پتر ژ دوسەد کارمەندێن ساخلەمیێ ل رۆژهەلات تووشی کۆرۆنایێ بووینە
ئەڤرۆ نیوز، هۆشەنگ تاجر:
فەردین وەلیپور پەرەستار ل نەخوشخانا ئورمیێ بۆ ئەڤرۆ نیوز دیار کر کو ل ئیرانێ و رۆژهەلاتێ کوردستانێ دو ئاریشێن مەزن سەبارەت ب ڤایرۆسێ کۆرۆنا هەنە و گۆت: (یا ئێکێ حوکمەتێ هەتا نها ژی دەست ب پێرابوونێن پێدڤی نەکریە، سەرەرای راگەهاندنا قەدەغەیا هاتنوچوونێ لێ خەلک ل گەلەک باژێران ب دلێ خوە هاتنوچوونێ دکەن و پێگیریێ ب رێنمایان ناکەن).
ناڤهاتی راگەهاند کو خالا دویێ ژی ئەوە کو دەولەت هاریکار نینە دا خەلک ژی پێگیریێ ب رێنمایان بکەن، رێژا هەژاریێ ل ئیرانێ و رۆژهەلاتێ کوردستانێ گەلەک زێدەیە و خەلک نەشێن بێی کار بژین و ژ بەر هندێ ژی نەچارن دووڤ کارەکێ بچن و ئەو یەک ژی دبیتە ئەگەر کو ڤایرۆسێ کۆرۆنا زێدەتر بەلاڤ ببیت.
ناڤهاتی ئەو یەک ژی دیار کر کو هەتا نها ل رۆژهەلاتێ کوردستانێ پتر ژ دو سەد کارمەندێن ساخلەمیێ تووشی ڤایرۆسێ کۆرۆنایێ بووینە و نێزیکی دەه کەسان ژی جانێ خوە ژ دەست داینە.