ئه‌گه‌رێن سه‌ره‌كیێن ناكۆكیێنPdk ، pkk
پارتی دیمۆكراتی كوردستان و پارتیا كرێكارێن كوردستانێ كو دو لایه‌نێن گرنك و هه‌ره سه‌ره‌كیێن گۆره‌پانا سیاسیا كوردستانێ نه كو ژ لایێ ئه‌ڤ دو پارته ژ لایێ هزری و ئایدولۆژی ڤه كه‌له‌ك ژ هه‌ڤ دو جودانه پارتی زێده‌تر خوه ب پارته‌كا نه‌ته‌وه‌یی وجه‌ماوه‌ری دده‌ته نیاسین و په‌كه‌كه ژی زێده‌تر خوه ب پارته‌كا هزری و ئایدولۆژی و د ناڤ دا ژی خه‌باتێ ژ بۆ ده‌ستكه‌فتیێن نه‌ته‌وه‌یی دكه‌تن، دیرۆك و خه‌بات و به‌رخودانا پارتی زێده‌تر ل باشۆر خوه‌یا دبیت لێ یا په‌كه‌كێ زێده‌تر ل باكۆر و د پشترا ل هه‌ر چارپارچێن دی پارتیێن خوه یێن جودا پێكئیناینه مینا ل باشۆر pjdk ـه و ل رۆژهه‌لات pjak و ل رۆژئاڤا ypk و سه‌ره‌رای كو ناكۆكیێن ڤان هه‌ردو پارتان ره‌ه و رووشالێن خوه یێن كه‌ڤن هه‌نه هه‌ر ل ده‌ستپێكا سالا 1984 و هێرڤه هه‌تا كو ل سالا 1993 چه‌ندین جاران شه‌ر و ناكۆیان ده‌ستپێكری هه‌تا گه‌هشتی یه وی راده‌ی كو ل سالا 1993 شه‌ره‌كێ دژوار و خویناوی كو ب شه‌ڕێ براكوژی و شه‌ڕێ خوه‌كۆژی دهاته ناڤكرن ده‌ست پێ كر و ئه‌ڤ شه‌ڕه یێ به‌رده‌وام بوو هه‌تا دووماهیا سالا 1998 كو هه‌تا وی ده‌می سه‌رۆكێ پارتا كرێكارا عه‌بدولا ئۆجه‌لان pkk یێ ئاماده‌بوو و نه‌هات بوو ده‌سته‌سه‌ركرن و رۆله‌كێ گرنك هه‌بوو د بریار و كۆنترۆلكرنا وێ پارتێ دا كو زۆر جاران ئۆجه‌لان ب كه‌سه‌كێ تاكره‌و یانژی بێژین گۆتنا وی ئێكسه‌ر دبوو كریار و هه‌كه كه‌سه‌كی ب ئاشكرایی ره‌خنه ل هزر و بیرو باوه‌رێن وی یان بریارێن وی گرتبا دبیت ژیانا وی كه‌تبا د مه‌ترسیێ د ناڤ په‌كه‌كێ دا ب خاین و خوه فرۆش و نه‌زان دهاته بناڤكرن، هه‌روه‌ك د پرتووكا دیرۆكا pkkدا یا ژ نڤیسینا رۆژنامه‌ڤان و نڤیسه‌را ئه‌مریكی ئه‌لیزا ماركۆس دا هاتی كو چه‌ندین سه‌ركردێن وێ پارتی مینا ساری باران و سه‌میر و شه‌مدین ئه‌ڤ دانپێدانه كریه، لێ پشتی ل شواتا سالا 1999 ئۆجه‌لان د ئۆپه‌راسیۆنه‌كێ دا هاتی یه ده‌سته‌سه‌ركرن ل وه‌لاتێ كینیا كو pkkڤێ ئوپه‌راسیۆنێ ب كوده‌تایه‌كا توركی و ئه‌مریكی و ئیسرائیلی ب ناڤ دكه‌ن! ب هه‌ر حال پشتی ده‌سته‌سه‌ركرنا ئوجه‌لان ئێدی سیاسه‌ت و ته‌كتیك و ره‌فتارێن ڤێ پارتێ چوونه د قووناغه‌كا دی دا ژبلی كو ژ لایێ هزری و ئایدولۆژی ڤه هه‌ر مانه ل سه‌ر هه‌مان رێباز كو ب رێبازا هزر و رامان و ئایدلۆژیا ئۆجه‌لان ب ناڤ دكه‌ن، لێ ژ لایێ چه‌كداری و سیاسی ڤه ئێدی ئه‌ڤ پارته كه‌ته د قووناغه‌كا نازك و هه‌ستیار دا كو ژ لایه‌كی ڤه ل ناڤخوه‌یا توركیا ئێدی پالپشتی یا جه‌ماوه‌ری وه‌ك جاران نه‌ما و رۆسیا و سووریا ژی كو ب پالپشتێن سه‌ره‌كیێن هزرا pkkدهێنه نیاسین ئێدی وان ژی ب وێ هێز و رۆلێ جاران پالپشتی نه‌كرن، ئه‌وا ژ هه‌میان گرنكتر ئه‌وه ده‌ستپێكرنا پرۆسا ئاشتیێ یه ئه‌وا ده‌وله‌تا توركیا و ئۆجه‌لان و ب هاریكاریا هێزێن سه‌ره‌كیێن هه‌رێما كوردستانێ و ب تایبه‌تی ژی پارتی دیمۆكراتی كوردستانێ ده‌ست پێ كری ب ناڤێ چاره‌سه‌ركرنا پرسا كوردی و چه‌ك دانانا pkkد ڤی ده‌می ژی دا دیسا ئه‌ڤ پارته كه‌ته د قووناغه‌كا دی دا و یا ژ هه‌میان ژی نه‌خۆشتر ژی بۆ ڤێ پارتێ ئه‌وه كو ژبلی pkkنها گه‌له‌ك كه‌س و لایه‌ن و پارتێن سیاسی بووینه خودانێ ڤێ پرۆسێ كو ب راستی ژی ب ئه‌ڤێ چه‌ندێ ژی دیسا pkk تۆره‌بوویه كو ب دیتنا وان ژ سه‌نگ و پێگه‌یێ وێ هاتیه كێمكرن ئه‌ڤه د ده‌مه‌كی دا یه كو ئه‌و ب تنێ خودانێن ڤێ پرۆسێ بوون، بۆ نموونه سه‌ره‌دانا مه‌سعوود بارزانی وه‌كو سه‌رۆكێ هه‌رێمێ بۆ دیاربه‌كرێ ب ئاشكرایی هاته خوه‌یاكرن كو نه ب تنێ pkk خودانا چاره‌سه‌ریا كێشا كوردی یه ل باكۆر، دیسا دامه‌زراندنا گه‌له‌ك پارتێن دی یێن كوردی ل باكۆر و ب تایبه‌تی ژی ئه‌كتیڤكرنا پارتی دیمۆكراتی كوردستان/توركیا كو ب پارته‌كا نێزیكی پارتی دیمۆكراتی كوردستان ل باشۆر دهێته نیاسین و ل سه‌ر په‌یره‌و و رێبازا مه‌لا مسته‌فایێ بارزانی دخه‌بتن، دیسا جهێ دلته‌نگیا pkkیه كو ئه‌و ب جهگرتن ئانكو (به‌دیلێ) خوه دزانن و په‌یوه‌ندیێن خورتێن سیاسی و ئابووری د ناڤبه‌را توركیا و هه‌رێما كوردستانێ و ب تایبه‌تی ژی د ناڤبه‌را توركیا و پارتی دیمۆكراتی كوردستان په‌كه‌كه ته‌نگاڤ كری یه و هزر دكه‌ت ئه‌ڤ په‌یوه‌ندی ل سه‌ر كیستێ وان و ژ بۆ ژناڤبرن و لاوازكرنا وانه و دبیت هه‌تا راده‌یه‌كی مافێ وان ژی بیت ڤێ هزرێ بكه‌ن، چونكی مه‌زنترین ناكۆكی و هه‌ڤركیێن په‌كه‌كێ ل گه‌ل ده‌وله‌تا توركیا دانه و په‌كه‌كه توركیا ب دوژمنێ خوه یێ سه‌ره‌كی دزانیت، ده‌ستێوه‌ردانا پارتی وه‌كو ئه‌و دبێژن د كاروبارێن كانتۆنێن رۆژئاڤایێ كوردستانێ دا، دیسا pkkكه‌تی یه د مه‌ترسی و گۆمانه‌كا گه‌له‌ك مه‌زن دا، هه‌روه‌سا ئاواره‌بوونا ژمارهكا ئێكجار زۆر یا خه‌لكێ رۆژئاڤایێ كوردستانێ بۆ هه‌رێما كوردستانێ و ئاكنجیبوونا وان ل وان ده‌ڤه‌رێن پارتی كونترۆله‌كا سه‌ره‌كی یا سیاسی و جه‌ماوه‌ری و ئابووری و كارگێری هه‌ی و دروستكرنا هێزه‌كا له‌شكری ژ گه‌نج و خورتێن رۆژئاڤا ژ لایێ پارتی ڤه ب ناڤێ پێشمه‌رگێن رۆژئاڤا كو د بیته ژمارهكا باش یا پێشمه‌رگه‌‌ی بوویه ئه‌گه‌ر كو pkk ێ چ رێیه‌ك نه‌مینیت ژبلی دروستكرنا ناكۆكیان ل گه‌ل پارتی و گرتن و ئه‌شكه‌نجه‌دانا لایه‌نگرێن پارتی ل رۆژئاڤا، ژلایه‌كێ دیڤه كو لایه‌نێ هه‌ره گرنكه ژبۆ بده‌ستڤه‌ئینانا سه‌رنجا جه‌ماوه‌ری بارودۆخێ ئابووری یه كو نها ئه‌م هه‌می دزانین بارودۆخێ pkkژ لایێ ئابووری ڤه د ره‌وشه‌كا خراب دایه لێ یێ پارتی د ره‌وشه‌كا زۆر باش دایه و ئه‌ڤ چه‌نده ژی ئه‌كه‌ره‌كێ گرنكه كو پارتی ل رۆژئاڤا ببیته خودانا پێكه‌یه‌كێ جه‌ماوه‌ری یێ ب هێز ب مفاوه‌رگرتن ژ لاوازبوونا بارودۆخێ ئابووری یێ وێ پارچا كوردستانێ، له‌و د ڤی چارچووڤه‌ی دا pkk هه‌وارا خوه گه‌هاندیه ئێكه‌تی نیشتمانی كوردستان كو ژ لایێ سیاسی و ئابووری و ب تایبه‌تی ژی ژ لایێ راگه‌هاندنێ ڤه هه‌ڤكاربن و په‌یوه‌ندیێن خورت هه‌بن ل پێناڤی لاوازكرنا پێلا خورتا پارتی ل سه‌ر سیاسه‌تا pkk ب تایبه‌تی ژی ل رۆژئاڤایێ كوردستانێ كو نها ئه‌و خوه‌دیێ رێڤه‌به‌ریه‌كا ده‌مكینه ب ناڤێ كانتوون كو هه‌تا راده‌یه‌كی رێڤه‌به‌ریه‌كا سه‌ركه‌فتی بوویه، چونكی ڤالاهیه‌كا مه‌زن یا كارگێری پر كری یه، ب راستی ژی ده‌ما مرۆڤ لێ دنێریت جوداهیه‌كا مه‌زن نابینیت د ناڤبه‌را راگه‌هاندنا هه‌ردو لایان دا ئانكو puk ،pkkل هه‌مبه‌ر راگه‌هاندنا پارتی، ل ڤێرێ و هه‌تا نها ناكۆكی رۆژ بۆ رۆژێ د زێده‌بوونێ دانه و ب باوه‌ریا من وێ زێده‌تر ببن، چونكی نها پارتی وه‌كو پارته‌كا ب هێز ژ لایێ دبلۆماسی و سیاسی و له‌شكری و ئابووری ڤه، رۆلێ خوه دله‌یزینیت باوه‌رناكه‌م د ڤێ قووناغێ دا كو قووناغه‌كا هه‌ستیاره ژبۆ هه‌ر چار پارچێن كوردستانێ پارته‌ك بشێت هه‌ڤركی یان ژی كاربكه‌ت ژ بۆ لاوازكرنا رۆلێ پارتی چونكی هه‌رده‌م د قووناغێن هه‌ستیاردا پارتی وه‌كو پارته‌كا ب هێز ده‌ردكه‌ڤیت و ره‌فتارێ دكه‌ت، لێ دبیت د ده‌مه‌كێ دی دا یان د قووناغه‌كا دی دا په‌كه‌كه ب هزرو ئایدۆلۆژیا خوه بشێت زێده‌تر سه‌رنجا جه‌ماوه‌ری بۆ خوه بكێشیت و كارتێكرنێ ل پارتی بكه‌ت، چونكی په‌كه‌كه پارته‌كا سه‌رنجراكێشه ژ لایێ هزری و ئایدولۆژی ڤه و نموونه‌كا گه‌له‌ك جودایه ل هه‌می پارتێن كوردی و هه‌تا جودایه ل هه‌می پارتێن جیهانی ژی و زوو دشێت جهێ خوه د ناڤا جه‌ماوه‌ری دا په‌یدا بكه‌ت ب تایبه‌تی ژی د ناڤا ته‌خا گه‌نج و لاوان دا، لێ قه‌ده‌را وێ نها ئه‌ڤ قووناغه نه د به‌رژوه‌ندیا وێ دایه، ژ به‌ر كو گوهۆرین ب له‌ز و ژنشكه‌كێڤه په‌یدابوون، ل ڤێرێ گرنكه هه‌ر پارته‌كا كوردی و ل هه‌ر پارچه‌كا كوردستانێ بزانیت كو ئێدی نابیت هه‌ڤركی و ناكۆكیێن وان بگه‌هنه ئاسته‌كی كو شه‌ر و براكوژی تێدا په‌یدا ببیت، چونكی ل وی ده‌می هه‌می دێ زیانمه‌ندبن ل به‌ری هه‌میان ژی گه‌لێ كوردستانێ، مفادارێن سه‌ره‌كی ژی وێ وه‌لاتێن ده‌ردورێن كوردستانێ بن.
