وه‌هبی یونس: ئه‌ردێ شوقێن مامۆستایێن دهۆكێ نه‌مایه
هه‌ولێر، قائید میرۆ
به‌ری هاتنا شه‌ڕێ داعش بڕیاربو پڕۆژێ شوقێن مامۆستایێن دهۆكێ بهێته ده‌ستپێكرن و ب ئه‌گه‌رێ رێگریا ئیدارا دهۆكێ ل به‌لێنده‌رێ پڕۆژه‌ی هه‌تا نوكه‌ژی پڕۆژه نه‌هاتیه بجه ئینان، ئه‌ڤه دده‌مه‌كی دایه هه‌مان پڕۆژه ل هه‌ولێر و سلێمانیێ دوماهی هاتیه سه‌رۆكێ ئێكه‌تیا مامۆستایێن كوردستانێ ل دهۆكێ ئاشكراكر، ئه‌ردێ شوقێن مامۆستایێن نه‌مایه و دبێژیت، بڕیاره ئه‌رده‌كێ دی بده‌نه مامۆستایێن دهۆكێ، به‌لێ دیار نینه دێ كه‌نگی و كیرێ بیت.
وه‌هبی یونس، سه‌رۆكێ لقێ دهۆك یێ ئێكه‌تیا مامۆستایێن كوردستانێ بۆ رۆژناما ئه‌ڤرۆ دیاركر” بابه‌تێ شوقێن مامۆستایێن دهۆكێ هێشتا هه‌لاویستی مایه و به‌رێ سێ پڕۆژه‌یێن ئاكنجیبوونێ بۆ مامۆستا هاتبوونه دابینكرن ئێك بۆ دهۆكێ یێن دیژی بۆ هه‌ولێر و سلێمانیێ، پڕۆژێن هه‌ولێر و سلێمانیێ كه‌فتنه بیاڤێ بجه ئینانێ دا و پڕۆژێ شوقێن مامۆستایێن دهۆكێ مۆهله‌ت نه‌دایێ ئیدارا دهۆكێ، ئه‌وژی ب به‌هانه‌یا ڤێ چه‌ندێ گۆتی ئه‌ڤی به‌لێنده‌ری زۆر پڕۆژه بجه ئیناینه و نه‌یێ سه‌ركه‌فتیه، مخابن حوكمه‌ت نه‌شیا پڕۆژه‌ی ل به‌لێنده‌ری وه‌ر بگریت و نه‌شیا بده‌ته چو كه‌سێن دیژی، دوڤدا شه‌ڕێ داعش بسه‌رداهات و پڕۆژه هه‌تا نوكه هاتیه راگرتن و نه‌هاتیه ئێكلاكرن، هه‌تا نوكه‌ژی ئه‌م وه‌كی لقێ دهۆك و ئێكه‌تیا مامۆستایان یێ بزاڤان دكه‌ین بۆ ئاڤاكرنا پڕۆژێ شوقێن مامۆستایێن دهۆكێ و چو ئه‌نجام نه‌بووینه، هه‌تا به‌ری دو هه‌یڤان باژێڕڤانیا دهۆكێ ئه‌م ئاگه‌هدار كرین، كو ئه‌ردێ شوقێن مامۆستایان نه‌مایه و داینه كه‌سێن دی، ئه‌و ئه‌ردێ بۆ مامۆستایێن دهۆكێ هاتیه دیاركرن 48 دۆنه‌مێن ئه‌ردی بوون ل كڤێلا نێزیك زانكۆیا نه‌ڤرۆز، گوره‌ی ئاخفتنا باژێڕڤانیا دهۆكێ ئه‌ردێ مامۆستا نه‌هاتبوو تاپۆكرن، له‌وڕا نه‌مایه لسه‌ر ئێكه‌تیا مامۆستایان.
وه‌هبی یونس ئاماژه‌كر” پارێزگارێ دهۆكێ سۆزدایه دێ ئه‌رده‌كێ باشتر ده‌ته مامۆستایێن دهۆكێ بۆ ئاڤاكرنا شوقان، هه‌تا دكتۆر محه‌مه‌د شوكری سه‌رۆكێ ده‌سته‌یا وه‌به‌رئینانێ ژی سۆزدایه بۆ بجه ئینانا پڕۆژێ شوقێن مامۆستایێن دهۆكێ و دابینكرنا ئه‌رده‌كێ باشتر، بتایبه‌تی ئه‌رده‌ك ل ده‌ڤه‌را سمێلێ هاتیه دیاركرن، كو زۆر به‌رفره‌هتره ل ئه‌ردێ به‌رێ ل كێڤلا، به‌لێ ئه‌ز نه‌شێم چو سۆزا بده‌مه مامۆستایێن دهۆكێ بۆ ده‌ستپێكرنا پڕۆژه‌ی، چونكه ئه‌ڤه چه‌ندین ساله ئه‌م بزاڤان دكه‌ین و چو ئه‌نجام نه‌بووینه، ژبه‌ركو دیار نینه دێ كه‌نگی ئه‌رد هێته دیاركرن و ده‌ست ب ئاڤاكرنا شوقا هێته‌كرن، هه‌تا ئه‌نجامه‌كێ دروست نه‌بیت ئه‌م نابێژین دێ كه‌نگی و كیرێ ده‌ست ب بجه ئینانا پڕۆژه بهێته‌كرن، دێ مینیت لسه‌ر سۆزێن حوكمه‌تێ داینه ئێكه‌تیا مامۆستایان، ئه‌گه‌ر ئه‌و سۆزێن خوه بجه بینن ئه‌ڤه دێ پڕۆژه هێته بجه ئینان.
