چاڤدێره‌كێ سیاسی: ژ بلی رێككه‌فتنێ چو رێیێن دی ل پێشیا ئیرانێ نینن
دیدار، هۆشه‌نگ تاجر:
چاڤدێره‌كێ سیاسی یێ رۆژهه‌لاتێ كوردستانێ دیار دكه‌ت كو ره‌وشا ناڤخوه‌یی یا ئیرانێ گه‌له‌ك خرابه و ئیران نه‌چاره ژ بۆ باشتركرنا ره‌وشا ئابووری نها ل هه‌مبه‌ر ئه‌مریكا نه‌رماتیێ نیشا بده‌ت و هه‌روه‌سا دیاره ئه‌مریكا ژی ژ بۆ به‌رژه‌وه‌ندیێن خوه دێ هنده‌ك داخوازیێن ئیرانێ قه‌بوول كه‌ت.
دارا ناتق چاڤدێرێ سیاسی ل وه‌لاتێ به‌لجیكا د دیداره‌كێ دا بۆ ئه‌ڤرۆ دیار كر كو تشتێ دیاره ب ناڤبژیڤانیا وه‌لاتێن ئێكه‌تیا ئۆرۆپا هه‌ر دو وه‌لاتێن ئیران و ئه‌مریكا به‌ر ب رێككه‌فتنه‌كا دی دچن، لێ رێككه‌فتنا ڤێجارێ دێ جوداتر بیت ژ رێككه‌فتنا به‌ری نها، چونكی به‌ری هه‌ر تشته‌كێ دڤێت ئه‌م باش بزانین كو ره‌وشا ئابووری یا ئیرانێ گه‌له‌ك خرابه، به‌رپرسێن ئیرانێ ژی باش دزانن كو هه‌كه ره‌وشا ئابووریێ باش نه‌كه‌ن دێ دیسان خه‌لك ل دژی سیسته‌می ده‌ست ب خوه‌نیشادانان كه‌ن، ئانكۆ ئیران ژ نه‌چاریێ ڤێجارێ دێ رێككه‌فتنه‌كێ ل گه‌ل ئه‌مریكا ئیمزا كه‌ت و گۆت: (ئیرانێ به‌ری نها گه‌له‌ك داخوازی هه‌بوون كو پڕانیا وان ژ ئالیێ ئه‌مریكا ڤه هاتنه ره‌تكرن، ئیرانێ ژی دگۆت ئه‌و وه‌سا نه‌شێن ل گه‌ل ئه‌مریكا رێككه‌فتنه‌كا نوو بكه‌ن، لێ ره‌وشا نها نیشا دده‌ت كو ئیران ژ نه‌چاریێ دێ ل گه‌ل ئه‌مریكا رێككه‌فتنه‌كێ ئیمزا كه‌ت كو ل گۆر باوه‌ریا من ئه‌و رێككه‌فتن ژی دێ یا به‌روه‌خت بیت ئانكۆ دێ بۆ ده‌مه‌كێ كورت بیت، چونكی ئه‌زموونێن چه‌ندین سالێن بۆری نیشا داینه كو ئیران پێگیریێ ب چو رێككه‌فتنان ناكه‌ت و تنێ بزاڤا هندێ دكه‌ت كو مفای ژ ده‌می وه‌ربگریت و بگه‌هیته هنده‌ك ئارمانجێن خوه).
چاڤدێرێ سیاسی ئه‌و یه‌ك ژی دیار كر ل هه‌مبه‌ر دا ئه‌مریكا ژی باش دزانیت كو ئیران دێ دیسان بزاڤا هندێ كه‌ت كو هنده‌ك پاران بده‌ستڤه بینیت دا بشێت ئالۆزیێن نوو ل ده‌ڤه‌رێ دروست بكه‌ت، لێ ڤێجارێ ئه‌مریكا دێ ده‌لیڤه‌كا وه‌سا نه‌ده‌ته ئیرانێ، ئانكۆ دێ پشكه‌ك سزایێن ئابووری ل سه‌ر ئیرانێ هێنه راكرن لێ ئه‌و یه‌ك ژی دێ سنۆردار بیت و هه‌ر ده‌مێ ئیرانێ ئاریشه دروست كرن ئه‌مریكا دیسان دشێت وه‌كو سالێن بۆری سزایێن نوو و گران ل سه‌ر ئیرانێ بسه‌پینیت و گۆت: (هه‌ر چاوا بیت رێككه‌فتنا ڤێجارێ هه‌كه بهێته ئیمزاكرن ژی نابیته ئه‌گه‌رێ بهێزبوونا پێگه‌هێ ئیرانێ ل ده‌ڤه‌رێ، چونكی ئیرانێ گه‌له‌ك ئاریشێن ناڤخوه‌یی هه‌نه ب تایبه‌تی ژی یێن ئابووری و ئارمانجا سه‌ره‌كی یا ئیرانێ ئه‌وه دا ئه‌مریكا پشكه‌ك ژ سزایێن ئابووری ل سه‌ر وێ راكه‌ت دا بشێت هنده‌ك ره‌وشا خوه یا ئابووری باش بكه‌ت).
دارا ناتق د دووماهیا ئاخڤتنا خوه دا ئه‌و یه‌ك ژی نه‌ڤه‌شارت كو ئیران ده‌ستان ژ دروستكرنا چه‌كێن ئه‌تۆمی به‌رناده‌ت، ده‌مێ رێككه‌فتنا سالا ٢٠١٥ هاتیه ئیمزاكرن ژی هه‌ر دیسان ئیرانێ ب نهێنی گه‌له‌ك بنگه‌هێن نوو یێن ئه‌تۆمی دروست كرن، ئیران دێ دیسان كار بۆ دروستكرنا چه‌كێن ئه‌تۆمی كه‌ت، لێ وی ده‌می دێ لسه‌ر ئه‌مریكا مینیت كا دێ شێت تا چ راده‌یه‌كێ ئاسته‌نگیان ل هه‌مبه‌ر به‌رنامێ ئه‌تۆمی یێ ئیرانێ دروست كه‌ت دا نه‌هێلیت ئیران چه‌كێن ئه‌تۆمی دروست بكه‌ت، چونكی ئسرائیل وه‌كو هه‌ڤپه‌یمانا سه‌ره‌كی یا ئه‌مریكا ل رۆژهه‌لاتا ناڤین ب چو ره‌نگه‌كێ رێ ناده‌ت كو رێككه‌فتنا ڤێجارێ ببیته ئه‌گه‌رێ هندێ كو ئیران پێگه‌هێ خوه بهێز بكه‌ت و هه‌روه‌سا چه‌كێن ئه‌تۆمی دروست بكه‌ت، چونكی ئسرائیلێ شیایه د ده‌مێن چه‌ند سالێن بۆری دا گه‌له‌ك ئاسته‌نگیان ل هه‌مبه‌ر به‌رنامێ ئه‌تۆمی یێ ئیرانێ دروست بكه‌ت و نها ژی ئسرائیلێ ئه‌و شیانه یێت هه‌یین كو نه‌هێلیت ئیران رێككه‌فتنا ئه‌تۆمی بۆ هنده‌ك مه‌ره‌مێن دی بكار بینیت.
