شنگال و دیمه‌نێ وه‌لاتی و بارێ ئێزدیان
شنگال و ئێزدی پرۆژێن كاره‌ساتان و ده‌رده‌سه‌ریانن ب درێژیا دیرۆكێ و هه‌كه به‌رێ كه‌سێ خوه ل وان نه دكره خودان و ب ده‌هان هه‌زار ژن و كچ و خورت و مال و حالێ وان دبرن و تالان دكرن و كڕین و فرۆتن پێ دكرن هه‌ر بگره ژ فه‌رمانێن فه‌ریق پاشا و میرێ كۆره و نادر شاهێ عه‌جه‌م و ئیتاخێ توركی و هه‌تا دگه‌هیته فه‌رمانا گرعزێر و سیباشێخدرێ و ڤێ فه‌رمانا داعشا ب ناڤێ ده‌وله‌تا ئیسلامیا عیراقێ و شامێ كو هاتیه چێكرن ژ لایێ زلهێز و كاپیتالزما خوه ب سه‌ر هه‌می جیهانێ دا گرتی و ب دلێ خوه نه‌خشێ جیهانێ ب خوینا هه‌ژار و به‌لنگازان وێنه دكه‌ت و ل گۆر به‌رژه‌وه‌ندبێن خوه یێن نه‌ته‌وی و ب رێیا دارده‌ست و دووڤه‌لانكێن خوه ملله‌ت وه‌لاتفرۆشێن خوێنمژێن دیرۆكیێن ده‌ڤه‌رێ و جیهانێ كو ئالۆزی و كێشان و شه‌ڕ و مالوێرانیان په‌یدا دكه‌ت و سه‌رپه‌رشتیا وان دكه‌ت و سوته‌مه‌نی و قوربانی هه‌ر ملله‌تێن بنده‌ست و نڤستی نه و بلا ئه‌و هه‌ڤبكۆژن و ئاواره ببن و چه‌ك و ته‌قه‌مه‌نی و كارگه‌هێن كاپیتالزمێ كار بكه‌ن ب خوینا ملله‌تێن بێ تاوان و ده‌مێ شه‌ڕان په‌یدا كه‌ن هه‌ردو لایان هاندده‌ن و پشته‌ڤانیێ دكه‌ن دا كو شه‌ڕێ به‌رده‌وامبه و ڤێ جارێ بارێ گران كه‌فته سه‌ر لاوازترین ملله‌ت كو ئێزدینه و نێزیكی (400 ـ 500) هه‌زار ئێزدی ئاواره‌بوون و كوردستانێ دل و ده‌روون و مال و مزكه‌فتێن خوه بۆ وان ڤه‌كرن وبهه‌می جۆرێن هاریكاریێ و پێشوازیه‌كا دیرۆكی كو نه دهزرێن كه‌سی دا بوو و هنده‌ك ژ ئێش و ئازارێن وان كێمكرن سه‌ره‌رای كو به‌ری وان برایێن رۆژئاڤا ئاواره ببوون و ژبلی برایێن عه‌ره‌ب و توركمانان هاتبوون كوردستانێ وه‌ك ئاواره و باره‌كێ وه‌سا گران كو نه دشیانێن مه‌زنترین ده‌وله‌تدا بوو پێشوازیا وێ ژمارا مه‌زن بكه‌ت و مه‌به‌ستا مه هێشتا ئازارێن وان ئاواران د به‌رده‌وامن د كه‌مپان و هه‌یكلێن ئاڤاهیان دا و ئه‌ڤه نێزیكی پتر ژ هه‌یڤه‌كێ یه ئازۆقه نه‌داینێ و هنده‌كان مه‌لیۆنان ئاواره‌یێ نه‌وه‌رگرتیه و د باره‌كێ ئالۆز دا دژین ژبلی كولا مه‌زن و گران كو ب هه‌زاران كچ و ژن و لاوێن ئێزدیان د ده‌ستێن داعش دانه و كڕین و فرۆتنێ ل ده‌وله‌تێن برایێن مه یێن عه‌ره‌ب ب وان دكه‌ن و چو ئاسۆیێن دیار و ڕۆن و چاره‌نڤیسێ دیار نینه، له‌وما زۆربه‌ی ئێزدیان به‌رێ وان یێ ل چوونا ده‌رڤه‌ێ وه‌لاتیه و وه‌كی مارێ دار ب سه‌ری كه‌فتی هه‌می رێك ل به‌ر وان به‌رزه بووینه ژ بلی وانێن مفادار و خوه دكه‌نه پێشره‌و و مه‌زن و سه‌رۆك و رۆژانه ل سه‌ر شاشێن كه‌نالان دده‌نه حره‌حرێ و كۆنگران گرێدده‌ن و سیمیناران دگێرن، لێ مخابن باوه‌ریا خه‌لكێ ب كه‌سێ نه‌مایه و ب دیتنا مه هه‌كه له‌زه‌ك نه‌ئێته‌كرن ب رزگاركرنا شنگال و تله‌عفه‌رێ كو زۆربه‌ی كچ و ژنێن ئێزدیان تێدا دگرتینه و شنگال نه‌ئێته پاراستن و ئاڤاكرن و قه‌ره‌بۆكرن و نه‌ئێنه ب سه‌ر كوردستانێ ڤه و ئێزدی خوه ب كریار و د جهێ بریارێ دا نه‌بینن، ئێدی باوه‌ریا خه‌لكی نائێت و خوه د چ چارچووڤان دا نابینن.
