یانه‌یا بجێل هاته دامه‌زراندن
ئه‌ڤرۆ،
ب بڕیارا فه‌رمی یانه‌یا بجێل یا وه‌رزشی ل ده‌ڤه‌را بجێل سه‌ر ب قه‌زایا ئاكرێ ڤه هاته دامه‌زراندن، پشتی نڤێسارا فه‌رمی یا رێڤه‌به‌ریا گشتی یا وه‌رزشی ل هه‌رێما كوردستانێ یا حه‌فتیا بوری هاتیه به‌لاڤكرن تێدا رازه‌مه‌ندی ل سه‌ر دانا مۆله‌تێ بۆ یانه‌یا ناڤهاتی هاته دان كو ببیته ئێك ژ یانه‌یێن سه‌ر ب پارێزگه‌ها دهۆكێ ڤه.
كارگێریا یانه‌یا بجێل پێكهاتینه ژ ره‌هیل شه‌عبان عه‌بدوللا وه‌كو سه‌رۆك یانه، فه‌رهاد محه‌مه‌د سالح جێگرێ سه‌رۆكی، شه‌مزین سه‌لیم خان محه‌مه‌د سكرتێر، عه‌بدولخالق ئسماعیل عه‌بدولخالق رێڤه‌به‌رێ كارگێری و هه‌ر ئێك ژ سه‌فیر خالد مامه‌ن، نه‌زیر لاوك ره‌سۆل و مه‌حموود بیلال مسته‌فا ئه‌ندامێن كارگێریێ.
د داخویانیه‌كا تایبه‌ت دا سه‌رۆكێ یانه‌یا بجێل ره‌هیل شه‌عبان بۆ رۆژناما ئه‌ڤرۆ دیاركر ئه‌ڤه پێنگاڤه‌كا زێرینه و چه‌ندین ساله وه‌رزشڤانێن ده‌ڤه‌رێ چاڤه‌ڕێ و ئه‌ڤرۆ ب خه‌ونا خوه شاد بووینه و گۆت: دامه‌زراندنا یانه‌یا بجێل ل 22-12-2022 هاتیه دان لێ ژ نوو بۆ فه‌رمی و ئه‌ڤچه‌نده ژی دێ وه‌رزشا ده‌ڤه‌رێ به‌ر ب قۆناغه‌كا باشتر هاڤێژیت و دڤێت هه‌موو خه‌لكێ بجێل ئه‌ڤێ یانێ شانازیێ پێ ببه‌ن خوه بدانن خودانێن یانێ، پێدڤیه ل سه‌ر هه‌موویان پشته‌ڤانی و هاریكاریا مه‌زن بۆ كاروانێ یانێ بكه‌ن به‌ره ب سه‌ركه‌فتنان.
هه‌روه‌سان گۆت: سۆپاسیا حوكمه‌تا هه‌رێما كوردستانێ و كابینا نه‌هێ ب سه‌رۆكاتیا به‌رێز مه‌سرۆر بارزانی و به‌رێز مه‌ردان خدر به‌رپرسێ له‌قێ نه‌ه یا پارتی و رێڤه‌به‌رێ ناحیا بجێل وهه‌روه‌سان ئازاد محه‌مه‌د ئه‌ندامێ ئێكه‌تیا ته‌پا پێی یا كوردستانێ و كارگێرێ مه‌كته‌با سكرتاره‌تیا ئێكه‌یا لاوان و هه‌ر لایه‌نه‌كێ پشته‌ڤان و هه‌ڤكاربووین ژبۆ دامه‌زراندنا یانه‌یا بجێل و خه‌ونا وه‌رزشڤانێن ده‌ڤه‌رێ بجه هاتی.
بۆ زانین ل پارێزگه‌ها دهۆكێ و ئیدارا سه‌ربه‌خوه یا زاخۆ 18 یانه هه‌نه ئه‌و ژی، دهۆك، زاخۆ، ئاكرێ، سێمێل، گاره، شێخان، پیرس، به‌رده‌ره‌ش، میدیا بۆ خودانێن پێدڤیێن تایبه‌ت، ئامێدیێ، پۆلیته‌نكنیگ، دینارته، ئافره‌تێن دهۆك، باتیفا، ته‌ناهی، شێلادز، سه‌نحاریب و بجێل.
