ھێرشبەرەکێ ئیتالی: ئەو یانە ٨٥ ملیونا ب لوکاکو بدەت ئەو یا دینە
ئەڤرۆ نیوز:
یانا ئەنتر میلان یا ئیتالی یا بەردەوامە ل سەر بزاڤێن خوە بۆ دەستڤە ئینانا ھێرشبەرێ بەلجیکی و یانا مانچێستەر یوناید رومیلو لوکاکو بۆ ڤەگوھاستنێن ھاڤینا ئەڤ سالە لێ ھێرشبەرەکێ بەرێ یێ ھەلبژارتیێ ئیتالیا و یانا ئەنتر میلان وەسا دیارکریە ڤەگوھاستنا لوکاکو چ ل ئەنتر میلان زێدەناکەت.
ئەنتونیو کاسانو ھێرشبەرێ بەرنیاس یێ بەری نوکە یێ ئەنتر میلان و ھەلبژارتیێ ئیتالیا بوو مالپەرێ سکای سپورت یێ ئیتالی دیارکریە ئەو وەسا دبینت ئیکاردی گەلەک باشترە ژ لوکاکو ھەکە ئەنتر ھزر ل لوکاکو دا کربیت بوو دێ دەستا ژ ئیکاردی بەردەن ژبەرکو ئاستێ وی ھێرشبەرێ ئەرژەنتینی باشترە ژ لوکاکوی.
ھەردیسان ناڤبری دیارکر ژی ھەکە ئەنتر یا رژد بیت ل سەر دەست بەردانا ئیکاردی ئەو وەسا دبینت گوھورینەکێ ل گەل یوڤانتوس بکەن باشترە کو ئیکاردی بدەنە یوڤانتوس بەرامبەر ھیگواین کو دێ پتر مفای ژ ھیگواین کەن ژبەرکو شارەزایەکا باش ھەیە ل خۆلا ئیتالیا و دێ مفای ژ شیانێن ھیگواین بینن.
ل دووماھیێ کاسانوی دیارکر ژی ئەو یانە یا دینە ئەوا ٨٥ ملیون یورۆیا بوو ڤەگوھاستنا لوکاکوی بدەت .
ھەژی گوتنێ یە ئەنتر میلان کوژمێ ٦٠ ملیون یورۆیا پێشکێشی یانا مانچێستەر یوناید کریە بوو ڤەگوھاستنا لوکاکو لێ وێ یانا ئنگلیزی رەتکریە و داخوازیا ٨٥ ملیون یورۆیا کریە بوو دەست بەردانا ئەوی یاریزانی .
