ئه‌مریكا: رۆسیا به‌رهه‌ڤ نینه هێزێن خوه ژ ئۆكرانیایێ ڤه‌كێشیت
ب، سه‌رجان مه‌حمود:
سه‌رۆك ئه‌ركانێ گشتی یێ له‌شكرێ ئه‌مریكا د داخۆیانیه‌كێ دا ل ئه‌لمانیا راگه‌هاند كو نها شه‌ره‌كی دژوار ل ئاخا ئۆكرانیایێ دهێته كرن و ب هزاران سه‌ربازێن روسیا ل ئوكرانیایێ نه و گۆت: (مخابن رۆسیا به‌رده‌وامه د داگیركرنا ئاخا ئۆكرانیایێ دا و شه‌ره‌كی مه‌زن ل سه‌ر ئاخا ئۆكرانیایێ هه‌یه و هه‌تا نها له‌شكرێ ئۆكرانیایێ شیاینه كو دربێن مه‌زن ل له‌شكرێ رۆسیا بده‌ن، رۆسیا هه‌موو چه‌كێن خوه ل دژی ئۆكرانیایێ بكار ئیناینه، لێ هه‌تا نها ژی رۆسیا نه‌شیایه كو د شه‌ری دا یا سه‌ركه‌فتی بیت و ئه‌ز وه‌سا دبینم كو ئه‌ڤساله شكاندنا رۆسیا زه‌حمه‌ته و دڤێت له‌شكرێ ئۆكرانیایێ د پاراستنا ئاخا خوه دا ده‌ست ب هنده‌ك ته‌كتیكێن جودا بكه‌ن و هه‌ولا شكاندنا هێزێن رۆسیا دژوارتر بكه‌ن).
مارك میلی سه‌رۆك ئه‌ركانێ له‌شكرێ ئه‌مریكا هه‌روه‌سا راگه‌هاند ژی كو ل دووڤ زانیاریان ب سه‌دان هزار كه‌س ژ هه‌ر دو ئالیان د شه‌ری دا جانێ خوه ژ ده‌ست داینه و گۆت: (هه‌ر چه‌نده رۆسیا هژمارا قوربانیێن خوه ئاشكرا ناكه‌ت و به‌رده‌وام راستیان ڤه‌دشێریت لێ ل دووڤ زانیاریێن ل به‌ر ده‌ستێ مه د ئه‌نجاما شه‌رێ ل ئۆكرانیایێ دا هه‌تا نها پتر ژ سه‌د هزار له‌شكرێ رۆسیا بووینه قوربانی و د هه‌مان ده‌می دا هژمارا قوربانیێن ئوكرانیا ژی گه‌له‌ك زێده نه و دیسان ب هزاران وه‌لاتیێن سڤیل ژی جانێ خوه ژ ده‌ست داینه، رۆسیا به‌رده‌وام دڤێت له‌شكرێ خوه نوو بكه‌ت و نها ژی رۆسیا كار بۆ هندێ دكه‌ت كو ٢٥٠ هزار سه‌ربازێن نوو به‌رهه‌ڤ بكه‌ت دا بشێت شه‌رێ ئۆكرانیایێ بكه‌ت).
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو وان ئه‌ڤساله هاریكاریێن بۆ ئۆكرانیایێ گه‌له‌ك زێده كرینه و دڤێت هه‌موو جیهان پشته‌ڤانیا ئۆكرانیایێ بكه‌ت و گۆت: (ئه‌م دێ سزایێن ل سه‌ر رۆسیا دژوارتر كه‌ین، مه دڤێت د بیاڤێ ئابووری دا دربێن كوژه‌ك ل رۆسیا بده‌ین، د هه‌مان ده‌می دا ئه‌م داخواز ژ هه‌موو وه‌لاتێن جیهانێ ژی دكه‌ین كو هاریكاریا ئۆكرانیایێ بكه‌ن، چونكی رۆسیا بوویه مه‌ترسی ل سه‌ر دیموكراسی و ئارامیا جیهانێ).
