یاریزانەکێ ریال رازیبوو بەر ب خۆلا ئیتالیا بچیت
ئەڤرۆ نیوز:
یانا ئەنتر میلان یا ئیتالی نێزیکی ئیمزاکرنا ھەڤبەستا یاریزانەکێ یانا ریال مەدرید بوویە پشتی وی یاریزانی رازیبوونا خوە ل سەر کرنا یاریێ کری ل خۆلا ئیتالیا و تایبەت ل بن سەرپەرشتیا راھێنەرێ وێ یانێ ئەنتونیو کونتی.
مالپەرێ لا ریبولیکا یا ئیتالی ئاشکراکریە یاریزانێ کرواتی و یانا ریال مەدرید ماتیو کوڤاسیچ رازی بوویە ل سەر چوونا خوە بۆ یانا ئەنتر میلان پشتێ وێ یانێ ب رێیا بریکارێ وی دەست ب دانوستاندنان کری .
ھەردیسان ئەوی مالپەری دیارکریە ژی یانا ئەنتر میلان گەھشتی یە رێککەفتنێ ل گەل کوڤاسیچ ل سەر ھەموو بەندێن ھەڤبەستێ بتنێ مایە رێککەفتنێ ل گەل یانا ریال مەدرید بکەن بۆ بھایێ ڤەگوھاستنا ئەوی و چاڤەرێ دھێتەکرن ل چەند رۆژێن بھێت ب فەرمی ھەڤبەستەکێ پێشکێشی یانا ریال مەدرید بکەن.
ھەردیسان ھاتیە دیارکرن ژی یانا ریال نابیتە رێگر د رێیا چوونا وی یاریزانێ خوە دا ئەوێ ل وەرزێ بوری ب شێوەیێ خواستن یاری ل یانا چێلسی یا ئنگلیزی کر و نوکە ئەو یاریزان ئێک ژ یاریزانێن بەربژارە کو ل ھاڤینا بھێت ئەو یانا ئیسپانی بفروشیت.
ھەژی گوتنێ یە ماتیو کوڤاسیچ بەری بھێتە دناڤ رێزێن یانا ریال مەدرید ل سالا ٢٠١٥ ئەوی یاری ل یانا ئەنتر میلان کر ئەوژی ژ سالا ٢٠١٣ ھەتا ٢٠١٥ کو ل گەل وێ یانا ئیتالی ٩٧ یاری ئەنجامدابوون و شیابوو ھەشت گولان توماربکەت و يازده گول ژی بوو ھەڤالێن خوە ل وێ یانێ بەرھەڤکربوون.
