د. قادر محه‌مه‌دصالح: 60-70% ئاریشه‌یێن گه‌ل فتقا چێدبن د ژیێ ئێك سالیێ دانه
دهۆك، له‌زگین جوقی:
تایبه‌تمه‌نده‌كێ نشته‌رگه‌ریێن زارۆكان ل دهۆكێ دیاركركو فتقا زارۆكان په‌یدادبیت نه وه‌كو فتقا مرۆڤێن مه‌زنه كو فتقا زارۆكی په‌یدابیت ئه‌و زارۆك ده‌مێ دهێته ل سه‌ر دونیایێ فتق یا دگه‌لدا، به‌لێ نه مه‌رجه كیژ ژی دا دیاربكه‌ت و دبیت ژیێ وی ببیته هه‌یڤه‌ك لێ دیاربیت و دبیت رۆژا ئێكێ لێ دیارببیت و دبیت ژی ژیێ زارۆكی ببنه پێنج سال ژنوو لێ دیارببیت “.
د. قادر محه‌مه‌دصالح، تایبه‌تمه‌ندێ نشته‌رگه‌ریێن زارۆكان ل دهۆكێ دیاركركو فتق ئه‌وه ده‌مێ زارۆك خوه دگرینیت یان خوه دشدینیت دایك و باب دێ بینن نافكا زارۆكی وه‌كو گرێیه‌كێ تێدا په‌یدادبیت ومه‌زن دبیت گه‌له‌ك جاران ئه‌ڤ گرێكه ده‌مێ زارۆك یێ نڤستی بیت دێ بێژن به‌رزه دبیت، ئه‌ڤه ئێك ژ نیشانێن گرنگه نوشدار بزانن وی زارۆكی فتق یا هه‌ی، ئه‌وژی دو جۆرێن سه‌ره‌كیی هه‌نه و گه‌له‌ك جاران نه‌ساخ سه‌ره‌دانا مه دكه‌ن یان سه‌ره‌دانا نه‌خۆشخانێ دكه‌ن ئه‌م دبینین فتقا ناكێ‌ی یان فتقا به‌ر رانی یا هه‌ی و فتقا ناڤكێ به‌هرا پتر یا زارۆك پێدڤی ب چاره‌سه‌ریێ نابن ژبه‌ر دو ئه‌گه‌ران ئه‌وژی به‌هرا پتر ئه‌و بخوه چێدبیت.
تایبه‌تمه‌ندێ نشته‌رگه‌ریێن زارۆكان خۆیا كر كو: ژیێ ئێك سالیێ هه‌تا 80% چێدبن هه‌تا ژیێ دو سالیێ 100% چێدبن و گه‌له‌ك كێم فتقا ناڤكێ پێدڤی ب چاره‌سه‌ریێ دبیت، هه‌روه‌سا فتقا ناڤكێ یا بێ زیانه و ئاریشه ژێ په‌یدانابن كو ئاریشه‌یێن فتقێ دا په‌یدابن هنده‌ك جاران رووڤیك تێدا ئاسێ دبن یو خوین ناچیته رووڤیكا ئه‌ڤه پێدڤی ب نشته‌رگه‌ریێ دبن و د ده‌مه‌كێ كورتدا زارۆك دهێته نشته‌رگه‌ریكرن، فتقا ناڤكێ گه‌له‌ك یا كێمه و ئه‌م خه‌لكێ خۆ پشتراست دكه‌ین پێدڤی ب چاره‌سه‌ریێ نابن و ئه‌و ب خوه چێدبیت.
د, قادر محه‌مه‌د صالح، گۆت: فتقا به‌ر ڕانی ل ده‌ڤ زارۆكان چێدبیت و ل هه‌ردو ره‌گه‌زان و ئه‌ڤه پێدڤی ب چاره‌سه‌ریێ هه‌یه، چونكو فتقا به‌ر ڕانی هه‌كه چێبیبت پێدڤیه ب زووترین ده‌م بهێته چاره‌سه‌ركرن و چاره‌سه‌ری ژی برێیا نشته‌رگه‌ریێ یه، چونكو ئه‌و ب خوه چێنابیت، له‌ورا ژی دهێته نشته‌رگه‌ریكرن هه‌تا ئاریشه ژی تێدا په‌یدادبن وه‌كو ئاریبشێن د رووڤیكان دا وخوین ژی ناچیت و ئه‌ڤه نشته‌رگه‌ریه‌كا ئاسانه زارۆك بۆ چه‌ند ده‌مژمێران ل نه‌خۆشخانی دمینیت ودچیته مال، به‌لێ هه‌كه هات و رووڤیك ڕه‌ش ببن وخوین نه‌چیتێ و رووڤیك ل سه‌ر ئێك سوارببن دێ نشته‌رگه‌ریه‌كا ئاسان بیته نشته‌رگه‌ریه‌كا ب زه‌حمه‌ت، ئه‌وژی دبیت زكێ زارۆكی بهێته ڤه‌كرن یانژی رووڤیك بهێنه برین ژبه‌ر ڤێ چه‌ندێ مه‌ترسی هه‌یه و ده‌مێ زارۆكی فتق هه‌بیت باشتره دایك وباب نیشا نوشداری بده‌ن داكو بهێته چاره‌سه‌ركرن”.
ئاشكه‌را كركو فتقا به‌ر ڕانی گه‌له‌ك جاران خه‌لك دێ بیژن دێ خوه لێ گرن هه‌تا ژیێ زارۆكی مه‌زن دبیت ئه‌ڤه تشته‌كێ نه‌باشه و باشترین تشت ئه‌وه زارۆك زوو بهێته چێكرن، چونكو دبێژن 60% هه‌تا 70% ئاریشه‌یێن گه‌ل فتقا چێدبن د ژیێ ئێك سالیێ دایه له‌ورا یا گرنگه مرۆڤ خوه لێ نه‌گریت وچاره‌سه‌ر بكه‌ت و گۆتژی: زارۆك هه‌نه ژیێ وی دو رۆژ بووینه و مه فتقا وی چاره‌سه‌ركریه.
