بۆچی!! هه‌می پیلان دژی پارتینه؟
هه‌ر ژ ده‌سپێكا دروستبوونا (پارتی دیمۆكراتی كوردستان) ئه‌ڤێ حزبێ درووشمێ ئاشتی و ئازادی بۆ ملله‌تێ كورد بلند كر و ب ڤان درووشمان شۆره‌شا ئیلۆنێ كریه هه‌تاكو سالا 1975 و ژ ناڤچوونا بزاڤا رێزگاریخوازا كوردی ئه‌و بوو ئێكه‌تی ل سالا 1976 خوه راگه‌هاند وه‌ك حزبه‌كا كوردی كو زۆربه‌یا دامه‌زرێنه‌رێن وێ كادرێن پارتی بوون!! پاشی پارتی بوو هێڤێن بۆ دروستبوونا چه‌ندین حزبێن دی وه‌ك پارتی دیمۆكراتی كوردستان ـ ئیران و پارتی كرێكارانی كوردستان و پارتی دیمۆكراتی كوردستان سووریا و چه‌ندین حزبێن دی كو مخابن زۆربه‌یی وان ب پشته‌ڤانیا پارتی خوه راگه‌هاندیه و رێخستن كریه لێ دیار بوو كو ده‌ستێن دوژمنان د ناڤدا هه‌بووینه و هاتینه بكارئینان دژی پارتی و هه‌ر ده‌م بووینه ئه‌گه‌رێ لاوازبوونا كوردان و ژ ناڤچوونا شۆره‌شان و هلبوونا ئاگرێ براكوژیێ هه‌تا وی راده‌یی نوكه یێن بووینه دارده‌ستێن دوژمنێن ملله‌تێ كورد و ئه‌و بخوه پیلانان دژی خوه وه‌ك كورد دگێرن و هزر و بیرێن وان یێن حزبی و به‌رژه‌وه‌ندیێن وان زالبووینه ل سه‌ر هزر و بیرێن نه‌ته‌وه‌یی و ئه‌ڤ چه‌نده باش دیاربوو پشتی كو په‌كه‌كێ و ئێكه‌تیێ ژ ده‌ف خوه ئه‌نجوومه‌نه‌ك بۆ ئیزدیان پێكئینایه داكو ل دووڤدا كانتۆنا شنگالێ راگه‌هینن كو ئه‌ڤ پیلانه ژ لایێ دوژمنێن ملله‌تێ كورد ڤه هاتیه دارێتن و ب تنێ پارتی ئارمانجه و ب ده‌ستێ كوردان ئه‌ڤ پیلانه یادهێته جێبه‌جێكرن و ده‌رئه‌نجامێ ڤێ پیلانێ هه‌كه سه‌ربگریت ب تنێ كورد زه‌ره‌رمه‌ندن ئانكو مفادارێن سه‌ره‌كی به‌غدا و ته‌هران و ئه‌نقه‌ره‌نه!! به‌لێ ئه‌ڤه وێ چه‌ندێ رادگه‌هینیت كو ئێدی فه‌ره سه‌ركردایه‌تیا كوردی و ب تایبه‌ت پارتی رێ نه ده‌ته چ پارت و لایه‌نان ل دژی به‌رژه‌وه‌ندیێن نه‌ته‌وه‌یی كاركه‌ت و ئێدی چاڤخشینه‌كێ درێخستنا خوه دا بكه‌ت و په‌یوه‌ندیێن خوه ل گه‌ل پارت و لایه‌نێن دی یێن كوردی لێنێرینه‌كێ لێ بكه‌ت، چونكی لاوازیا رێخستنا پارتی و لاوازیا بلانێن وێ یێن نه‌ته‌وه‌یی وه‌كریه كو ئه‌ڤرۆ هه‌ر پارته‌كا ڤیا دشێت كێشا دروست بكه‌ت و جادێ بلیڤینیت دژی پارتی كو باجا ڤان ره‌فتاران خه‌لك ده‌ت به‌ری پارتی، ئه‌و ژی بۆ وێ چه‌ندێ دزڤریت كو خه‌لكی باوه‌ری یا پرۆژێ نه‌ته‌وه‌یی هه‌یی كو پارتی سه‌ركێشیا وێ دكه‌ت!! و ب دروستی پارتی نه‌شیایه ڤی خه‌لكی بخوه‌ڤه گرێبده‌ت، له‌ورا ب ساناهی كێشه دروست دبن! له‌ورا بۆ رێگرتن ژ دوباره هه‌لبوونا شه‌ڕێ براكوژیێ فه‌ره پارتی كاركه‌ت بۆ ئیمزاكرنا هه‌ڤپه‌یمانه‌كێ ل گه‌ل پارتێن دی یێن كوردی و هه‌میان قایل بكه‌ت ب پرسێن نه‌ته‌وه‌یێ ڤه و ببنه پشته‌ڤان بۆ ئێك نه‌ك تێكده‌ر! و ل بن ئێك ئالا و ئێك درووشم كاربكه‌ن كو فه‌ر بوو ژمێژه ئه‌ڤ چه‌نده هاتباكرن، به‌لێ دوژمن رێگربوون و پارتێن دی یێن كوردی پتر به‌رژه‌وه‌ندپه‌رێس بوون ژ نه‌ته‌وه په‌رێسیێ!! به‌لێ هێشتا ده‌لیڤه یامایی كو كاره‌كێ هۆسا بێته‌كرن به‌ری پیلانێن دوژمنان دژوارتر لێبێن، نه‌خاسمه د ڤان كاودانێن شه‌ڕ و ئابووری یێن دژوار دا و به‌ری ئه‌ڤ ده‌لیڤا دیرۆكی ژ ده‌ست ملله‌تێ مه بچیت چونكی هه‌كه چوو ئیدی دێ زۆرا بزحمه‌ت بیت ده‌لیڤه‌كا دی بۆ ڤی ملله‌تی په‌یدا بیت و دمینین ملله‌ته‌كێ ژار و بنده‌ست بو چه‌ندین سه‌د سالێن دی و هه‌ر ده‌م د شه‌ر و شۆره‌ش ب مه ئێنه فرۆتن و دانه‌كرن و دبینه جهێ تاقیكرنا بۆ داگیركه‌ران!! له‌ورا هیڤیدكه‌ین سه‌ركردایه‌تیا كوردی ژڤان پیلانان مه‌زنتربیت و نه‌هێلیت جاره‌كا دی ملله‌تێ كورد تووشی ڤان ده‌رده‌سه‌ریان ببیت.
