ڤه‌كۆله‌ره‌كێ ده‌روونی: ده‌روونێ ساخله‌م ژێده‌رێ ژیانه‌كا ئارامه
ئه‌ڤرۆ ، زنار تۆڤی:
ساخله‌میا ده‌روونی گرنگترین ساخله‌ته ل ده‌ف مرۆڤی، هه‌كه مرۆڤی چه‌ند نه‌خۆشی و كێماسی یێن له‌شی هه‌بن، ب تنێ ده‌روونێ مرۆڤی یێ ئارام بیت، دێ شێت سه‌ره‌ده‌رییێ ل گه‌ل ژیانێ كه‌ت و ل گه‌ل كه‌سانێن ده‌وروبه‌ر خوه گونجینیت، چونكی ساخله‌مییا باش رێكێن ژیانێ لبه‌ر مرۆڤی ب ساناهی دكه‌ت، هه‌روه‌سا ده‌روونێ ئالۆز ژی ژیانێ لبه‌ر مرۆڤی ره‌ش دكه‌ت و ناهێلیت مرۆڤ بگه‌هیته ئارمانجا خوه و ژیانا خوه برێڤه ببه‌ت.
ڤه‌كۆله‌رێ ده‌روونی نه‌جمه‌دین زێباری، بۆ ئه‌ڤرۆ دیار كر كو بلا ژلایێ مه ڤه تشته‌كێ سه‌یر نه‌بیت، ده‌مێ ئه‌م دبینین هژماره‌كا زۆر یا خه‌لكی قه‌ستا نه‌خۆشخانان دكه‌ن ژ بۆ چاره‌سه‌ریا نه‌خۆشیا خوه و گۆت: (هه‌كه ئه‌م به‌رێ خوه بده‌ینێ وان كه‌سان هه‌موویان نه‌خۆشیا له‌شی نینه، لێ گه‌له‌ك ژ وان كه‌سان ده‌روونێ وان یێ دروست نینه و دناڤ ژیانه‌كا ئالۆز دا دژین).
نه‌جمه‌دین ئه‌و چه‌نده ژی دیار كر كو ده‌روونناسی هه‌ر ژ ده‌ستپێكا په‌یدابوونا زانستی هه‌بوویه و ل سه‌ر ده‌ستێ گه‌له‌ك زانایان هاتیه شرۆڤه كرن، وه‌كی (فروید)، ل ده‌ستپێكێ فروید نۆشدار بوو، نه‌ك ده‌روونناس، به‌لێ ده‌مێ دیتی هنده‌ك كه‌سان شیانێن هاتنوچوونێ نینن، دبێ ده‌ست و پێنه، بۆ وی وه‌سا دیار بوو، كو وان كه‌سان نه‌خۆشیا ده‌روونی هه‌یه، پشتی هینگێ رابوو بنگه‌هه‌كێ ده‌روونی دانا بۆ شرۆڤه‌كرنا ئاریشێن ده‌روونی، هه‌موو شیانێن خوه ل سه‌ر لایه‌نێ ده‌روونی مه‌زاختن و بزاڤ كر ئارامییێ دناڤ ملله‌تێ خوه دا به‌لاڤ بكه‌ت و گۆت: (دڤێت ئه‌م ژی بزاڤێ بكه‌ین ده‌روونێ خوه ئارام بكه‌ین، چونكی چو ژ هندێ نه‌خۆشتر نینه، هه‌موو ده‌مان مرۆڤ یێ دودل بیت، یان یێ گرتی بیت و په‌یوه‌ندیێن جڤاكی لده‌ف مرۆڤی د لاواز بن، ئه‌و دودلییه دێ بارێ مرۆڤی یێ ده‌روونی تێك ده‌ت و دێ مرۆڤ تووشی ئاریشان بیت).
ڤه‌كۆله‌رێ ده‌روونی گۆتژی: (هه‌كه ئه‌م به‌رێ خوه بده‌ینه وان سه‌رژمێریاریێن ڤێ دووماهییێ یێن رێكخراوێن ساخله‌مییا جیهانی ل سه‌ر ساخله‌مییا ده‌روونی ئه‌نجامداین، دێ دیا ربیت كو ئه‌و كه‌سێن دمرن هه‌موو ئه‌و نینن، یێن كو ژبه‌ر ئێشێن گران گیانێ خوه ژ ده‌ست داین، گه‌له‌ك ژ وان ئه‌ون یێن كو ب ده‌ستێ خوه خوه دكوژن، وان كه‌سان په‌یوه‌ندییا هه‌یی ب ئالۆزیا ده‌روونیڤه و تێكچوونێن ژینگه‌هی و جڤاكی و ئایینی و سیاسی و ئابووری ڤه).
نه‌جمه‌دین ئاشكرا كر كو ژبۆ چاره‌سه‌ركرنا ڤی بابه‌تی، پێدڤییه مرۆڤ ئاریشا لده‌ف خوه نه‌هێلیت و هه‌موویان ب رێكێن زانستی چاره‌سه‌ر بكه‌ت و په‌یوه‌ندیێن جڤاكی ب هێز بێخیت، رێزێ ل كه‌سێ هه‌مبه‌ری خوه بگریت پتر ژ خوه و گۆت: (هه‌كه ته بڤێت ده‌روونێ ته یێ ئارام بیت، چو جاران یاریا و ترانا ب خه‌لكی نه‌كه، چونكی یاری و ترانه كرن دێ كارتیكرنێ ل بارێ ده‌روونی یێ كه‌سێ به‌رامبه‌ر كه‌ت، پێدڤییه مرۆڤ د هه‌موو بریارێن جڤاكی دا پشكدار بیت).
ژلایه‌كێ دیڤه ڤه‌كۆله‌ری گۆت: (دیسان دڤێت هه‌موو ده‌مان مرۆڤی باوه‌ری ب خوه هه‌بیت، بلا به‌رسڤا مرۆڤی بۆ هه‌موو كه‌سان وه‌كو ئێك نه‌بیت، هه‌روه‌سا چو جاران نه‌هێله كه‌سێ به‌رامبه‌ری ته هه‌ست ب كیماسیێن ته بكه‌ت، هه‌ست كرن ب كێماسیان پتر ده‌روونێ مرۆڤی ئالۆز دكه‌ت، یا گرنگه مرۆڤی هه‌رده‌م به‌رنامه و پرۆگرامێن رۆژانه هه‌بن، ئه‌ڤ چه‌نده دێ پتر ده‌روونێ مرۆڤی ئارام كه‌ت).
