ساخله‌ميا دهۆك پلانا رۆژانێن جه‌ژنێ رادگه‌هينيت
دھۆک، رەڤین سالح لاوەند:
ل دۆر پلانا ساخلەمیێ بۆ رۆژێن جەژنا قوربانی و ھەروەسا رەوشا ئاوارەیان بەرپرسێ راگەھاندنا ساخلەمیا گشتی یا پارێزگەھا دھۆکێ د پرێس کۆنفرانسەکی دا دیار کر کو پلانەک ل سەر چەند ئاستان دارێشتیە و دێ پتر ژ حەفتیەکێ ڤەکێشت.
حمزە رەزیکی بەرپرسێ راگەھاندنا رێڤەبەریا گشتی یا ساخلەمیا پارێزگەھا دھۆکێ د پرێس کۆنفرانسەکی دا دیار کر کو پلانا وان بۆ رۆژێن جەژنێ دێ پتر ژ حەفتیەکێ ڤەکێشت و گۆت “پلانا مە ل سەر چەند ئاستا ھاتیە دارێشتن، ئاستێ ئیکێ پشتەڤانیا پێشمەرگەی کو تێمێن ساخلەمیێ بۆ دەمێ ٢٤ دەمژمێران دێ ل ھەموو میحوەرێن شەری ھەبن، ئاستێ دی دەربارەی خزمەتکرنا ئاوارەیانە ل جھێن لێ ئاکنجی، ب تایبەت قەزا سێمێل و شاریا و خانکێ کو بنگەھێن مە یێن ساخلەمیێ بۆ دەمێ ٢٤ دەمژمێران دێ ل ڤان جھان ئامادەبن”.
بەرپرسێ راگەھاندنا ساخلەمیا دھۆکێ خویا کر ژی کو ھەموو دەزگەھێن وان یێن ساخلەمیێ تایبەت ئەوێن پشکێن تەنگاڤیا لێ ھەبن ٢٤ دەمژمێران دێ د ڤەکری بن، مینا نەخۆشخانێن تەنگاڤیان، ئازادی، سۆتنێ، چاڤان، ھەروەسا نەخۆشخانێن ئافرەت و زارۆبوونێ و ھیڤی یا زارۆیان، ھەروەسا ل قەزایان ژی دێ نەخۆشخانە ٢٤ دەمژمێران دڤەکری بن. و ل گەل ڤێ چەندێ خزمەتا ١٢٢ دێ بەردەوام د کاری دا بیت و ل دەمێ روودانان خەلک دشێن پەیوەندیێ پێ بکەن و گۆت “ژ لایێ خۆپاراستنێ ڤە ل رۆژێن جەژنێ و بێھنڤەدانێ دا چار تیمێن خۆپاراستنێ رۆژانە دێ گەرن، ھەروەسا شەش تیمێن زێرەڤانیا ساخلەمیێ ژی رۆژانە دێ ل قەزایان گەرن”.
حەمزە رەزیکی ل دۆر ئامارێن بەردەست دەربارەی رەوشا ساخلەمیا پەنابەران، دیار کر کو ژ رۆژا ١/٨/٢٠١٤ ھەتا نوکە ھژمارا نەخۆشێن ھاتینە چارەسەرکرن ژ لایێ ھەموو تیمێن ساخلەمیێ ڤە ٣٦٨ ھزار ٣٩٢ نەخۆش بووینە، ھەروەسا ٨ ھزار ٣٤٧ نەخۆش ل دەزگەھێن ساخلەمیێ ھاتینە نڤاندن، ١٠٧٦ نشتەرگەری بۆئاوارەیان ھاتینەکرن و گۆت “١٩٩٩ ژلایێ ئاوارەیان ڤە ل دھۆکێ ژ دایک بووینە و ئەو نەخۆشێن ئاوارە یێن گیانێ خوە ژدەست داین ھەتا نوکە ١١٢ نەخۆش بووینە و ل دووڤ پیڤەرێن رێکخراوا ساخلەمیا جیھانی وەسا دیار بیت کو ھەکە ٠,١% ھەر نەخوشەکێ ئاوارە د ھەر رۆژەکێ دا گیانێ خوە ژدەست بدەن وەکو پێڤەرەکێ جیھانی دھێتە نیاسین، ئەگەر ئەم ڤان ١١٢ نەخۆشێن گیانێ خوە ژدەست داین ل سەر وان ئاوارەیێن پارێزگەھا دھۆکێ پارڤە بکەین دێ دیار بیت کو ٠,٠٢٤% گیانێ خوە ژ دەست داینە و ب ڤێ چەندێ دیار دبیت تا رادەیەکێ باش ساخلەمیا وان ھاتیە کونترۆلکرن”.
