بۆ چاندنێ مفاى ژ قانوونا چاكسازیێ وه‌رگرن
نه‌جمه‌ددین نێروه‌یى
وه‌ره ته ئاخه‌كا ب زێرى نه‌خشاندى، ته ئاڤه‌كا ل شه‌كرێ شرینتر، ته هه‌وایه‌ك و رۆژه‌كا پاك و گه‌ش و به‌رده‌وام هه‌بیت، و به‌رهه‌مێ ته كه‌ل و په‌لێن بیانى یێن ئیكسپایه‌ر و پرى ژه‌هراوى بیتن، ب ڤى ئاوایى ژى چ پێ نه‌ڤێت، نه‌خۆشى و هزاران جورێن شێر په‌نجه سلاڤێ ل مه دكه‌ن، ژ بلى چه‌وا پاره دهێته ده‌ستێن مه، لسه‌ر سه‌د هیڤیى و گه‌ڤان ژى، ئه‌م وه‌ها ژى پێشكێشى خه‌لكه‌ك دن دكه‌ین و دبینه جهێ كه‌نیێ بۆ وان و گه‌ڤان ل مه دكه‌ن كۆ هه‌ر ده‌ما ب چركه‌یان ده‌رگه‌هێن خۆ بگرین، هوون دێ ژ برسان مرن. ئێك ژ ستوونێن بهێز یێن مان و گه‌شه‌كرنا هه‌ر وه‌لات و نه‌ته‌وه‌ییه‌كێ، هه‌بوونا چاندنه‌كا بهێز و پشت به‌ستن و پیته‌دان ب به‌رهه‌مێ ناڤخۆیه. كه‌رتێ چاندنێ ژى ژ وان ستوونایه كۆ بێ وێ چ جار وه‌لات نه‌شێن خۆ بهێزى لسه‌ر پێ بگرن و هه‌رده‌م یێن لبه‌ر هه‌رڤین و كه‌ڤتنێ، ژ بۆ ڤێ یه‌كێ ژى كوردستانێ نموونه زۆرن و ب تایبه‌ت نها كۆ پتریا كه‌ره‌سته‌یێن خۆارن و ڤه‌خۆارنا ژ ده‌رڤه‌ى هه‌رێما كوردستانێ دهێن و ل جهێ هنارده‌كرنێ، ئه‌م یێن بووینه ملله‌ته‌ك هاورده‌كه‌ر. هه‌ر سال و ب تایبه‌ت ل ده‌سپێكا هاتنا وه‌رزێ هاڤینێ و به‌رهه‌مى، دێ بینین ب سه‌دان جۆتیار یێن گازندا ژ هاتنا به‌رهه‌مێ خۆ دكه‌ن، چ د بێ بهایێ به‌رهه‌مان، یان نه‌بوونا پشته‌ڤانى و رێكه‌كێ بۆ هه‌نارده‌كرن و ڤه‌مانا ئه‌ڤى به‌رهه‌مێ خۆومالى یێ سرۆشتى و جوان. هه‌ر ره‌نگه هنده‌كان ژى ده‌لیڤێ بۆ خۆ ببینن و خۆ سیاسه‌تێ تێكه‌لى ته‌ماته و گوندوران ژى بكه‌ن و كولێن خۆ ل وێرێ ده‌ربكه‌ن. هه‌ر چه‌وا بیت هه‌كه جۆتیار گازندێ بكه‌ن، د حه‌قن و پێدڤى بوو ئه‌ڤه چه‌ندین ساله حكومه‌ت و كه‌رتێ تایبه‌ت و ئه‌و زه‌نگینێن ب پله‌كێ چووینه سه‌رێ ملله‌كێ خۆ لێ كربوو خۆدان. هه‌كه ئه‌م بپرسین، بۆچى نه حكومه‌ت و نه كه‌رتێ تایبه‌ت هند خۆ ل كه‌رتێ چاندنێ ناكه‌نه خۆدان و ل پشت گوهڤه هاڤێتیه، د به‌رسڤدا دشێین بێژین، حكومه‌تێ پشتا خۆ ب نه‌فتێ گرێ دایه و ئه‌ڤێن دى هه‌موو ل پشت گوه هاڤێتینه، كه‌رتێ تایبه‌ت ژى فێر بوویه ل وى تشتى بگه‌ریت كۆ قازانجه‌كا زوو، پتر و مسۆگه‌ر بگه‌ریت و هند حه‌ز ل سووده‌كا كێم و درێژ وه‌خت ناكه‌ن، لێ هه‌كه ب دروستى لێ بنێرن، راسته، لێ دڤێت وێ ژى بزانن كۆ مفایه‌ك كێمه لێ یا به‌رده‌وامه و ته‌واو ژى نابیت. ژ به‌ر ڤێ چه‌ندێ هه‌كه زه‌نگین و كه‌رتێن تایبه‌ت و ب پشته‌ڤانیا حكومه‌تێ د شه‌هره‌زا بن، دشێن ئه‌ڤێ رێكێ كارا بكه‌ن و مفایێن تاكى بۆ مفاێن گشتى ڤه‌گۆهێزن و د ئاینده‌یه‌كێ كورتدا ئه‌م پشتا خۆ ب به‌رهه‌مێ خۆمالى گه‌رم بكه‌ین، ئه‌ڤێ ژى دێ د نڤیسینه‌كا دیدا ئاماژه پێ ده‌م. د قانوونیا چاكسازیێ دا، حكومه‌ت دشێت رێكێ بۆ ڤى كه‌رتى خۆش بكه‌ت و به‌رێ كه‌رتێ تایبه‌ت و زه‌نگینان بده‌ته ڤى كه‌رتى و ئه‌زێ پشت راستم كۆ دێ سه‌ر گریت ژى، چونكۆ ب هه‌بوون و جێبه‌جێكرنا قانوونیا چاكسازیێ، ب ده‌ستخستنا پاره‌یه‌كێ بله‌ز و زۆر، ده‌وله‌مه‌ندبوونا ب چركه‌یان و ب رێكێن نه قانوونیى ناهێلیت و ب ڤى ره‌نگى دێ پتریا وان ل رێكێن قانوونیى گه‌رن كۆ هه‌ڤسه‌نگیا زه‌نگینیا خۆ راگرن و ب من وه‌ره كه‌رتێ چاندنێ ژى باشترین رێكه و هه‌ركه‌سێ زووتر خۆ دناڤدا ببینیت، دێ مفادارتر بیت. هیڤیا من ئه‌وه حكومه‌ت خۆ ل كه‌رتێن ناڤخۆیى بكه‌ته خۆدان و به‌رهه‌مێن ناڤخۆیى باشتر و مسۆگه‌رترن ژ یێن بیانى، ب وى ره‌نگى ژى حكومه‌ت مفادارێ سه‌ره‌كى یه و دێ شێت هێزا زه‌ند و باسكێن ڤى ملله‌تى بده‌ته كارى و مفاى ژێ ببینیت و د به‌رامبه‌ر ژى خه‌لكه‌ك ژى مفداره ژ هه‌موو ئالیه‌كێ ڤه. ل دوماهیێ ژى هه‌روه‌كۆ ئه‌م كورد دبێژین، ره‌شۆ ب ده‌ستێن خۆ هه‌كه دێ ئاڤ مه به‌ت.
