دو خواندنێن جودا بۆ رەوشا نها یا رۆژئاڤایێ کوردستانێ دهێنە کرن
پشتی هلوەشاندنا هەسەدێ نها ل سەر ئاستێ کوردستانێ دو خواندنێن جودا بۆ رەوشا رۆژئاڤایێ کوردستانێ دهێنە کرن و هندەک کەس وەسا دبینن کو قووناغەکا نوو بۆ رۆژئاڤایێ کوردستانێ دەستپێکریە و کورد دشێن ب رێیا سیاسەتێ بگەهنە گەلەک مافێن خوە.
مەزلوم عەبدی ل شامێ د پرێس کۆنفرانسەکێ دا راگەهاند کو ئەرکێ هەسەدێ ل سووریێ ب دووماهی هات و هەسەدە هاتە هلوەشاندن و ئەو دێ کار بۆ ئاڤاکرنا سووریایەک نوو کەن کو تێدا مافێ هەموو پێکهاتەیێن ل سووریێ بهێتە پاراستن.
سەبارەت ب هلوەشاندنا هەسەدێ و رێڤەبەریا خوەسەر و قووناغا نها ل رۆژئاڤایێ کوردستانێ دو نێرینێن جودا د ناڤبەرا چاڤدێرێن سیاسی و رەوشەنبیرێن کورد ل هەر چار پارچەیێن کوردستانێ و جیهانێ دا هەنە.
پشکەک ژ چاڤدێرێن سیاسی وەسا دبینن کو یا نها ل رۆژئاڤایێ کوردستانێ روودای شکەستەکا گەلەک مەزنە بۆ کوردان، چونکی چو تشتەک ب ناڤێ رۆژئاڤایێ کوردستانێ نەما و تنێ مافێ خواندنێ ب زمانێ کوردی مایە و کوردان ل رۆژئاڤایێ کوردستانێ گەلەک قوربانی دان و دشیان ب سیاسەتەکا راست بگەهنە گەلەک مافێن خوە، لێ ژ بەر کو هەر پشتی روودانێن ل سووریێ پەیەدێ و یەپەگێ رێ نەدان هێزێن دی یێن کوردی د رێڤەبرنا رۆژئاڤایێ کوردستانێ دا جه بگرن و هەموو تشتەک کرنە دەستێ خوە و ژ ئەنجامێ سیاسەتا شاش ئەڤرۆکە پڕانیا دەستکەفتیێن کوردان ل رۆژئاڤایێ کوردستانێ ژ دەست چوون و مەترسی ل سەر پاشەرۆژا کوردان ل سووریێ زێدە بوویە.
ل ئالیێ دی گەلەک ژ چاڤدێرێن سیاسی و رەوشەنبیرێن کوردی ژی وەسا دبینن کو مەترسیەکا گەلەک مەزن ل سەر کوردان ل رۆژئاڤایێ کوردستانێ و سووریێ هەبوو، هەروەسا ئەمریکا و جڤاکێ نێڤدەولەتی ژی پشتەڤانی ل کوردان نەکرن، کورد ل سووریێ ب تنێ مان و نەدشیان شەڕێ تورکیا و سووریێ بکەن، چونکی ئەو یەک دا بیتە ئەگەرێ کارەساتەکا گەلەک مەزن، ژ بەر ڤێ یەکێ ژی بریارا کوردان ل سووریێ گەلەک د جهێ خوە دایە و کورد دشێن د سووریا نوو دا بگەهنە گەلەک مافێن خوە، چونکی ئەمریکا و فرەنسا پشتەڤانیێ ل سووریایەک ئێکگرتی دکەن کو تێدا هەموو مافێن گەلێ کورد بهێنە پاراستن.
ل گۆر دیتنا پشکەک ژ چاڤدێران هەکە کورد ل سووریێ ئێکگرتی بن و کار بکەن دشێن مفایێ ژ دەلیڤەیان وەربگرن، چونکی حوکمەتا سووریێ نها گەلەک لاوازە و پێدڤی ب پشتەڤانیا کوردانە، هەروەسا ناکۆکیێن گەلەک مەزن د ناڤبەرا سووریێ و ئسرائیلێ دا هەنە و دبیت گوهۆڕینێن نەچاڤەرێکری ل سووریێ روو بدەن و گرنگە کورد ژی خوە بۆ هەر گوهۆڕینەکێ ل سووریێ بەرهەڤ بکەن، بریارا کوردان گەلەک گرنگ بوو، چونکی نابیت د رەوشا نها یا ئالۆز ل سووریێ دا کورد ببنە قوربانی.
