ده‌ست ب ڤه‌كرنا گۆڕێن بكۆم ل حه‌ردان هاته كرن
دهۆك، له‌زگین جوقی:
نوونه‌رێ خه‌لكێ گوندێ حه‌ردان ل شنگالێ بۆ رۆژناما ئه‌ڤرۆ دیار كر، دوهی 22/2/2022ێ د رێوره‌سمه‌كێ تایبه‌ت دا ده‌ست ب ڤه‌كرنا گۆڕێن بكۆم یێن گوندێ حه‌ردان ل شنگالێ هاته كرن.
حه‌سه‌ن قاسم، نوونه‌رێ خه‌لكێ گوندێ حه‌ردان ل ده‌ڤه‌رداریا شنگالێ گۆت: “د جینۆسایدا شنگالێ دا ل رۆژا 3/8/2014ێ هه‌ژماره‌كا زۆر ژ خه‌لكێ گوندێ حه‌ردان ژلایێ تیرۆرستێن داعش ڤه هاتنه ره‌ڤاندن و بێ سه‌روشوونكرن، هه‌تا نوكه ژی پتر ژ 230 وه‌لاتیێن گوندێ حه‌ردان ژ بن ده‌ستێن تیرۆرستێن داعش رزگاربووینه و هیشتا چاره‌نڤیسێ گه‌له‌ك كه‌سان یێ دیار نینه و دوهی گۆڕێن بكۆم بۆ دیاركرنا چاره‌نڤیسێ قوربانیان هاتنه ڤه‌كرن”.
ناڤهاتی ئاشكرا ژی كر كو ل گوندێ حه‌ردان حه‌فت گۆڕێن بكۆم هه‌نه، دوهی پرۆسه‌یا ڤه‌كرنا گۆڕێن بكۆم ده‌ست پێ كر، به‌ری نوكه پشكنین بۆ كه‌سوكارێن قوربانیان یێن هاتینه كرن، ده‌مێ روفات دهێنه ده‌رئیخستن ل نۆشداریا داد ل به‌غدا پشكنینانا دی ئێن ئه‌ی ل سه‌ر بهێته كرن، داكو ناسنامه‌یێن قوربانیان ئاشكرا ببن.
د جینۆسایدا شنگالێ دا ل 2014ێ تیرۆرستێن داعش خه‌لك گولله‌بارانكرن و د ناڤ پتر ژ 82 گۆڕێن بكۆم دا ڤه‌شارتن و هه‌تا نوكه 20 گۆڕێن بكۆم یێن هاتینه ڤه‌كرن و 325 روفات ژناڤ یێن هاتینه ده‌رئێخستن، هه‌موو ژی بۆ نۆشداریا داد ل له‌غدا هاتینه هنارتن، هه‌تا نوكه ناسنامه‌یێن 145 روفاتان ئاشكرا بووینه، د جینۆسایدا شنگالێ دا پتر ژ شه‌ش هزار كه‌سان ژلایێ تیرۆرستێن داعش ڤه هاتبوونه ره‌ڤاندن و بێ سه‌روشوونكرن، هه‌تا نوكه ب هه‌ڤكاریا نڤیسینگه‌ها رزگاركرنا ره‌ڤاندیێن ئێزدی پتر ژ سێ هزار و 550 ره‌ڤاندیێن ئێزدی ژ هه‌ردو ره‌گه‌زان یێن هاتینه رزگاركرن و هێشتا چاره‌نڤیسێ پتر ژ دو هزار و 700 ره‌ڤاندیان ژی یێ دیار نینه.
