ئایفون یا خوه به‌رهه‌ڤ دكه‌ت دا USB-C بكاربینیت
ئه‌ڤرۆ:
ب گۆره‌یی راپۆرته‌كا رۆژنامه‌ڤانێ شاره‌زایێ ته‌كنولۆژیایێ ل مالپه‌رێ بلمبێرگ یێ ناڤدار، كۆمپانیا ئه‌پل یا نێزیك بوو بۆ گوهۆڕینا وایرا بارگه‌كرنێ ژ Lightning بۆ USB-C.
ژێده‌ره‌كی د ڤێ راپۆرتێ دا دیاركریه كو ئه‌و USB-C یێ دێ بۆ ئایفۆنێ هێته دروستكرن دێ ب سیسته‌مه‌كێ وه‌سان ژی هێته چێكرن كو پشته‌ڤانیا سیسته‌مێ كه‌ڤن ژی بكه‌ت.
ئه‌ڤی مالپه‌ری دایه دیاركرن ژی كو هه‌كه كۆمپانیا ئه‌پل چه‌ند له‌زێ د ڤی بابه‌تی دا بكه‌ت ژی ب زووترین ده‌م به‌رهه‌ڤ بكه‌ت دێ چیته 2023ێ و ئه‌ڤه ژی هه‌ر ئه‌و مێژوویه یا Ming-Chi Kuo پێشبینی كری.
ب ڤێ چه‌ندێ ژی دیار دبیت كو بۆ ئایفۆن 14 ژی دێ هه‌ر شێوازێ Lightning یێ كه‌ڤن هێته بكارئینان و پێشینا USB 3.0 و پاشان ل 2023ێ USB-C د ئایفۆن 15ێ دا هێته بكارئینان.
گوهۆڕینا ڤی شێوازێ LightningبۆUSB-C یێ بارگه‌كرنێ بۆ دو ئه‌گه‌ران د ڤه‌گه‌ریت؛ یا ئێكێ ئه‌وه كو پێگریێ ب رێنمایێن ئورۆپی بكه‌ت ئه‌وا پشت به‌ستنێ ل سه‌ر وێ چه‌ندێ دكه‌ت كو پێدڤیه هه‌موو مۆبایلێن زیره‌ك و ئامیرێن دژی ب ئێك جورێ وایرێ بهێنه بارگه‌كرن، ژ لایه‌كێ دژی ڤه بۆچوونا ئێكگرتنا ئایفۆنێ ل گه‌ل ئایپاد و ماك ئه‌وێن دێ ئه‌و ژی پشت به‌ستنێ ل سه‌ر USB-C كه‌ن.
بكارئینانا وایرا USB-C بۆ ئامیرێن ئایفۆن دێ مفا بۆ بكارئینه‌رێن وێ ب خوه ژی تێدا هه‌بیت، هه‌ر ژ بۆ دابینكرنا بارگێ ب ره‌نگه‌كێ ب له‌زتر ژ سیسته‌مێ نها یێ ئایفۆنێ. دیسا بكارئینه‌رێن ئایفۆنێ نه‌چار ژی نابن هه‌ر جهه‌كێ بچنێ وایرا بارگه‌كرنێ ب دووڤ خوه ڤه بینن و ببه‌ن، دشیان دایه هه‌مان ویرا بارگه‌كرنێ یا سامسونگێ بكاربینن. ئه‌ڤه ژ لایه‌كێ دژی ڤه دێ بیته ئه‌گه‌ر بۆ كێمبوونا گلێشێ ئه‌لكترۆنی.