د ده‌مێ نه‌ه هه‌یڤان دا زێده‌تری 121 هزار تڕۆمبێل هاتینه ناڤ هه‌رێمێ
هه‌ولێر، قائید میرۆ:
ل گوره‌ی ئامارا رێڤه‌به‌ریا گشتیا هاتنوچوونا هه‌رێما كوردستانێ ئینانا تڕۆمبێلان ژ ده‌رڤه‌ی هه‌رێمێ یا به‌رده‌وامه و په‌یڤدارێ هاتنووچۆنا هه‌رێما كوردستانێ ژی ئاشكرا كر، ب تنێ د ده‌مێ نه‌ه هه‌یڤێن ده‌ستپێكا سالا بۆری دا زێده‌تری 121 هزار تڕۆمبێل ل ده‌رڤه هاتینه ناڤا هه‌رێما كوردستانێ.
ئه‌سعه‌د مه‌لا كه‌ریم، په‌یڤدارێ هاتنوچوونا هه‌رێما كوردستانێ بۆ رۆژناما ئه‌ڤرۆ دیار كر، ل هه‌رێما كوردستانێ زێده‌تری ملیۆنه‌ك و 700 هزار تڕۆمبێل ل هه‌موو رێڤه‌به‌ریێن هاتنوچوونێ هاتینه تۆماركرن و گۆت: “ئینانا تڕۆمبێلان ژی ل ده‌رڤه ژ لایێ بازرگانانڤه یا به‌رده‌وامه، رۆژانه هژماره‌كا زۆرا تڕۆمبێلان هاورده‌ی هه‌رێما كوردستانێ دكه‌ن، هه‌تا ئینانا تڕۆمبێلان گه‌له‌ك زێده ژی بوویه، هه‌كه دگه‌ل سالێن به‌رێ بهێته هه‌ڤبه‌ركرن”.
ئه‌سعه‌د مه‌لا كه‌ریم گۆتژی: “ب تنێ د ده‌مێ نه‌ه هه‌یڤێن ده‌ستپێكێ یێن سالا بۆری نێزیكی 122 هزار تڕۆمبێل ل وه‌لاتێن جودا هاتینه ناڤا هه‌رێما كوردستانێ و هه‌موو جۆرێن تڕۆمبێلان ژی تێدانه، هه‌رچه‌نده دگه‌ل ئینانا تڕۆمبێلان مه‌رج و رێنمایێن نوو هاتینه ده‌ركرن، ب تایبه‌تی ئینانا تڕۆمبێلێن لێدای ب هه‌موو شێوه‌كی هاتینه قه‌ده‌غه‌كرن، ئه‌و ژی ب مه‌ره‌ما پاراستنا گیان و ژیانا وه‌لاتیان ژ روودانێن هاتنوچوونێ”.
