حۆكمه‌ت دێ ب رێیا ئه‌نترنێتێ مامه‌لێن وه‌لاتیان برێڤه‌به‌ت
ئه‌ڤرۆ، ئه‌میر ئه‌ترووشی
كابینا نوو یا حۆكمه‌تا هه‌رێما كوردستانێ هه‌موو بزاڤان دكه‌ت بۆ هندێ د زووترین ده‌م دا سیسته‌مێ ئه‌لكترۆنیكرنا مامه‌لێن وه‌لاتیان ل داموده‌زگه‌هێن حۆكمه‌تێ بهێته بجهئینان و مامه‌له ب رێیا ئه‌نترنێتێ بهێنه برێڤه‌برن و به‌رپرسه‌كێ حۆكمه‌تێ ژی دبێژیت: ل گۆره‌ی به‌رنامه‌یێ كابینا نوو یاحۆكمه‌تا هه‌رێما كوردستانێ، پێدڤیه د دووه‌م سالێن ئێكێ یێن كابینێ دا ئه‌ڤ سیسته‌مه ب ته‌مامی ل هه‌موو رێڤه‌به‌ریان بهێته ئه‌نجامدان.
هیوا ئه‌فه‌ندی، سه‌رۆكێ فه‌رمانگه‌ها ته‌كنولوژیا و زانیاری ل ئه‌نجوومه‌تێ وه‌زیرێن حۆكمه‌تا هه‌رێما كوردستانێ بۆ ئه‌ڤرۆ دیار كر، سه‌رۆكاتیا ئه‌نجوومه‌تێ وه‌زیرێن حۆكمه‌تا هه‌رێما كوردستانێ ب رێیا مه سه‌رجه‌م وه‌زاره‌ت ئاگه‌هداركرینه كو ب زووترین ده‌م كار ل سه‌ر ئه‌لكترۆنیكرنا مامه‌لێن وه‌لاتیان دناڤا دام و ده‌زگه‌هێن حۆكمه‌تێ دا بهێته كرن.
ناڤبری زێده‌تر دبێژیت: مه لیژنه‌ك پێكئیناینه بۆ هندێ زانیاری ل سه‌ر سیسته‌مێ هه‌موو وه‌زاره‌ت و فه‌رمانگه‌هێن حۆكمه‌تا هه‌رێما كوردستانێ بهێنه كۆمكرن كا ل دووڤ چو سیسته‌م كاردكه‌ن و ب چو رێ مامه‌له دهێنه برێڤه‌برن و پشتی هه‌موو زانیاری دهێنه كۆمكرن، دێ كار ل سه‌ر ئه‌لكترۆنیكرنا وان هێته كرن.
سه‌رۆكێ فه‌رمانگه‌ها ته‌كنولوژیا و زانیاری ئاماژه ب هندێ ژی دا، سه‌ره‌دانا هه‌موو فه‌رمانگه‌هان دێ هێته كرن و زانیاری دێ هێنه وه‌رگرتن و گۆت: مه‌به‌ست ژێ ئه‌وه ب رێیا ئه‌لكترۆنیكرنا مامه‌لان زێده‌تر خزممه‌تا خه‌لكی بهێته كرن و مامه‌له زووتر برێڤه‌بچن و كابینا نوو یا حۆكمه‌تێ ژی خه‌مه‌كا مه‌زن ژ ڤی بابه‌تی خواریه و گرنگیه‌كا مه‌زن پێ دده‌ت.
هیوا ئه‌فه‌ندی دیار كر كو ل گۆره‌ی به‌رنامه‌یێ كابینا نوو یاحۆكمه‌تا هه‌رێما كوردستانێ، پێدڤیه د دووه‌م سالێن ئێكێ یێن كابینێ دا ئه‌ڤ سیسته‌مه ب ته‌مامی ل هه‌موو رێڤه‌به‌ریان بهێته ئه‌نجامدان و ل گه‌ل هندێ ژی هژماره‌كا دی یا پرۆژه‌یێن ئه‌لكترۆنی د به‌رنامێ حۆكمه‌تێ دا هه‌نه و گۆت: ئێك ژ پێنگاڤێن حۆكمه‌تێ بۆ ئه‌لكترۆنیكرنا مامه‌له‌یان دێ ب رێیا ئه‌نترنێتێ بیت و ئه‌ڤه ژی كارئاسانیه‌كه بۆ وه‌لاتیان و حۆكمه‌تێ ب خوه ژی.
ل گۆره‌ی به‌رنامه‌یێ كابینا نوو یا حۆكمه‌تا هه‌رێما كوردستانێ، كار بۆ نه‌هێلانا رۆتینێ و به‌زاندنا كارۆبارێن وه‌لاتیان دهێته كرن.
