به‌رۆركا داسێ مه‌زنه و ئیراده ژی ب هێزه
ئحسان ئامێدی
دۆزا كوردستانێ ب قه‌بارێ جوگرافی و مرۆڤێن وێ مه‌زنه و ب قه‌بارێ دوژمن و داگیركه‌ران ئالۆزه، لێ دۆزه‌ك ره‌وا و راسته له‌وان هه‌رده‌م خودانێن وێ ل سه‌ر د رژد و به‌رده‌وامن. سه‌ربۆرا سیاسیا كوردستانێ ئه‌ڤرازی و به‌رواری و نشیڤێ تێدا هه‌نه، قووناخا خه‌بات و به‌رخودان و قوربانیدانێ، و قووناخا سه‌ركه‌فتن و ئازادیێ و ئارامیێ، و قووناخا شكه‌ستن و ده‌ربه‌ده‌ری و وێرانیێ، و ل هه‌می قه‌ناخ و كاودانان دا حه‌زا سه‌ركه‌فتێ و پێشكه‌فتنی هه‌را ب هێزبوویه.
سه‌رپێهاتیێن جڤاكێ كوردستانێ گه‌له‌ك سه‌ربۆر و په‌ند تێدا هه‌نه بووینه رۆناهیا رێیا كار و بزاڤێ و هه‌كه مرۆڤ بخوینیت و هزرا خوه تێدا بكه‌ت و ل سه‌ر بچیت دێ باشتر كاروبارێن وی برێڤه‌چن و به‌روڤاژی ئه‌گه‌ر ل سه‌ر نه‌چیت دێ تووشی شكه‌ستنێ بیت و دێ پێشه‌مان بیت، له‌وان گۆتیه، یێ گوهێ خوه نه‌ده‌ت مه‌زنان، دێ لێ هێن شاخێن پێشه‌مانان، ئه‌ڤه گرنگیا په‌ندێن پێشینان نیشادده‌ت داكو پیته‌ی پێ بده‌ین و ل سه‌ربچین، په‌نده‌كا گونجای ل سه‌ر ده‌ستودارێ نوكه هه‌یه دبێژیت هندێ بده به‌ر داشێ تێرا نه‌مینیت ئاسێ، په‌نده‌كا پێشینان یا ره‌سه‌نه ژمێژه دهێته گۆتن د جڤاكێ كورده‌واریێ دا، و ژ به‌ركو ژ كه‌ڤندا ملله‌تێ مه رێنجبه‌ر و جۆتیار بوو، له‌وا پترا په‌ندا ب وی ژیواری هاتینه گۆتن و ئه‌ڤ په‌نده ژی بۆ وان جۆتیار و رێنجبه‌ران بوویه یێن دچوون گیا و ده‌حل درینێ و دار برینێ، كو هنده جاران بۆ كارێ له‌زێ یان ته‌مائیا پتریێ دا رێنچبه‌ر گه‌له‌كێ ده‌ته به‌رسینگێ خوه و پتر ژ شیانا داسا خوه دا ده‌ت به‌ر، دا هند بینی داسا وی ئان شكه‌ست ئان تێرا ما ئاسێ و شۆلی وی ما برێڤه، لێ یێ هێز و شیانا خوه یا داسا خوه بزانیت و بزانیت دێ چاوا سه‌ره‌ده‌ریێ دگه‌ل كه‌ت دێ شۆلێ خوه ب باشی برێڤه‌به‌ت و بجهئینیت، شۆل جه‌وهه‌رێ مرۆڤی یه، ڤه‌رێژا هۆش ژیرێ مرۆڤی یه، ل جهه‌كی و ل ده‌مه‌كی دهێته‌كرن، هه‌كه د ده‌مێ خوه‌دا نه‌هات كرن، دێ پتر لێ هێت و ب زه‌حمه‌تر كه‌ڤیت، له‌وا گۆتیه شۆلێ ئه‌ڤرۆ نه‌هێله بۆ سباهی، و د ژیانا مرۆڤاندا گه‌له‌ك جاران شۆل د وه‌ختێ خوه‌دا نه‌هاتیه‌كرن ئێدی بار گران بوویه و ده‌ست ب له‌زێ كریه، لێ ڤێرا نه‌گه‌هشتیه و پێشه‌مان بوویه، یان بوویه بۆ كارێ له‌زێ و پتریێ پتر ژ شیانێن خوه دابیته به‌ر خوه تیرا ئاسێ ببیت و نه‌شیا بیت مه‌ره‌ما خوه بجهبینیت، له‌و كوردان گۆتیه (پیێن خوه دی به‌را خوه درێژكه)! لێ گه‌له‌ك جاران حه‌ز و ڤیانا مرۆڤی هانده‌رێ هندێ بوویه كو مرۆڤ پترێ بده‌ت به‌رخوه و ده‌رفه‌ت هاتیه كو شیابیت مه‌ره‌ما خوه‌ه بجهبییت، لێ ئه‌ڤه نه رێسایه پترا جاران ئه‌نجام به‌روڤاژی نه، له‌وا گۆتیه وی باری بكه پشتا خوه یێ تو دشێی هه‌لگری، جاران مرۆڤ سوودی ژ په‌ندا نابینیت یان هه‌ر لێ نزانیت و دێ بینی سه‌ربۆرا كه‌فتنێ ل ده‌ف مرۆڤی چه‌ند باره دبیت و مه‌رچ نینه ژی هه‌رده‌م بارگرانتر بیت!، لێ دبیت خویندنا ته‌مام بۆ هه‌موو لایه‌نێن په‌یوه‌ندیدار د زانستی و بنه‌جه نه‌بن، یان هه‌لسه‌نگانه‌كا شاش بۆ هاتبیته‌كرن، یان هنده‌ك هۆكارێن ژ شیانێن مرۆڤی پتر ل به‌رامبه‌ر بن، كو دبنه هۆیێ شێلیا دیتنێ، لێ ده‌مێ سه‌ربۆرا شاشیێ دوباره دبیت و كه‌فتن دوباره دبیته‌ڤه دبیته شه‌همزاری، له‌وان ژوانرا هاتیه گۆتن (خودێ دلۆڤانكاره دگه‌ل وی یێ قه‌دارێ خوه دزانیت)!
كارێ سیاسه‌تێ ئه‌وه بزاڤێ بكه‌ت به‌رژه‌وه‌ندیێن گشتی بجهبینیت و ده‌ستكه‌فتیان ب ده‌ستڤه‌بینیت و وه‌كو ئه‌و هه‌ر دو ژی نه‌بن بزاڤێ بكه‌ت زیان كێمتر بن.
هه‌بوونا ژیرمه‌ندی یا ئامانجداره، ژیرمه‌ند ژی یێ خواستیه وێ پلانی دانیت و پێدڤیێن پلانێ به‌رهه‌ڤكه‌ت دا بگه‌هیت ئارمانجێ، مه‌رج نینه هه‌میشه ئارمانج بجهبهێت یان شیانێن بجهئینانا هه‌بن، به‌لێ وه‌كو ژیرمه‌ند حه‌ز و ئاره‌زو و ئارمانج هه‌نه، پێدڤیه كار بۆ بجهئینانا وان بهێته‌كرن. ئارمانجێن مرۆڤان ژی گه‌له‌كن و گه‌له‌ك بیاڤن و گه‌له‌ك ئاستن. و ئه‌و په‌ند و گۆتنێن سه‌ری ژی سه‌ردهێن، لێ دڤێت پسیاركه‌ین و بزانین چ ل به‌رۆكا مه هه‌یه و ئه‌رێ ئه‌و ئامیره مه هه‌یه یێ به‌رۆكا مه ڤه‌كه‌ت، یان ئه‌م دشێن بێژین ئه‌رێ مه داس هه‌یه، و هێزا وێ چه‌نده، و كێر شۆلێ مه دهێت!؟، ب لێكدانه‌ڤه‌یا ده‌ستوداری، دێ دیاربیت به‌رۆكا مه مه‌زن و ب ئاسته‌نگ و ب زه‌حمه‌ته!، لێ وه‌كو دبێژن چ ئاسته‌نگ خوه ل به‌ر ئیرادا مرۆڤی ناگرن، و كوردان ئیراده‌كا ب هێز هه‌یه، ئه‌و ئیراده ب لاوازی خوه نیشا دده‌ت چونكی یا دابه‌شكری و به‌ربه‌لاڤه، و هه‌رده‌مێ ئه‌ڤ ئیراده هه‌ڤبگریت، دێ بیته ئه‌و داس یا بشێت به‌رۆكێ خوه بدریت، ئانكو ئه‌م دشێن بێژین ئه‌وا ل به‌ر داسێ نه هنده داس بمینیت ئاسێ!، لێ ئه‌و داس هند نه‌هاتیه سه‌قاكرن ب هه‌ڤگرتن و تفاقا ته‌ڤایی یا ئیرادا ملله‌تی پێ سه‌ردئێخیت، ل وێ باوه‌ریێ مه وه‌كو گه‌له‌ك جاران مه‌ترسیێن ل سه‌ر كوردستانێ دێ ئیرادا ملله‌تی كه‌ته ئێك و دێ هێزه‌كا مه‌زن پێكئینیت بۆ هندێ بشێت خوه بپارێزیت و پشته‌ڤانیه‌كا ده‌ره‌كی ب ده‌ستڤه‌بینیت و سه‌ركه‌فتنێ بجهبینیت. كوردستانیان ب خه‌بات و قوربانیدانا خوه ناسناما خوه چێكریه و دپارێزن و سوودی ژ پشته‌ڤانیا ده‌ره‌كی دبینن بۆ پتر ده‌ستكه‌ڤتیێن نه‌ته‌وه‌یی، هه‌كه دوژمن و داگیركه‌ر دزۆربن و ب هێزبن، لێ گه‌لێ كوردستانێ ژی گه‌له‌كه و خودان ئیراده‌كه، ئه‌گه‌ر نه‌شیابیت خوه رزگاركه‌ت، نه‌هێلایه دوژمن و داگیركه‌ر ژی ب ئاسایش و سه‌قامگیر بن، له‌وان داكو ئه‌و ده‌وله‌ت د ئاسایشێ و سه‌قامگیریێ دابن، دڤێت چاره‌سه‌ریا كێشا كوردستانێ بكه‌ن، یا خۆیایه مافێن نه‌ته‌وه‌یی و كیانێ سیاسی ب خه‌بات و به‌رخودان و قوربانیدانێ چێدبن و هه‌می ده‌وله‌تێن جیهانێ ب شه‌ری چێبووینه، و كوردستانێ ژی شه‌رێن ده‌وله‌تبوونێ گه‌له‌ك كرینه، لێ ب ئارمانجا خوه نه‌گه‌هشتیه، و ئه‌ڤ شه‌ره ئه‌ركه‌كێ نشتیمانی و نه‌ته‌وه‌یی یه، كو باب باپیرا نه‌گه‌هاندیه قووناخێ بارێ نه‌ڤیێ نوو گرانتر لێ هات، دا وی ئه‌ركی بجهبینیت و دێ هه‌ر بجههێت چونكی خواسته‌كا ته‌ڤایه و مافه‌كێ ره‌وایه و ده‌ربرینێ ژ ئیرادا ملله‌تی دكه‌ت و دگونجیت دگه‌ل سیسته‌مێ نوو یێ جیهانی.
