چاوا دێ هاریكاریا شۆڕه‌شێ كه‌ین؟
ده‌ما ملله‌ته‌ك ب شۆڕه‌شێ رابوو، هه‌موو چین و ته‌خێن جڤاكێ بێ جودایی پشكدارن د وێ شۆڕه‌شێ دا، چ ب چه‌ك و مالێ خوه، یان بابه‌ت و گۆتارێن خوه، چ ب هه‌لۆیست و هه‌ستێن خوه یێن نه‌ته‌وه‌یی و نیشتیمانی. ژ به‌ر كو سه‌ركه‌فتنا شۆڕه‌شێ سه‌ركه‌فتنا گه‌له، ژ ناڤچوونا شۆڕه‌شێ نه‌مانا گه‌له، له‌وما دڤێت خه‌لكێ كوردستانێ ب گشتی ب گیانه‌ك فیداكاری ب هه‌لویسته‌ك نه‌ته‌وه‌یی ب مۆراله‌ك گه‌رم و گۆرته‌ڤلی د ناڤ رێزێن شۆڕه‌شێ دا ببن، دا د ڤێ ئه‌زموونێ دا سه‌ركه‌فتی ده‌رباز ببین. هه‌كه پێشمه‌رگه و شه‌ڕڤان د سه‌نگه‌رێن پێشیێ دابن پێدڤیه ره‌وشه‌نبیر، ئه‌دیب، هونه‌رمه‌ند، پاله و.. . هتد) ل قادا به‌رخوه‌دانێ ل سه‌رپیابن، هه‌موو هێز و شیانێن خوه‌یێن جه‌سته‌یی و هزری بێخنه دخزمه‌تا شۆڕه‌شێ دا. نها نه ده‌مێ موزایدا حیزباتی و هه‌رێمچیێ یه ل سه‌ر ئیكدو، نه ژی گاڤا په‌رستنا چ كه‌سایه‌تی و به‌رپرس و سه‌ركردانه، رۆژ رۆژا ئێكگرتن و ئێكرێزیا مالا كوردیه، ژبه‌ركو ئه‌م د ناڤا دۆزه‌خا شه‌ڕێ مان و نه‌مانێ داینه، رۆژانه هژماره‌ك ژ شۆڕه‌شگێران یێن ل سه‌ر دده‌ت هێزێن تاریێ شه‌هیدبن و جانێ خوه پێشكێشی خاك و نیشتیمان دكه‌ن. وه‌ك دهێته زانین د دیرۆكا شۆڕه‌شاندا خه‌مساری، به‌ره‌لایی، ڤالاكرنا سه‌نگه‌رێن به‌رخوه‌دانێ بێ به‌رگری و.. . ). ئه‌ڤ خاله هه‌می دكه‌ڤنه د خانا خه‌یانه‌تێ دا، ژ به‌ر كو ئه‌و فاكته‌ر دبنه سه‌ده‌ما رۆخاندنا بیروباوه‌ران د ناڤ رێزێن شۆڕه‌شگێراندا. پێدڤیه چ زوو یان دره‌نگ وان به‌رپرسان بده‌ن دادگه‌ها سه‌ربازی بێ به‌رچاڤكرنا ناڤونیشانان كا ژ كیژان پارت و عه‌شیر و مالباتێنه، ل گۆری یاسایا سه‌ربازی ل به‌رچاڤێن گه‌ل سزابده‌ن، دا جاره‌كا دی ئه‌و شاشی و هه‌له‌یێن مێژوویی دووباره نه‌بن. هه‌كه د سیسته‌مێ شۆڕه‌شان دا سزا و لێكۆلین و ل دووڤچوون نه‌بن، هه‌لسه‌نگاندن د ناڤبه‌را كه‌سێن قه‌هره‌مان و ترسنۆك دا نه‌بن، وی چاخی دێ به‌ره‌لایی و بێ ئومێدی د ناڤ رێزێن شۆڕه‌شگێر دا په‌یدابیت و ئێدی شۆڕه‌شێ چ سه‌نگ و بهایێ خوه نامینیت. لێ ئیرۆ ژبه‌ر گه‌رماتیا شه‌ڕێ داگیركه‌ران بلا بهه‌ڤرا گیانێ ئێكگرتن و پێكڤه‌ژیانێ بپارێزین، سه‌نگه‌رێن خوه یێن پێشیێ و قادێن به‌رخوه‌دانێ ب هێزبكه‌ین، بلا كه‌سه‌ك خوه ل ده‌رڤه‌یی شۆڕه‌شێ نه‌بینیت، ژبه‌ركو چاره‌نڤێسێ گه‌لێ كوردستانێ ب گشتی ل ژێر مه‌ترسیه‌كا مه‌زندایه، ئیرۆ ئه‌م دكارین بێژین جه‌نگێ جیهانێ یێ سیێ ل دژی تیرۆرێ ل كوردستانێ ده‌ست پێكریه و چاره‌نڤێسێ ڤێ شه‌ڕی نه خۆیایه كا كه‌نگی دێ ب داوی هێت، یان كیژان هێز دێ بسه‌ركه‌ڤیت، ژبه‌ركو گه‌له‌ك ده‌ست و په‌نجێن (سیاسی، ئابووری، ناڤنه‌ته‌وه‌یی، هه‌رێمی ناڤخۆیی، مه‌زهه‌بی و.. . هتد). د ڤی شه‌ڕی دا هه‌نه. ئه‌ڤ شه‌ڕه مینا ئاگرێ بن كایێ یێ دخه‌ونیت و به‌ر ب ناڤه‌ندا كوردستانێ دهێت، هه‌كه كوردێن هه‌موو پارچێن كوردستانێ ب هه‌موو هێز و شیانێن خوه ڤه، ب چین وته‌خێن جڤاكیڤه، ب پارت و رێخراویێن سیاسیڤه، ب گیانه‌ك فیداكاری و ب هه‌سته‌ك نه‌ته‌وه‌یی سه‌ره‌ده‌ریێ ل گه‌ل ڤێ ئه‌زموونێ نه‌كه‌ین، دێ جاره‌ك دن گه‌لێ كورد كه‌ڤیته به‌ر پێلێن قه‌ده‌رێ، كاره‌ساتێن مینا ئه‌نفال و كۆمكوژی و قركرنێ دێ پێشوازیێ ل مه‌كه‌ن.
