ناڤه‌ندا خانی یا ره‌وشه‌نبیری و راگه‌هاندنێ (13) پرتووكێن نوو دێ چاپكه‌ت
دهۆك، زنار تۆڤی:
ناڤه‌ندا خانی یا ره‌وشه‌نبیری و راگه‌هاندنێ، به‌ری چه‌ند رۆژان (13) پرتووكێن نوو دوارێن جودا دا گه‌هاندنه چاپخانێ و ل نێزیك دێ كه‌ڤنه به‌ر ده‌ستێن خوانده‌ڤانان و ئه‌ندامه‌كێ لژنا ره‌وشه‌نبیری ژی ل ناڤه‌ندا ناڤبری دبێژیت: ئه‌ڤ پرۆژه دێ یێ به‌رده‌وام بیت
نڤیسكار و رۆژنامه‌ڤان (ئیسماعیل بادی) ئه‌ندامێ لژنا ره‌وشه‌نبیری و به‌رپرسێ پرتووكخانێ ل ناڤه‌ندا خانی یا ره‌وشه‌نبیری و راگه‌هاندنێ بۆ رۆژناما ئه‌ڤرۆ دیاركر كو گه‌را دویێ یا پرتووكان دێ هێنه چاپكرن، نه‌ه پرتووك به‌ر ب چاپێ چووینه و كۆمه‌كا دی ژی د به‌رهه‌ڤن و ڤێ جارێ (13) پرتووك دێ هێنه چاپكرن و ئه‌ڤ پرۆژه دێ یێ به‌رده‌وام بیت، د هه‌مان ده‌مدا به‌رهه‌ڤی بۆ چه‌ندین پرتووكێن دی هاتیه‌كرن بۆ چاپكرنێ، هه‌روه‌سا داكو ئارمانجا ڤی پرۆژه‌ی یا به‌رچاڤ و ئاشكرا بیت، ژ نوكه وێڤه بارا پتر دێ ئه‌و پرتووكێن ناڤه‌رۆكا وان گرێدایی بابه‌تێن كوردایه‌تیێ و بیرهاتنێن پێشمه‌رگایه‌تیێ و هزرا نه‌ته‌وه‌یی و كوردایه‌تیێ و زێده‌باری بابه‌تێن شۆره‌شێن كوردی و دیرۆكا كوردان ب گشتی و به‌رهه‌مێن پێشمه‌رگێن شه‌هید بووین هێنه چاپكرن، ئانكو وه‌كو به‌ری نوكه هند رۆمان و چیرۆك و بابه‌تێن ئه‌ده‌بێ نوو ده‌لیڤا چاپكرنێ ل ناڤه‌ندا خانی نابیت.
ناڤهاتی گۆت: پرتووكێن دهێنه چاپكرن ئه‌ڤه‌نه (به‌فرینا به‌راڤی، رۆمان، هزرڤان، پرتووكا تنێ دارا هنارێ، رۆمان وه‌رگێران سامی ئه‌لحاج، پرتووكا دبێژن، گه‌له‌ك دبێژن كێم دپێژن، كۆمكرن و به‌رهه‌ڤكرن عزه‌ت یوسف، پرتووكا خواندنه‌كا ره‌خنه‌یی ل دۆر به‌ندێن دستۆرێ ئیراقێ یێ سالا 2005، وه‌رگێران شێرزاد نائیف، پرتووكا ژ عه‌ممان بۆ ئامێدیێ یان گه‌شته‌ك ل كوردستانا ژێری، وه‌رگێران موسه‌ده‌ق تۆڤی، پرتووكا سه‌عدوللا ئاڤده‌ل، شاعر پێشمه‌رگه شه‌هید، كۆمكرن و به‌رهه‌ڤكرن ئیسماعیل بادی، پرتووكا ڤه‌برین ل كوردستانێ وه‌رگێران محسن عه‌بدولره‌حمان و حه‌بیب حه‌سه‌ن بناڤی، پرتووكا كینه ئه‌م، كوردیكرن موحسن قۆچان، پرتووكا داد بینه‌رێن رامیاری وه‌رگێران بۆ كرمانجیێ شێرزاد نائیف، وه‌رگێران تێگه‌ه و رێباز، رێژین عه‌بدوللا، پرتووكا یاسا نه ئارمانجه، رۆمان خه‌لیل ره‌سۆل، پرتووكا كورد و بنه‌مایێن ده‌وله‌تبوونێ، محه‌مه‌د عه‌بدوللا ئامێدی، پرتووكا سێگۆشا مرنێ ژ بیرهاتنێن شۆره‌شێ، ژ نڤێسینا نائیف ئیسماعیل بیگداودی.
