عیراق ل ههمبهر چهند بژاردێن سهخت
رهمهزان نسرالدین كێڤلى
دهستههلاتدارێن عیراقێ ل قووناغا نها ل بهرامبهر چهندین بژاردێن ب زهحمهتن چونكو رهوشا وێ یا ناڤخوه ژ ههمى لایهكێ ڤه زۆرا خرابه، چ سیاسى كو پهیوهندیێن لایهنێن سیاسى د ناڤبهرا ئێك دا ل ئاستێ پێدڤى نینه و پتریا لایهنێن سیاسى دابهشى ئهجندایێن وهلاتێن ههرێمى بووینه و هیچ باندۆرهكا حوكمهتا فیدراله ل سهر ئهڤان لایهنێن سیاسى نینه, یانژى ژلایێ ئابوورى ڤه كو ژێرخانا عیراقێ رۆژ بۆ رۆژێ خرابتر و وێرانتر لێ هاتیه و گهندهلیێ وهلات داگیركریه و ل سهر ههمى ئاستان دیاردێن گهندهلیێ بهربهلاڤ بووینه، ژ لایێ جڤاكى ڤه رهوشا خویندهواریێ و رهوشهنبیرى و ههبوونا بهتالیێ و ب هزارهها ئافرهتێن بیژن و شههید و قوربانى، ژلایێ حوكمرانیێ ڤه نهبوونا شهفافیهتێ و چاڤدێریێ و رۆلێ لاوازێ پهرلهمانێ عیراقێ ..هتد.
وهلاتهكێ كو نهشیایێ گهشهپێدانا مرۆڤى و سیاسى و ئابوورى پێشبێخیت كو ههمى ئالاڤ ل بهردهستن، ب دیتنا من ل رهوشهكا ب ڤى رهنگى دا ئهو بژاردێن ل بهردهستێ وێ زۆر قورسن.
بژاردا ئێكێ ههلوهشاندنا حوكمهتێ و ودوباره ئهنجامدانا ههلبژارتنا رهوشا دهڤهرێ ب گشتى و یا عیراقێ ب تایبهتى نهیا گونجایه كو كارهكێ ب ڤى رهنگى بهێته ئهنجامدان، بتنێ هندهك لایهنێن خوسارهت نهبن ل ههلبژارتنێن بۆرى ئهوان بهرژوهندى تێدا ههیه كارهكێ ب ڤى رهنگى بهێتهكرن و ل دووڤ دا حوكمهتهك لاواز و ب گۆر بهرژوهندیا وهلاتێ ئیرانێ بهێته پێكئینان، چونكو نهیاسا ههلبژارتنان هاتیه راستهڤهكرن نهژى رهوشا عیراقێ وهكو سهرژمێرى دورسته كو ببته بنهما بۆ پشكداریا ههلبژارتنان.
بژاردا دووێ سهركوتكرنا خونیشادهرانه ب دیتنا من سهرۆك وهزیر عادل عهبدولمههدى ناكهفته ل بن كارهكێ ب ڤى رهنگى بهلێ دوور نینه میلیشاتێن حهشدا شهعبى ب رێنمایێن دهرڤه پتر ئالۆزیێ دورست بكهن و خوینا خهلكى بهێته رێتن بۆ هندێ رهوشا ئێمناهیێ ل عیراقێ بهر ب خرابیێ ڤه بچیت ل ڤێره وهلاتهكێ مینا ئهمریكا دێ رۆل و كاركت بۆ هندێ ههر چ نهبیت ئهڤێ حوكمهتێ رابگریت، چونكو ئهوێ دهستهك بالا ههبوویه ل دهستنیشانكرنا ههرسێ سهرۆكاتیان دا ..
بژاردا سزادانا بهرپرس و گهندهلچیان كارهكێ ب ڤى رهنگى ب زهحمهته، چونكو پتریا وهزیرێن بهرى نوكه ل حوكمهتێن بۆرى خودان پێگههێن سیاسى نه ل پهرلهمانێ نوكه دا و بهرژوهندیێن كوتلهیێن وان تێكهل بووینه ههر كوتلهكێ ب دههان بادهكێن گهندهلیێ ل سهر كوتلهیێن دى ههنه، ئانكو پتریا وان دهست دگهل گهندهلیێ و ررهوشا خرابا عیراقێ ههنه، ژبهر ڤێ چهندێ پتریا بژاردهیان د خرابن و بۆ حوكمهتا نوكه ب زهحمهتن كو بشێن ئهنجامبدهن، تهنها ئهو نهبیت كو وهكو مه ل گۆتارێن سهرۆك وهزیر و سهرۆكى پهرلهمانى دا گوه لێبووین هژمارهكا پێنگاڤێن پراكیتكى بهاڤێژن بۆ ئاسایكرنا رهوشا نوكه چ دامهرزاندن بیت یان بهلاڤكرنا پارچه زهڤى و قهربۆكرنا خهلكى ههژار و كێم دهرامهت بیت یان دانا مووچهیهكێ ههیڤانه بۆ خێزانێن بێ مووچه، لێ ئابوورێ عیراقێ ژى نههندێ باشه ل ڤێ قووناغێ كو كارهكێ ب ڤى رهنگى ب لهز بهێتهكرن.
باشترین بژارده رێكهفتنا ههمى لایهنانه ل سهر بهرنامهكێ چاكسازیێ و زڤرین بۆ دستوورى و چارهكرنا كێشهیێن ههلاویستى، بهلێ چونكو متمانه د ناڤبهرا ئهڤان لایهناندا نهمایه، باوهرناكم كارهكێ ب ڤى رهنگى بهێتهكرن، لهورا پتریا رێكهفتێن لایهنێن سیاسى دهمكینه و نهشیاینه بۆ دهمهكێ درێژ بمینن.
