د. هه‌وار به‌لۆ: دڤێت ئه‌م كه‌لتۆرێ خواندنا چیرۆكان لبه‌ر دلێ زارۆیان شرین بكه‌ین
ئه‌ڤرۆ ، زنار تۆڤی:
هه‌ر د كه‌ڤندا چیرۆكان گه‌له‌ك رۆلێ خوه هه‌بوویه، نها ژی ل وه‌لاتێن پێشكه‌فتی گه‌له‌ك گرنگی ب چیرۆكێن زاۆیان دهێته دان و سالانه هژماره‌كا مه‌زن یا چیرۆكێن زارۆیان دهێنه چاپكرن، لێ ل باژێرێ دهۆكێ ئه‌ڤ چه‌نده د ئاستێ پێدڤی دا نینه و دڤێت پتر گرنگی ب چیرۆكێن زارۆیان بهێنه دان.
د. هه‌وار به‌لۆ، نڤیسه‌ر و مامۆستایێ زانكۆیێ بۆ ئه‌ڤرۆ دا زانین كو هه‌كه وه بڤێت ئاراسته‌یا زارۆیی به‌ر ب باشڤه ببه‌ی، ب شێوازێ چیرۆكێ تشتان بۆ بێژن، چونكی چیرۆك خه‌یالا زارویی دده‌ته شولی و ئه‌و شیره‌تێن ڤه‌شارتی یێن د چیرۆكێ دا، هه‌موو بۆ وی دێ بنه وانه و دێ پتر مفای ژێ بینیت و ده‌مێ زارۆك مه‌زن ژی دبیت، دێ ئه‌و چیرۆكه ل گه‌ل ده‌روونێ وی ژین و ئاراسته‌یا وی ده‌ست نیشان كه‌ن و گۆت: (له‌وما یا گرنگه د وارێ په‌روه‌ردێ دا گرنگی ب چیرۆكێ بهێته دان، ب تایبه‌تی ژی ل ده‌مێ مامۆستا وانێ شرۆڤه دكه‌ت، داكو بشێت ب ره‌نگه‌كێ باش نامه‌یا خوه بگه‌هینیت).
د. هه‌وار دیار كر ژی، هه‌كه ئه‌م بشێین وان چیرۆكان ب شێوێ شانۆگه‌ری بۆ زارۆیان بده‌ینه دیار كرن، دێ گه‌له‌ك باشتر بیت و دێ كارتێكرنه‌كا باشتر ل سه‌ر زارۆیان هه‌بیت، هه‌روه‌سا ده‌مێ مرۆڤ چیرۆكه‌كێ بۆ زارۆیان دبێژیت و ل گه‌ل وێنه‌یان ژی نیشا بده‌ت، ئه‌ڤ چه‌نده دێ خه‌یالا وی ده‌ته شولی و گۆت: (لێ هه‌كه زارڤه‌كرنێ ژی بكه‌ت، دێ پتر مفای ژێ بینیت و په‌روه‌رده‌یا نوو ژی یا بزاڤێ دكه‌ت، ل سه‌ر ڤێ چه‌ندێ بچیت).
دكتور هه‌وار د به‌رده‌وامیا ئاخفتنا خوه دا دبێژیت: (دڤێت وێنه ژی ل گه‌ل چیرۆكان بهێته دانان، چونكی وێنه گه‌له‌ك باش مه‌ره‌ما خوه دگه‌هینیت و زارۆك پتر حه‌ز ژێ دكه‌ت، هه‌كه مرۆڤ ب خوه وێنه‌یان چێكه‌ت و لدووڤ حه‌زا خوه دیزاینان دانیت، دێ باشتر مه‌ره‌ما چیرۆكێ گه‌هینیت، هه‌روه‌سا گه‌له‌ك چیرۆك ژ خه‌یالا مرۆڤی دروست دبن و گه‌له‌ك جاران ژی مرۆڤ چیرۆكان ل سه‌ر زمانێ گیانه‌وه‌ران ژی دروست دكه‌ت، ڤێ چه‌ندێ بالكێشیه‌ك بۆ زارۆكی تێدا هه‌یه و زارۆك ژی پتر پێڤه دهێته گرێدان، مه‌ره‌م ژ ڤێ چه‌ندێ ئه‌وه ئه‌م بشێین په‌یامه‌كا مرۆڤایه‌تی یا په‌روه‌رده‌یی بگه‌هینینه زارۆیان و ل پاشه‌رۆژێ ب باشترین شێوه بهێته ئاڤاكرن).
د. هه‌وار ئه‌و چه‌ند ژی ئاشكرا كر، نابیت ئه‌و بابه‌تێن توندۆتیژی تێدا، د چیرۆكێن زارۆیان دا بهێنه ب كارئینان، ژبه‌ركو ئه‌ڤه دێ كارتێكرنه‌كا خراب ل سه‌ر زارۆیان په‌یدا كه‌ن، پێدڤیه ئه‌م ژیانه‌كا نموونه‌یی بكه‌ینه د سه‌رێ زارۆیان دا، هه‌روه‌سا نابیت، ئه‌و چیرۆكێن توندۆتیژی تێدا ، بهێنه دناڤا بازاری دا، دیسان پێدڤیه كه‌لتۆركرنا خواندنێ هه‌بیت و گۆت: (دڤێت ئه‌ڤ چه‌نده هه‌ر ژ باخچێ زارۆیان ده‌ستپێبكه‌ت، هه‌تا دگه‌هیته قووناغا زانكۆیێ، دیسان نابیت مرۆڤ چیرۆكه‌كێ بۆ زارۆیی بخوینیت، كو ئه‌و چیرۆكه ژ ژیێ وی مه‌زنتر بیت، چونكی تێناگه‌هیت و چ مفای ژی ژێ نابینیت و دڤێت چیرۆك ل سه‌ر بنه‌مایێ ده‌روونی و په‌روه‌رده‌یی بهێنه پۆلین كرن).
نڤێسه‌ر و مامۆستایێ زانكۆیێ ئاماژه بڤێ چه‌ندێ ژی كر، مرۆڤ دشێت چیرۆكا ریالیزمی و خه‌یالی و دیرۆكی و ره‌وشه‌نبیری و ل سه‌ر زارێ گیانه‌وه‌ران كه‌لتۆرێن بیانی و ژیاننامه و خه‌یالا زانستی، بۆ زارۆیان بنڤێسیت و گۆت: (هه‌روه‌سا دڤێت ئه‌م كه‌لتۆرێ خواندنا چیرۆكان لبه‌ر دلێ زارۆیان شرین بكه‌ین، دیسان مه تێله‌ڤزیۆن و كه‌نالێن ئاراسته كری بۆ زارۆیان د ئاستێ پێدڤی دا نینن، هه‌كه هه‌بن ژی نه ب شێوازه‌كێ زانستینه، به‌لكو ب شێوازێ بازرگانینه، هه‌روه‌سا ل پارێزگه‌ها دهۆكێ، ره‌وشا چیرۆكا زارۆیان نه یا باشه، ئه‌و تشتێ هاتیه كرن ژی، پتر وه‌رگێرانا چیرۆكێن بیانی بوویه بۆ زارۆیان).
