به‌لاڤكرنا تێكستێن ئه‌ده‌بی یێن بێ ناڤ د تۆڕێن جڤاكی دا
دلۆڤان هالۆ / زاخۆ
ڕۆژانه د تۆڕێن جڤاكی دا ب سه‌ده‌هان تێكستێن ئه‌ده‌بی دهێنه به‌لاڤكرن، زۆربه‌یا وان تێكستان ژی یێن نڤیسه‌رێن بیانی نه. بێ گۆمان ئه‌ڤ چه‌نده گه‌له‌ك باشتره ژ به‌لاڤكرنا تشتێن بێ مفا، چونكه گه‌له‌ك جاران خواندنا تێكسته‌كێ هزرا مرۆڤی ده‌رباره‌ی بابه‌ته‌كێ دیار كری د گۆهۆڕیت، یان ژی دبیته زانیاریه‌ك كو مرۆڤ ل داهاتی مفایی ژێ وه‌رگریت. یان ژی هه‌ر چ نه‌بیت مرۆڤ چێژه‌كا ئه‌ده‌بی ژ خواندنا وان تێكستان وه‌ردگریت.
لێ یا جهێ مخابنیێ ئه‌وه كو زۆربه‌یا وان تێكستان یێن نڤیسه‌رێن بیانی نه، ئانكو تێكستێن نڤیسه‌رێن كورد گه‌له‌ك كێم د تۆڕێن جڤاكی دا دهێنه به‌لاڤكرن. ئه‌وێن به‌لاڤ ژی دبن ئاماژه ب ناڤێ نڤیسه‌رێ تێكستێ ناهێته دان. پسیار ل ڤێرێ ئه‌وه كو بۆچی ده‌مێ كه‌سه‌ك تێكسته‌كا بیانی به‌لاڤ دكه‌ت ب شانازی ڤه ئاماژه‌یێ ب ناڤێ نڤیسه‌ری دكه‌ت .؟! لێ ده‌مێ كه‌سه‌ك تێكسته‌كا نڤیسه‌ره‌كێ كورد به‌لاڤ دكه‌ت، ئاماژه‌یێ ب ناڤێ نڤیسه‌ری ناكه‌ت. ؟! یان ژی ل شوینا ناڤێ نڤیسه‌ری دێ نڤیسیت ئه‌ڤ تێكسته ڤه‌گۆهاستیه ئانكو یا ژ په‌رتووكا وی یان ژ فێسبۆك یان ژ ئێنستگرامێ نڤیسه‌ری وه‌رگرتی لێ ناڤێ وی نه نڤیسییه. ئه‌رێ ماده‌م ئه‌و تێكسته ب دلێ وی كه‌سی بوو و ل ئاستێ به‌لاڤكرنێ دیت، بۆچی ئاماژێ ب ناڤێ نڤیسه‌ری ناده‌ت. ؟!
یا ژ ڤێ كه‌مباختر ژی ئه‌وه ل ده‌مێ كو تێكستێن نڤیسه‌رێن كورد ب ناڤێ نڤیسه‌رێن بیانی دهێنه به‌لاڤكرن. من گه‌له‌ك جاران هنده‌ك تێكست یێن دیتین كو ب ناڤێ نڤیسه‌رێن بیانی هاتینه به‌لاڤكرن، لێ د بنیات دا ئه‌و تێكسته یێن نڤیسه‌رێن كوردن. له‌وما پێدڤیه كا چاوا ئه‌م گرنگیێ ب تێكستێن بیانی د ده‌ین، ئها وه‌سا گرنگیێ ب تێكستێن نڤیسه‌رێن خۆ یێن كورد ژی بده‌ین، چونكی به‌رهه‌مێ نڤیسه‌رێن مه نه كێم تره ژ به‌رهه‌مێن بیانی. به‌لكو ئاستێ هنده‌ك ژ به‌رهه‌مێن نڤیسه‌رێن مه گه‌له‌ك بلند تره ژ به‌رهه‌مێن نڤیسه‌رێن بیانی.
