رێيا چه‌ندين گۆندێن كانى ماسێ هاته گرتن
ئەڤرۆ نیوز، زنار تۆڤی:
ژ ئەنجامێ بارینا بارانان ب رێژەکا مەزن، ئەڤرۆ کەڤرەک مەزن ل گەلیێ بازێ ل بەرواری بالا ژ چیایی ھاتیە خوار و ب نیڤا جادێ کەفتیە و جادە خرابکریە، نوکە ژی ئەو کەڤرە مایە ل سەر جادێ، لەوما ب تەمامی رێیا چەندین گوندان ھاتیە برین.
فەوزی ئەحمەد وەلاتیەکێ گوندێ بازێ یە بۆ ئەڤرۆ نیوز دبێژیت: ئەڤرۆ شەمبیێ 6ى نيسانا 2019 ل گەلیێ بازێ ل بەرواری بالا، کەڤرەکێ مەزن ژ چیای ھاتیە خوار و ب جادی کەفتیە و جادە پەقاندیە و خرابکریە، ھەروەسا ئەو کەڤر مایە ل سەر جادێ و نوکە ب تەمامی ئەو رێک ھاتیە گرتن، ھەر چەندە ئەڤ جادە رێیا سەرەکی یا چەندین گوندێن دەڤەرا بەرواری یە، کو ژ گوندێ کانی بەلاڤێ دچیتە کانی ماسێ و رۆژانە ھاتنوچوونەکا زۆر یا خەلکێ ل سەر ڤێ جادێ ھەیە، رێیەکا کورتترە بۆ دھۆکێ، لێ نوکە ھاتنوچوون ب تەمامی ھاتیە برین.
ناڤھاتی گۆت ژی: ئەو شۆفێرێن ژ دھۆکێ ھاتینە ڤێ دەڤەرێ نەشیاینە بھێن و جارەکادی ڤەگەریاینە ڤە، لەوما ب رێیا ئەڤرۆ دخوازن جھێن شۆلەژێ چارەسەریەکێ بۆ ببینن و رێیا وان چێکەن، دیسا دەمێ ئەو بەر ھاتیە خوار گەلەک نێزیکی دو ترۆمبێلا بوویە و ب زۆری ئەو ترۆمبێل شیاینە خوە قورتال بکەن.
سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز گۆت: ئەم ل سەر ڤێ روودانێ د ھایدارین و مە تیمەک ڤرێکریە، ژ پێخەمەت چارەیەکێ ببینن بۆ وێ رێکێ، ھەروەسا ئەم دێ بزاڤێ کەین کو ب ھەر رێیەکێ بیت، ئەم وێ رێکێ ڤەکەین دا ھاتنوچوون تێدا بھێتە کرن، ھەر چەندە ئەو کەڤر گەلەک یێ مەزنە، نوکە ئەم نەشێین وی کەڤری راکەین.
