلۆک ژێر ئاڤ بووینە و زیان گەھشتیە ھندەک ژ وان رێیا چەند گوندان ژی ھاتیە داخستن.
سامی ئوشانە رێڤەبەرێ ناحیا دێرەلۆک بۆ ئەڤرۆ نیوز دیارکر، ژ ئەنجامێ رێژەکا زۆرا بارانێ چوار پر ل دەڤەرێ بن ئاڤا بووینە و ئێک ژ وانا زیان گەھشتینێ و پەرژانێ پرێ شکاندیە.
و گۆت: ئەم ل جھێ پرێ ئامادە بووینە و یا پێدڤی دێ ھێتە کرن بۆ چارەسەرکرنا ڤێ پرێ دوو بارە نووژەنکرنا وێ.
ھەروەسا ناڤھاتی ئاشکرا کر کو ئەو دێ ب نڤیسار لایەنێن پەیوەندیدار ئاگەھدار کەن بۆ وێ یەکێ چارەسەریەکا ئێکجاری بھێتە دیتن و ئێدا ئەڤ پرە بن ئاڤ نە بن و رێیێن ڤان گوندان نەھێنە داخستن.
ھاشم یەحیا بەرپرسێ پشکا کەشناسیا ئامێدیێ بۆ ئەڤرۆ نیوز دیارکر، کو ددەمێ ٢٤ دەمژمێرێن بوری دا ل ئامێدیێ ٧٧ ملیمێن بارانێ بارینە سەرجەمێ ئەڤ سالە دبیتە ١٢٥٥ کو پار ڤی دەمێ بتنێ ٥٥٣ ملیمێن بارانێ ھات بوون.
