حه‌زدكه‌ت بۆ ئه‌نجامدانا چه‌ند كارێن هونه‌ری بهێته كوردستانێ
ئه‌ڤرۆ ، زنار تۆڤی:
سترانبێژ ئه‌مراه كورد، كو خه‌لكێ باژێرێ سه‌رحه‌دێ یه ل باكۆرێ كوردستانێ، و ئه‌ڤه هه‌ڤده ساله سترانان دبێژیت، د دیداره‌كێ دا بۆ رۆژناما ئه‌ڤرۆ دیاركر كو هه‌تا نوكه وی چه‌ندین كلیپ و سترانێن سینگل چێكرینه، هه‌روه‌سا ئامیرێ سازێ دژه‌نیت، هه‌روه‌سا دوارێ سترانگۆتنێ و مۆزیكێ دا هاریكاریا هه‌ڤالێن خوه دكه‌ت، ئه‌و پتر حه‌ز ژ سترانێن فولكلۆری دكه‌ت و ل ئاهه‌نگ و هه‌لكه‌فتێن كوردان پتر وان سترانان دبێژیت.
ناڤهاتی گۆت: د نوكه دا ره‌وشا سترانا كوردی ل باكۆرێ كوردستانێ یا باش نینه، ده‌وله‌تا تورك سانسۆر دانایه سه‌ر زمان و كلتۆر و سترانێن كوردی، لێ سترانبێژێن وه‌لاتێن دی ل توركیا سترانان ب زمانێن خو دبێژن و چو رێگری و سانسۆر ل سه‌ر سترانێن وان نینه، ل ڤان نێزیكان دێ سترانه‌كا شۆره‌شگێری، كو په‌یڤ و ئاوازێن وی ب خوه‌نه دێ به‌لاڤ كه‌ت و به‌ری چه‌نده‌كێ ژی سترانه‌ك ب ناڤێ( زالم یارێ) كلیپ كریه، ئه‌و ستران ژ په‌یڤ و ئاوازێن وی بوون، هه‌روه‌سا نوكه كار ل سه‌ر تۆماركرنا پێنج سترانان دكه‌ت و دێ ب شێوێ سینگل به‌لاڤ كه‌ت.
ل دووماهیێ گۆت: من هنده‌ك ستران ب زمانێ توركی ژی گۆتینه، لێ من چو سترانێن توركی كلیپ نه‌كرینه و هه‌موو كلیپێن من كوردی نه، هه‌روه‌سا ئه‌ز حه‌ز دكه‌م بهێمه باشۆرێ و ل وێرێ هنده‌ك كارێن هونه‌ری ژی ئه‌نجام بده‌م، دیسان ئه‌ز گازندان ژ وان گه‌نجان دكه‌م ئه‌وێن ژنوو سترانان دبێژن، چنكو ئه‌و ب تام و روحیه‌تا كوردی سترانان نابێژن و ب ڤێ چه‌ندێ زیانێ دگه‌هیننه هونه‌رێ كوردی.
