زانکویا زاخۆ چاڤەرێ لژنەیا بەغدایە
ئەڤرۆ نیوز، عەلی حاجی:
د داخویانیەکێ دا ھاریکارێ سەروکێ زانکویا زاخۆ بۆ ئەڤرۆ راگەھاند ئەم د نوکە دا چاڤەرێ ھاتنا لژنا بلند یا وەزارەتا خواندنا بلند و ڤەکولینێن زانستی یا عیراقێ نە، بادەکا زانکویا زاخۆ ژ ھەمی روویەکێ ڤە یا ئامادەیە و ئەز ل وێ باوەرێ مە ژی پشتی لژنە سەرەدانا زانکویێ دکەت دێ بابەتێ باوەرپێکرنێ ب دووماھی ھێت.
دکتور کاروان فەھمی زێدەتر گوت ژی : ئەم پێشبینی دکەین د ماوەیێ ھەیڤا نەە یا ئەڤ سالە دا لژنەیا وەزارەتا خواندنا بلند و ڤەکولینێن زانستی یا حکومەتا عیراقێ سەرەدانا زانکویا زاخۆ بکە ، بادەکا زانکویا زاخۆ ژی ب تەمامی ئامادەیە و ھەمی بەرھەڤی ژی ھاتینە کرن ژ لایێ زانکویێ ڤە، ژ بەر کو پێشتر ژی ل سالا 2013 لژنیەکێ ژ بەغدا سەرەدانا زانکویێ کر بوو، زانکویا زاخۆ ببوو جھێ سەرنچ راکێشانێ بو وێ لژنێ، دوی دەمی زانکو دژیێ خوەیێ دو سالیێ دا بوو، لەورا دشێم بێژم دبادەکا زانکویێ دا ئەو ھەمی رێنما تێدا ھەنە و ھاتینە جێبەجێ کرن دبیاڤێ باوەرپێکرنێ دا ژ لایێ وەزارەتا خواندنا بلند و ڤەکولینێن زانستی و ئەو ترسە ژی ل دەڤ مە پەیدا نەبویە کو وەزارەت باوەریێ نەدەتە زانکویێ.
ناڤھاتی گوت ژی : پشتی بابەتێ باوەرپێکرنا زانکویا زاخۆ ب دووماھی دھێت، ئەو قوتابیێن نەشیاین بەردەوامیێ بدەنە خواندنا خو ل ھندەک وەلاتێن دەوروبەر ژ ئەگەرێ نەباوەپێکرنێ، ئێدی دێ ئەو ژی دشێن بەردەوامیێ بدەنە خواندنا خوە، پێشتر مە ئەڤ ئاریشە نەبوو، بەلێ پشتی روودانێن 16ی ئوکتوبەرێ ئەڤ چەندە ببوو جھێ ھێجەتێ ل دەڤ ھندەک ژ وەلاتان و قوتابیێن مە نەدشیان بەردەوامیێ بدەنە خواندنا خوە.
