سوید: ئه‌م نه‌شێین داخوازیێن توركیا بجه بینین
ب، سه‌رجان مه‌حمود:
ئولف كریستیرسۆن سه‌رۆك وه‌زیرێن سویدێ راگه‌هاند كو پشتی ده‌ستپێكرنا شه‌رێ ل ئۆكرانیایێ و زێده‌بوونا گه‌فێن رۆسیا و مه‌ترسیێن ل سه‌ر ئێمناهیا سویدێ وان بریار داینه ببنه ئه‌ندام د هه‌ڤپه‌یمانیا ناتۆ دا و گۆت: (ژ بلی توركیا وه‌لاتێن دی یێن ئه‌ندامێن ناتۆ ب دلخوه‌شی ڤه پێشوازی ل بریارا مه كرن لێ توركیا هژماره‌ك زێده مه‌رج داناینه پێشیا مه و دخوازیت ئه‌م مه‌رجێن وان بجه بینین، لێ ئه‌ز ب ئاشكرا دبێژم ئه‌م وه‌ك سوید نه‌شێین هنده‌ك داخوازیێن توركیا بجه بینین چونكی دیموكراسی و یاسایێن مه رێ ناده‌ن كو ب بریارێن سیاسی بزاڤێ بكه‌ین، ژ به‌ر ڤێ یه‌كێ ژی دڤێت توركیا ده‌ست ژ هنده‌ك داخوازیێن خوه به‌رده‌ت).
سه‌رۆك وه‌زیرێن سویدێ هه‌روه‌سا راگه‌هاند كو سوید وه‌لاته‌ك دیموكراته و باوه‌ریا وێ ب یاسا و مافێن مرۆڤی و دادوه‌ریێ هه‌یه و گۆت: (ئه‌و كه‌سێن كو توركیا دخوازیت ئه‌م وان راده‌ست بكه‌ین ل وه‌لاتێ مه ل دووڤ یاسایان دژین و مافێن وان یێن قانوونی هه‌نه و ئه‌م نه‌شێین وان ب بریارێن حوكمه‌تێ راده‌ستی توركیا بكه‌ین، لێ ئه‌م ناهێلین وه‌لاتێ مه ببیته ناڤه‌ندا رێكخستنێن توندره‌و و ل دژی توركیا چالاكیێن دوور ژ یاسایێن مه بهێنه كرن، ژ به‌ر هندێ ژی دڤێت توركیا ل گۆر راستیا هه‌ی هه‌لوه‌ستێ خوه دیار بكه‌ت).
