ب چه‌كێ نوو یانه‌یێن پارێزگه‌هێ به‌رهه‌ڤن بۆ خولا كوردستانێ
ئه‌ڤرۆ، قه‌یس وه‌یس:
چاڤه‌ڕێ دهێـته كرن ئه‌ڤرۆ و سوبه‌هی ده‌ست ب یاریێن قۆناغا دویێ یا خولا كوردستانێ بۆ یانه‌یێن پلا نایاب ب حه‌فت یاریان بهێنه كرن، یانه‌یێن پارێزگه‌هێ ب چه‌كێ نوو و گوهۆڕینێن باش دێ یاریێن خوه ئه‌نجامده‌ن ئه‌وا هه‌موو یاری دێ ل ده‌مژمێر2:30 پشتی نیڤرۆ هێنه كرن.
ژ یاریێن ئه‌ڤرۆ تیما ته‌پا پێی یا یانه‌یا دهۆك ئه‌وا دێ ل باژێرێ سلێمانیێ بیته مێڤانا یانه‌یا شێروانه، د یاریا ئێكێ دا دهۆك شیابوو ب سه‌ركه‌فیت ب گۆله‌كێ بێ به‌رامبه‌ر، تیما پارێزگه‌هێ د قۆناغا ئێكێ دا لاوازترین ئاست و ئه‌نجام پێشكێشكری ب تنێ 14 خال ژ چار سه‌ركه‌فتن، دو وه‌كهه‌ڤی و هه‌شت خوساره‌تی ئینایی رێزا 14ێ و به‌ری دووماهیێ هاتیه، بۆ قۆناغا دویێ شه‌ش یاریزان ل سه‌ر تیمێ زێده‌كرینه و چه‌ند یاریزان ژی دوورخستنه پێخه‌مه‌ت بهێزكرنا تیمێ و چاره‌سه‌ركرنا كێماسیان، یاریا ئه‌ڤرۆ بۆ دهۆكێ تاقیكرنه‌كا نوویه د قۆناغا دویێ دا و دێ بزاڤێ كه‌ت خوه ژ ئاسته‌نگا شێروانه ده‌ربازبكه‌ت ئه‌وا ب 19خالان رێزا هه‌شتێ دهێت.
ژلایێ خوه‌ڤه یانه‌یا ئاكرێ دێ ل یاریگه‌ها خوه مێڤانداریا پێشمه‌رگه‌یا هه‌ولێرێ كه‌ت ئێك ژ یاریێن بهێز بۆ تیما پارێزگه‌هێ، ئاكرێ ژی وه‌كو دهۆكێ چه‌ند گوهۆڕین دناڤ پێكهاتیێ تیما خوه داكرینه و یاریا ئه‌ڤرۆ دێ بوو تۆلڤه‌كرنێ بیت ژبه‌ركو د یاریا ئێكێ ل گه‌ل پێشمه‌رگه ب دو گۆلان به‌رامبه‌ر گۆله‌كێ تووشی خوساره‌تیێ بوو ئه‌وا ب 19 خالان ژ پێنچ سه‌ركه‌فتن، چار وه‌كهه‌ڤی و پێنچ خوساره‌تیا ل رێزا حه‌فتێ دهێت، مێڤانا وێ یا هه‌ولێری ب 24 خالان رێزا دویێ دهێت.
بڕیاره سوبه‌هی سێ شه‌مبی یانه‌یا زاخۆ مێڤانداریا یانه‌یا سه‌یدسادق ل یاریگه‌ها ده‌لال بكه‌ت، كوڕێن خابووری ب 17 خالان ژ چار سه‌ركه‌فتن و پێنچ خوساره‌تی و پێنچ وه‌كهه‌ڤی رێزا ده‌هێ دهێت وه‌كو هه‌ردو یانه‌یێن دی یێن پارێزگه‌هێ و نوونه‌را ئیدارا سه‌ربه‌خوه‌یا زاخۆ هنده‌ك گوهۆڕین دناڤ تیمێ دا كرینه پێخه‌مه‌ت باشتكرنا ئاست و ئه‌نجامان، سه‌یدسادق ئه‌وا نوكه ب 17 خالان رێزا 11ێ دهێت د یاریا ئێكێ یا قۆناغا ئێكێ دا تووشی خوساره‌تیێ بوو ل گه‌ل زاخۆ و دێ بزاڤێن تۆلڤه‌كرنێ كه‌ت.
ژ یاریێن ئه‌ڤرۆ، شه‌قلاوه و چه‌مچه‌مال، یاریێن سوبه‌هی، چۆارقۆرنه- ئارارات، سۆران- هندرین، برایه‌تی- ده‌ربه‌ندیخان.
