بەهرەمەندێن دوهی و پشتگوهـ هاڤێتی یێن ئەڤرۆ
نەهلا ئەحمەد
ڤەكرنا خولا دێرینان ژ لایێ فدراسیۆنا فوتبۆلا كوردستانێ پێنگاڤەكا باشە و جهێ دەستخۆشیێ یە، لێ مخابنی نەبوونا پشتەڤانیێ كارتێكرنەكا زور خراب ل سەر ئەنجام و ڕاهێنانێن یاریزانێن دێرین دكەت، جهێ داخێ یە ئەوان یاریزانان ب سالێن درێژ خزمەتەكا باش بۆ یانەیێن باژێرێ خوە كرینە لێ نها ب پشتگوه هاتینە هاڤێتن و هاریكاری بۆ وان نینە، هەتا ئەگەر ئەم بەحسا هاتنووچوونا وان بكەین ژ چوونا وان بۆ یاریێن دەرڤە ئەنجامددەن ب مخابنی ڤە پەنایێ دبەنە لایێ هندەك سەرۆك یانەیان كو پاسێن تیمێن خوە بۆ هاریكاری پێ گەشتێ بكەن، ئەركێ هەمی لایەكییە پشتەڤانیا هەلبژارتیێ دێرینێن پارێزگەها دهوكێ بكەن و پشتەڤانی كرن نە بتنێ ل تیمەكێ یە بەلكو رێزگرتنە ل خەبات و دیرووكا وەرزشیا هەمی پارێزگەهێ، ئەگەر ئەم بەحسا كەرتێ تایبەت و بازرگانان بكەین، ب مخابنی ڤە چو هاریكارییەك بۆ تیما دێرینێن هەلبژارتیێ دهوكێ ناهێتە كرن ددەمەكی دا ئەگەر ئەو پشتەڤانیێ لێ بكەن دێ بیتە باشترین ریكلام و رێزگرتن بۆ ناڤێ پارێزگەها دهوكێ، ئەگەر ئەم بهێین بەحسا جەماوەرێ دهوكێ بكەین كو هەردەم ب وەفاداری دهێتە نیاسین كو ئامادەبوونا وان ل یاریێن هەلبژارتیێ دێرینێن پارێزگەها دهوكێ دێ هێزەكا دی دەتە یاریزانان، هێشتا پشتەڤانان باوەری و خوشتڤیاتی مایە و چاڤەرێ سەركەفتنانە، ئەگەر بەحسا خەمخورییا یاریزانێن دێرین بكەین ئەو ئەڤرۆ بێی وەرگرتنا هیچ پارەیەكی بۆ ناڤێ دهوكێ دجەنگن، ژ لایەكێ دووڤە ئەگەر بەحسی چێكرنا كادر و تیمەكا رێكخستی یا دێرینان بكەین دێ بیتە هاریكارەكێ باش بۆ راهێنەرێن ژیێن گەنج دا كو ژ نێزیك مفایی ژ ئەزموونا ڤان ستێران وەربگرن، ئەگەر ژ لایێ بەرپرسێن پارێزگەهێ ڤە پشتەڤانی ل تیما ناڤبری نەهێتە كرن باشە دێ یاریزێن گەنج چ هزر كەن مانە دێ كارتێكرن ل وان ژی بیت كو ئەو دێ هزر كەن ل پاشەروژێ هیچ خزمەتەك بو وان ناهێتە كرن، ئەڤچا بۆ هندێ كو ئاستەكێ باش ژ لایێ تیما دێرینێن پارێزگەها دهوكێ بهێتە پێشكێشكرن فەر و پێدڤییە پشتەڤانی ژ لایێ ماددی و مەعنەوی بهێتە كرن.
