فه‌وزیا سگێری ل جه‌رگێ به‌غدا دا عه‌رشێ دوژمنی دهه‌ژاند
دیدار، ســــــــــــالار دۆسكی:
خانم (فه‌وزیا حه‌مدی حه‌سه‌ن سگێری) خویشكا هه‌ر دو شه‌هیدان( عه‌بدوالرحمان و عصمه‌ت سگێری) ژ دایك بوویا سالا 1960ێ یه ل گوندێ سگێرێ، دایكا چار كور و كچه‌كێ یه، ل سالا 1978 كه‌فتیه زیندانَن رژێما به‌عس و پشتی ژیانه‌كا پری ئه‌شكه‌نجه‌دان و نه‌خوشی ل سالا 1979 هاتیه ئازادكرن، خانم فه‌وزیا كرێداره و گه‌له‌ك نه‌خوشی بۆ دروست بووینه، بتنێ خواستا وێ ئه‌وه ملله‌تێ كورد بگه‌هیته هه‌می ئارمانجێن خوه و ب سه‌ركه‌ڤیت.
خانم فه‌وزیا سگێری، بۆ رۆژناما ئه‌ڤرۆ به‌حسێ چیرۆكا خوه ل زیندانێ دكه‌ت و گۆت: پشتی سالا 1975ێ برایێ من شه‌هید (عه‌بدوالرحمان) چوو ئیرانێ و ڤه‌گه‌ریا كوردستانێ وی ده‌می مالا مه ل گوندێ سگێرێ بوو، برایێ من خواست بچیته به‌غدا ب بهانا كاركرنێ و به‌لكو بچیت به‌رده‌وامیێ بده‌ته خه‌بات و رێبازا كوردینیێ د جه‌رگێ دوژمنی دا و پشتی ماوه‌كی ل مالا خاله‌تا من ژیایی و كاركر و هه‌تا ئاسته‌كێ باش فێری زمانێ عه‌ره‌بی بوو، زڤری مال و ژ بابێ من خواست مالا مه هه‌می بچیته به‌غدا ، برایێ من عصمه‌ت ل گه‌ل خێزانا خوه و ل گه‌ل من ب هه‌ڤرا ل گه‌ل شه‌هید عه‌بدوالرحمان چووینه به‌غدا وی ده‌می برایێ من دو زارۆك هه‌بوون كچه‌ك و كوره‌ك ، كچا وی یا بچیك بوو و هنده‌ك په‌ز مه هه‌بوو مه فرۆت و ب وی پاره‌ی چووین و مه ژووره‌ك ل خانیه‌كی دا بكرێ گرت ئه‌م چار مال وی خانی ڤه بووین، ژ به‌ر نه شاره‌زایا مه كچا برایێ من یا زارۆك ب رێكێ ڤه گیانێ خوه ژ ده‌ست دا و پشتی ماوه‌كی برایێ منێ خودان خێزان ڤه‌گه‌ریا گوندی ڤه و ئه‌ز و برایێ خوه بتنێ ماین و ئێدی وی بوومن به‌حسێ كوردینیێ دكر و گۆت: ملله‌تێ مه یێ بن ده‌سته و دڤێت ئه‌م خه‌باتێ بكه‌ین وی ده‌می گه‌له‌ك باوه‌ری ب من دهات.
فه‌وزی یا سگێری زێده‌تر گۆت: به‌رده‌وام برایێ من چوو گه‌راج شیمال ل به‌غدا و هه‌كه كورد دیتبانه دئینانا مالا مه و گه‌له‌ك قه‌درێ وان دگریت.
زیندانی یا سیاسی ئه‌و ژی گۆت: برایێ من به‌رده‌وام په‌یوه‌ندی ل گه‌ل (قیادا موقت) هه‌بوون، جاره‌كێ TNT ئینانه مالا خیشكا من ل ئامێدیێ و پشتا من ڤه گرێدان و من گه‌هاندنه به‌غدا و من نه‌زانی هه‌ر چیه، جاره‌كا دی دیسا هه‌ر TNT ئینا و برایێ من گۆت ئه‌ڤجاره گه‌له‌ك بزحمه‌تره و دڤێت ده‌رباز بكه‌ین و ب لافافا پان شیام هه‌میێ ب هه‌لگرم و جارا ئێكێ من نه‌زانی چیه، به‌لێ بۆ ڤێ جارێ نیشامن دا و هه‌ر ده‌م شیره‌ت ل من دكرن كو هه‌ر كه‌سه‌كێ پرسیارا من بكه‌ت چ راستیێ بۆ نه‌بێژم و چه‌ند جاران زه‌لام دهاتن و پرسیارا وی دكر و جیرانا دگۆت ئه‌ڤه بۆ پرسیارا وی دكه‌ن من دگۆتێ خوارنگه‌هه‌ك ڤه‌كریه و خه‌لك پرسیارا وی ژ من دكه‌ت، ل به‌غدا مه دو جاران مالا خوه ڤه‌گوهاست و ل گه‌ل ڤه‌گوهاستنا ئه‌ڤان كه‌ل و په‌لان به‌لاڤوك ژ ی ل گه‌ل هه‌بوون و من هاریكاریا برایێ خوه دكر بۆ ڤه‌گوهاستنه به‌غدا.
فه‌وزیا سگێری ئه‌و ژی گۆت: وی ده‌می جلكێن سورانی من دكرنێ و هه‌رده‌م برایێ من شیره‌ت ل من دكرن كو جلگێن سورانی بكه‌مێ و ب ستاره‌تربوون، ئه‌و كه‌ل و په‌لێن من ڤه‌دگوهاستن ئه‌وی به‌لافدكرن و دگۆت ئه‌م كوردین و ناترسین رۆژه‌كێ خودێ داینه و دێ رۆژه‌كێ مرین و ئه‌و به‌لاڤووك ل به‌غدا هه‌لاویستن و گه‌له‌ك جاران ژی دچوو سه‌ردانێن زیندانیان و ئه‌و به‌لاڤووك و نامه دگه‌هاندن.
ناڤبری گوت: برایێ من شه‌هید (عه‌بدوالرحامن) گۆت دێ بخوه ماتوره‌كی كرم و هه‌كه ئاشكرابووم دێ شێم خوه قورتال كه‌م و هه‌كه تۆ گرتی دانپیدانێ نه‌كه‌ی و هه‌ر مرنه و هه‌كه نه‌شیام خوه قورتال بكه‌م دێ خوه كوژم و ده‌مێ مالا مه چوویه تاخێ (حی عامر) (3) كریارێن وی من ئاگه‌ه ژێ هه‌بوو وی گۆت بوونه من و ی پتر په‌قاند بوون و هه‌رده‌م دگۆت هه‌می بزاڤا دێ كه‌م ل به‌ر (صدام و احمد حسن بكر) ڤه‌ده‌م و نه‌هێلم.
هێشتا گۆت: هه‌رده‌م ده‌مێ مێهڤان بوومه دهاتن وی دگۆت ل ژوور نه‌میننه و ده‌ركه‌ڤه و هه‌كه تشته‌كی بینی ژی ل به‌رده‌رگه‌هی گازی من بكه و نه‌هیه ژوور و ئه‌و كه‌سێن هاریكار ل گه‌ل وی دكریاران دا من نه‌زانین كینه بتنێ وی دزانین، چوونا من بۆ به‌غدا ل گه‌ل وی بتنێ بۆ هاریكاریا كریارێن وی بوو هه‌كه من چ مال و تشت نه‌زانین وی ده‌می گه‌له‌ك یا بچیك بووم، برایێ من په‌یوه‌ندی راسته‌وخۆ ل گه‌ل (جه‌هوه‌ر نامق، فه‌له‌كدین كاكه‌ی، زه‌عیم عه‌لی، فوئاد میرانی) هه‌بوون و ده‌مێ ژ به‌غدا ڤه‌دگریاینه گوندی برایێ من به‌رده‌وام په‌یوه‌ندی ل گه‌ل ئه‌ڤان كه‌سایه‌تی یا هه‌بوو و چوو ناف به‌راوری یا ل گه‌ل پێشمه‌رگه‌ی و تشت دگه‌هاندنێ و هه‌مان ده‌م تشت ژ ده‌ف وانژی وه‌ردگرت و مه ل ه‌ل خوه دبره به‌غدا…
هه‌مان زیندانی یا سیاسی به‌حسێ رۆژا گرتنا خوه كر و گۆت: رۆژه‌كێ برایێ من خواست ل گه‌ل جیرانێن مه ئه‌وێن ل گه‌ل مه دخانی دا دژین بچینه بازاری و ده‌مێ چوویم ڤه‌گه‌ریام هێشتا نێزیكی مال نه‌بوویم ل نێزیك (باغچێن زه‌ورا) هێزێن ئه‌منی هه‌می تاخ گرت بوو و گه‌له‌ك قه‌ره‌بالغ بوو و ده‌مێ من ئه‌ڤه دیتی پشتا من ژ كه‌ست و گه‌له‌ك یا چاڤ ترسیای بووم وێ جارێ هێزێن ئه‌منێ هاتنه پاصێ دا و داخازا ناسناماكر و زانین ئه‌م خودانێن مالێ نه و رێك دامه بچینه مال و به‌رده‌رگه‌ه پرسیار ژ مه كر و ئه‌وا جیرانێن مه ژن و مێربوون خوه دیاركرن و گۆته من تو كی من گۆت ئه‌ڤه مالا منه و ئه‌وا گۆت چ یا عبدوالرحمانی من گۆتێ برایێ منه هه‌ر ئێكسه‌ر چاڤێن من گرێدان و ده‌ستێن من كه‌لامچه‌كرن و هاڤێتمه ترۆمبێلێ دا، برایێ من حه‌سیابوون و برایێ من خوه راده‌ست نه‌كربوو و هه‌ر ئێكسه‌ر خوه كوشت بوو، پشتی گرتین ئێكسه‌ر برینه ئه‌منا عام و جورێن قوتانێ و ئه‌شكه‌نجه‌دانێ و ترس و برسێ من دیتن و هه‌ر كه‌سه‌كێ بگه‌هیته مالا مه مرۆڤێن مه ل هه‌ر جهه‌كێ عیراقێ هه‌بیت هه‌می ئه‌منێ گرتن و ئه‌شكه‌نجه‌دان و خوه هه‌كه كه‌سه‌كی جاره‌كێ ژی سه‌ره‌دانا مالا مه كربیت هاته گرتن و هنده‌ك ناڤ ژی ل گه‌ل برایێ من هاتنه دیتن و ئێكسه‌ر ده‌ست ب گرتنا وان هاته‌كرن و گه‌له‌ك كاغه‌ز ل مالا مه هاتنه دیتن.
فه‌وزیا سگێری ئه‌و ژی گۆت: هه‌ر ده‌مێ دهاتن پێزانین ژ من وه‌رگرتن دا بێژن عه‌بدوالرحمان ئه‌ڤ تشته گۆتینه و چ جاران نه گۆت هاتیه شه‌هیدكرن یان كوشتن و من ژی چ جارا پێزانین ل سه‌ر برایێ خوه نه دگۆتنێ وپاش برمه (محكمه پوره) ل گه‌ل چار كه‌سان كو زه‌لام بوون چوومه دادگه‌هێ و هه‌ر چاران سزایێ سێدارێ ل سه‌ردانا، ئه‌م دو ژی سزایێ هه‌تا هه‌تایێ ل سه‌ر مه هاته سه‌پاندن چونكه ژیێ من 17 سال بوو هه‌كه دا ئه‌ژی هێمه سێداره‌دان ، چونكه من عه‌ره‌بی نه‌زانی من نه‌زانی كو سزایێ من هه‌تا هه‌تایێ یه و هه‌تا زڤریمه زیندانا ژنان ل به‌غدا و په‌نجه مورێن من هاتنه‌وه‌رگرتن و پشتی بریمه زیندانێ برمه ژووره‌كێ ڤه سێ ته‌خت تێڤه بوون و سێ ژنێن سورا تێڤه‌بوون و دو ژوان كچه‌ك و دایكه‌ك بوو ئه‌و ژی سه‌را دوزا ملله‌تێ كورد هاتبوونه زێدانكرن.
زیندانی یا سیاسی فه‌وزیا حمدی سگێری زێده‌تر گۆت: ل یزندانێ بتنێ به‌تنیه‌كا عه‌سكه‌ری ل بن من بوو و من خوارن نه‌خوار رۆژه‌كێ برایێ شه‌هید(عسمه‌ت) ئینا ده‌رێ زیندانێ وی گازی من كر و ژمن خواست خوارنێ بخوه‌م و هه‌ر من خوارن نه‌خوار و من گۆت هه‌تا (عه‌بدوالرحمان) نه‌بینم خوارنێ ناخوه‌م و چاڤێت من گرێدان و برمه مالا مه ل (حی عامری) و من دیت هه‌می هاتیه تێكدان و خوین ب دیوارن ڤه بوو و گۆت ئه‌ڤه خوینا برایێ ته‌یه و من گۆت هه‌وه دگۆت یێ ساخه گۆت نه‌یێ ساخه و هه‌ر وه‌رگێری دگۆت بلا مه‌لا مسته‌فا بهێت چاره‌كێ بۆ هه‌وه بینت بۆچی ناهێت و هه‌ر ئێكسه‌ر دل گرتی وبووم وده‌مه‌كی هشیار بووم ل نه‌خوشخانێ بووم و دووڤ دا برمه نه‌خوشخانا داد و برمه جهێ جه‌نازا و برمه سه‌ر جه‌نازێ برایێ من و گه‌له‌ك وه‌رم بوو و گۆتن ئه‌ڤه یه و من گۆتێ نه‌خێر پشتی من سحكریه پرچا وی من نیشانا پرچا وی دیت و من زانی ئه‌وه ئێكسه‌ر كه‌فتمه ڤه و دل گرتی بووم و هه‌ر ئێكسه‌ر گۆت كا مه‌لا مسته‌فا بارزانی بۆ ته‌وه‌را هه‌وه ناهێت بۆچی هنده دێ خشیم بن.
خانم فه‌وزیا گۆتژی: پشتی برینه زیندانێ ناڤێ من كربوو (ام قنبله) وه‌ك تیرۆرستان ل زیندانێ ته‌ماشه‌ی من دهاته‌كرن و بتنێ ئه‌ز ل گه‌ل ئه‌وان ژنێن كوردێن خه‌لكێ سلێمانیێ و كه‌ركووكێ بووم و هه‌ر چ كاره‌كێ بزحمه‌ت هه‌با ب مه‌دكر و گه‌له‌ك پاشڤه دبرین و ئاخفتن به‌رده‌وام دگۆتنه مه و خوارنا مه گه‌له‌ك یا كێم بوو.
خانم فه‌وزیا گۆت: جاره‌كێ بابێ من و زه‌لامێ مه‌تا من سه‌ره‌دانا زیندانێ كر و هاتنه ده‌ف من و چه‌ند جاران هاتنه ده‌ف مه و پشتی ئه‌حمه‌د حه‌سه‌ن به‌كر ژ ده‌ستهه‌لاتێ هاتیه لادان و سه‌دام حسێن هاتیه سه‌ر ده‌ست هه‌لاتێ، لێبورینه‌كا گشتی دا بۆ هه‌می خه‌لكێ كوردستانێ كو بهێنه ئازادكرن و ئه ژی هاتمه ئازادكرن.
هێشتا گۆت: ژ به‌ر نه‌خوشیێن خوه كو پشتا من و پێت من هه‌می نه‌درستن و هه‌كه من دڤیا به‌رده‌وامیێ بده‌مه خه‌باتا خوه و ماندیبوونه‌كا مه‌زن مه بریه یا سه‌ربلندم و نه‌یا په‌شێمانم .
