ب هه‌ردو زمانێن كوردى و ئه‌رمه‌نى سترانان دبیژیت
ئه‌ڤرۆ نیوز، زنار تۆڤى:
خانما سترانبێژ ئێلین خاچارۆڤا، د دیداره‌كێ دا بۆ ئه‌ڤرۆ نیوز دیار كر: د ژیێ بیست سالیێ دایه، نوكه ئه‌و ل ئه‌رمه‌نستانێ دژیت و دایك و بابێن وێ ئه‌رمه‌نینه، بابێ وێ د ئه‌سل دا ژ ئه‌رمه‌نیێن دیاربه‌كرێ نه، ئه‌و كوردیێ باش دزانیت و گه‌له‌ك حه‌ز ژ زمانێ كوردى دكه‌ت، سترانان ب هه‌ردو زمانێن كوردى و ئه‌رمه‌نى ژى دبێژیت، وێ گه‌له‌ك هه‌ڤالێن كورد ل ئه‌رمه‌نستانێ هه‌نه، ل زارۆكاتیا خوه وێ پتر گوهداریا سترانێن كوردى كرینه.
ناڤهاتیێ گۆت ژى: ده‌مێ ل سالا 1915 قركرنا ئه‌رمه‌نیان ل سه‌ر ده‌ستێ ده‌وله‌تا ئۆسمانى ده‌ست پێكرى، مالباتا بابێ وێ شیاینه خوه ژ ده‌ستێ توركان قورتال بكه‌ن و گۆتیه وان ئه‌م كوردین، له‌وما نه‌هاتنه كوشتن، ژبه‌ر ڤێ چه‌ندێ ئه‌ز دبێژم بابێ من ئه‌رمه‌نیه‌كێ كورده، بابێ من پتر ب زمانێ كوردى د ئاخڤیت، ئه‌و حه‌ز دكه‌ت بهێته كوردستانێ و چه‌ندین كارێن هونه‌رى و كلیپان چێكه‌ت، دیسان ئه‌و حه‌ز دكه‌ت بچیته هه‌موو پارچێن دیتر یێن كوردستانێ.
هه‌روه‌سا گۆت ژى: ئه‌ڤه ده‌مێ سێ سالانه سترانان دبێژیت، ئه‌و گه‌له‌ك حه‌ز ژ زمانێ كوردى دكه‌ت، وێ ل زارۆكاتیا خوه گوهداریا سترانێن ئارامێ تیگران كریه و وێ دڤێت وه‌كو كچه‌كا ئه‌رمه‌نى خزمه‌تا هونه‌ر و سترانێن كوردى بكه‌ت، هه‌روه‌سا ئه‌و ب زمانێ ئه‌رمه‌نى ژى سترانان دبێژیت، هه‌تا نوكه وێ شه‌ش سترانێن سینگل و سێ كلیپ ژى چێكرینه، لێ هه‌تا نوكه وێ چو ئه‌لبۆم چێنه‌كرینه، ل ڤان نێزیكان ئه‌و دێ دو كلیپێن دى كو ئێك ژ وان ب زاراڤێ كرماتنجیا خوارێ گۆتیه دێ به‌لاڤ كه‌ت، دیسان وێ هنده‌ك ستران ب هه‌ردو زمانێن كوردى و ئه‌رمه‌نى گۆتینه، بۆ سالا نوو وێ لبه‌ره ئه‌لبۆمه‌كێ به‌لاڤ بكه‌ت، هه‌ر چه‌نده نوكه په‌تایا كۆرۆنایێ بوویه رێگر ل هه‌مبه‌رى ئه‌نجامدانا چه‌ندین كارێن هونه‌رى، هه‌ر چه‌نده ئه‌و ب خوه كچه‌كا ئه‌رمه‌نیه و نوكه ل سه‌رانسه‌رى وه‌لاتێ ئه‌رمه‌نستانێ ب تنێ ئه‌و سترانان ب كوردى دبێژیت، وێ لبه‌ره ب هه‌موو شێوه‌زارێن كوردى سترانان بێژیت و دیسان خه‌لكێ ئه‌رمه‌نستانێ گه‌له‌ك حه‌ز ژ كوردان دكه‌ن.
