جوداهی د ناڤبه‌را رێزێن مرۆڤان د ناڤ جڤاكێ دا
به‌ری دو هزار و پێنج سه‌د سالان ل ناڤ جڤاكێن مرۆڤاندا جوداهیه‌كا دژوار هه‌بوو د ناڤبه‌را ژنێ و زه‌لامی دا, ژنێ چ بهایێ خوه نه‌بوو هه‌تا وی راده‌ی كرین و فرۆتن و كار پێ دكرن. هه‌كه ئێكی قه‌سه‌كا پیس گۆتبا، ئێكی دا بێژیته (ژنك), یان (سه‌رژنك).
د هه‌مان ده‌مدا جوداهی د ناڤبه‌را رێزێن زه‌لامان دا ژی هه‌بوون، هه‌روه‌سا زارۆ ب چو ره‌نگه‌كی بها نه‌بوو. د بوورینا ده‌می دا ئه‌ڤ جوداهیه به‌ر ب گوهۆرینه‌كا مرۆڤاتی ده‌ربازبوو ل پتریا جڤاكێن مرۆڤاندا ل جیهانێ.
د ڤی باژێری دا ئه‌م ل ڤی زه‌مانی و د ڤێ سالێ دا هێشتا جوداهیا به‌رچاڤ یا د جڤاكێ دا دیار دكه‌ت ب مخابنی ڤه هێشتا ژن رزگار نه‌بوویه, كوشتنا وێ یا به‌رده‌وامه بێكاری و نه‌خوانده‌واری ژی یا ل ده‌ف مای. كار یێ ب زارۆیان دهێنه كرن ل سه‌ر جاده و بازاران, د هه‌مان ده‌مدا هه‌كه ئه‌م ل رێزێن زه‌لامان ته‌ماشه بكه‌ین, ئه‌وان ژی پلێن خوه یێن هه‌ین و جوداهی یا د ناڤبه‌را خوه دا هه‌ی و هه‌می زه‌لام ژی نه زه‌لامن.
ل ڤێرێ ئه‌ز به‌حسێ بهایێ مرۆڤاتیێ دكه‌م و دڤێت بهایێ روحا مه وه‌كی ئێك بیت, وه‌كی دی ئه‌م دزانین بهایێ مرۆڤه‌كێ زانا به‌رچاڤتره ژ كه‌سه‌كێ نه‌زان، به‌لێ ئه‌و ژی نابیته ئه‌گه‌رێ هندێ كو ئه‌م گیان و روحا كه‌سێ نه‌زان به‌رچاڤ وه‌رنه‌گرین و ترانێن خوه پێ بكه‌ین و بێ قیمه‌ت بكه‌ین د ناڤ خوه دا!. گه‌له‌ك جاران ئه‌م مرۆڤه‌كی دكه‌ینه چنه ژبه‌ركو یێ ب چاڤه‌كی یه! پتریا جاران ئه‌م رێزێ ناده‌ینه مرۆڤان ژ به‌ر كو یێ به‌لنگاز و هه‌ژاره!, یان ژی سه‌روچاڤێن مرۆڤه‌كی د كڕێتن دبیته ئه‌گه‌رێ دووركه‌تنا مه ژ وی مرۆڤی! یان بخوه ب كه‌سه‌كێ كێمئه‌ندام دكه‌ینه كه‌نی! ئه‌ڤێ جووداهیێ ئه‌ز دبینم ده‌مێ خه‌لكێ مه ل گه‌ل زارۆی سه‌ره‌ده‌ریێ دكه‌ت ل سه‌ر جوانیا سه‌روچاڤێن وی زارۆی!
ته‌په‌سه‌ریا زارۆیان گه‌له‌ك جاران سه‌را سه‌روچاڤێن وی چێدبیت! و گونه‌ها وی نینه كو خودێ هۆسا یێ چێكری!
ده‌مێ ئه‌م ژنێ دئینین پسیارا ئێكێ ئه‌وه كایا جوانه یان نه؟ ئه‌م ب ڤی ره‌نگی بهای ده‌ینه ئێكدو, به‌ریكێن مه بهای و گرانیێ ده‌ته كه‌سایه‌تیا مه!
ل دهۆكێ جڤاكه‌كێ مرۆڤان یێ خوه ته‌عان كرین ب ره‌خ شاخكێڤه, خوه جودا كرین ژ باژێری و ملله‌تی! ئه‌رێ ئه‌و چ ته‌عانه هنگۆ ل دۆر خوه زڤراندی؟
دا خوه بپارێزن ژ مه؟ یان ژی ئه‌م مرۆڤخۆرین دێ له‌قان ل هنگۆ ده‌ین؟ هوون ژمه چێترن؟ ژخوه‌ناگرن گه‌ل مه‌بن؟ دبێژنه ڤێ چه‌ندێ جوداهی د جڤاكێ دا! چێكرنا تاخێن جودا و جودا كو ملله‌تی پرت پرت بكه‌ت!
راستی هه‌ستێ مرۆڤایه‌تیا دورست و ته‌مام ل ده‌ف ملله‌تێ مه ئاڤا نه‌بوویه. دێ چه‌ند هزار سالێن دی ل سه‌ر مه ده‌رباز بن كو ئه‌م دلۆڤانیێ ب گیانه‌وه‌ران ببه‌ین و نه كوژین و ببینه هه‌ڤالێ سه‌یان؟ یان ژی دلێ خوه ب ژینگه‌هێ ڤه بهێلین و ناتۆری بپارێزین و كلێشی ب چۆلی وه‌رنه‌كه‌ین؟!
هه‌ستێ مرۆڤایه‌تیێ ئه‌وه كو ئه‌م كه‌سێ ژخوه كێمتر و بلندتر نه‌بینین ئه‌م مرۆڤ وه‌كی ئێكین ڤێجا چ دكرێت بین یان ژی حۆری بین، د ره‌ش بین، یان سپی بین، جوداهی نینه. ئه‌م دلێ خوه ب ژینگه‌هێ و گیانه‌وه‌ران ڤه بهێلین
كه‌سێ كێمئه‌ندام راگرین و چاڤدیریێ لێ بكه‌ین دا گه‌ل مه بژیت هه‌تا ته‌مه‌ن ته‌مام دبیت. كه‌سێ نه‌خۆش دلۆڤانیێ و هیڤیێ و بێهن فره‌هیێ بده‌ینێ. كه‌سێ بێ هێز و دان عه‌مر راگرین ب چاڤدان, ئه‌م هه‌ڤدو نه‌شكێنین و ترانان ب قوسیریێن خوه نه‌كه‌ین. ئه‌ڤرۆ ئه‌زێ ب هێزم دێ ته بنپێ كه‌م و سوباهی ژی دێ بمه بێنرانكێ سه‌یان! ئه‌ڤ تێگه‌هشتنه به‌ری دو هزار و پێنج سه‌د سالان د ناڤ جڤاكێن مرۆڤاندا هه‌بوون.
