دهۆك دێ قارهمانیا كیك بۆكسینگا ئیراقێ مێڤان كهت
ئهڤرۆ،
د داخویانیهكێ دا سهرۆكێ ئێكهتیا كیك بۆكسینگا پارێزگهها دهۆكێ دیاركر بڕیاره ل دهستپێكا ههیڤا بهێت پارێزگهها دهۆكێ مێڤانداریا قارهمانیا كیك بۆكسینگا ئیراقێ سهر ئاستێ یانێن وهرزشی بۆ پێشكهفتیان ئهوا دێ بۆ دو سیستهمێن جودا هێنه كرن ژبۆ ژێگرتنا باشترین یاریزانان بۆ ناڤ رێزێن ههلبژارتیێ ئیراقێ دا.
زێدهتر مهحفوز ئیبراهیم بۆ رۆژناما ئهڤرۆ گۆت:بڕیاره ل چار بۆ حهفتێ ههیڤا بهێت ههڤڕكیێن قارهمانیا كیك بۆكسینگێ ل سهر ئاستێ پێشكهفتیان پارێزگهها دهۆكێ مێڤانداریا وێ بكهت ئهوا دهێته چاڤهڕێ كرن پرانیا یانێن باشۆر، ناڤهراست و چهند یانه ژ ههرێما كوردستانێ پشكداریێ بكهن كو دێ لدووڤ سیستهمێ فۆل كۆنتاك و كهی وهن و یێ جیهانی بهێنه ئهنجامدان و ههڤڕكیێن وان دێ بۆ 12 كێشان بیت ههر ژ كێشا 51كگم ههتا دگههیته +91كگم ئهوێن ژلایێ دووڤ ستاندرێن ئێكهتیا نێڤدهولهتی ڤه هاتینه دهستنیشانكرن ژبۆ ئهنجامدانا یاریان.
ههروهسان ناڤهاتی ئهوچهنده ژی دیاركر ل پارێزگههێ ههتا چار یانه بهرههڤن بۆ پشكداریێ ئهوژی دهۆك، زاخۆ، شێخان، تهناهی و ئامێدیێ كو ههر یانهكێ چهند یاریزانهكێ باش ههنه و گۆت: بۆ مێڤانداریا قارهمانیێ ب ههڤكاری ل گهل نوونهراتیا دهۆك یا لژنا ئۆلمپی و پارێزگهها دهۆكێ ههر تشتهكێ پێدڤی دێ هێته بهرههڤكرن ژ هۆل، كهلۆپهلێن ئهنجامدانا قارهمانیێ و ههتا دووماهیێ پێخهمهت پشكداریهكا سهرفهراز بیت و سهركهفتی بیت و ب هیڤی نه یانێن مه یێن پارێزگههێ بشێن رێزێن ئێكێ ب دهستخوهڤهبین ژبۆ دهبازبوون بۆ قۆناغا دویێ یا ههڤڕكیێ ل گهل یاریزانێن ههلبژارتیێ ئیراقێ و بشێن دڤێ قارهمانیێ ژی پلێتا دناڤ رێزێن ههلبژارتیێ ئیراقێ ب دهستخوهڤه بینن.
