شرۆڤه‌كاره‌ك: گوهۆڕینێن زاخۆ د سه‌ركه‌فتی بوون و دهۆكێ ئاست و ئه‌نجامێن باش هه‌نه
ئه‌ڤرۆ،
هه‌ردو یانه‌یێن دهۆك و زاخۆ د یاریێن گه‌را 13ێ ژ هه‌ڤڕكیێن خولا پلا نایابا ئیراقێ یا ته‌پا پێی ب سه‌ركه‌فتیانه ژ ده‌رڤه‌یی یاریگه‌ها خوه ڤه‌گه‌ڕیان، یانه‌یا دهۆك شیا ب گۆلا ئێكانه یا پیشه‌كارێ خوه زاكێری یانیك سه‌ركه‌فتنێ ل سه‌ر یانه‌یا نه‌جه‌ف بینت ب گۆله‌كێ بێ به‌رامبه‌ر، ژلایێ خوه‌ڤه یانه‌یا زاخۆ ب سه‌ركه‌فتنه‌كا مه‌زن ل سه‌ر یانه‌یا دیوانیه ب پێنچ گۆلان به‌رامبه‌ر گۆله‌كێ ئینا، گۆلێن زاخۆ ژلایێ پیشه‌كارێ وێ محه‌مه‌د عومه‌ر دو گۆل، یێ ئوردنی خالد سیاحیین دۆ گۆل و ستار یاسین گۆله‌ك، بڤان ئه‌نجامان دهۆك ل رێزا هه‌شتێ دهێت ب 21 خالان و زاخۆ ب 11 خالان رێزا 17ێ دهێت.
ل دۆر ئه‌ڤان ئه‌نجامان وه‌حید ره‌شید شرۆڤه‌كارێ وه‌رزشی ل پارێزگه‌ها دهۆكێ بڤی شێوه‌یێ بۆچوونا خوه بۆ رۆژناما ئه‌ڤرۆ دیاركه‌ت و گۆت: هه‌رچه‌نده ئاست و ئه‌نجامێن دهۆكێ هه‌تا نوكه د باشن لێ دێ دۆباره‌كه‌مه‌ڤه كو تیما دهۆكێ پێدڤی ب هێرشبه‌ره‌كێ گۆلكه‌ره كو بشێن ئه‌و بزاڤێن ل سه‌ر گۆلا تیما هه‌ڤڕك دهێنه كرن ب دووماهی بینت و گۆلا ل سه‌ر نه‌جه‌ف ژی یاریزانێ هێلا ناڤی نه، هه‌رچه‌وابیت ده‌ستخووشیا راهێنه‌ر سلێمان ره‌مه‌زان دكه‌م كو شیایه تیمه‌كا بهێز چێكه‌ت سه‌رباری گڤاشتنا و ب پشته‌ڤانیا كارگێریا یانێ، له‌وما هیڤییا مه ئه‌وه چو گڤاشتن ل سه‌ر وی تیمێ نه هێته كرن سه‌رباری هه‌ر ئه‌نجامه‌كێ نه‌چاڤه‌ڕێ كری بهێت، راهێنه‌ر دزانیت چه‌وان سه‌رده‌ره‌یا یاریان بكه‌ت لێ یاریزانێن وی ژ تۆپ نینن و پێدڤی ب هێشتا یاریزان هه‌یه.
ل دۆر یاریا زاخۆ ژی گۆت: هه‌رچه‌نده ل ده‌ستپێكێ تیما زاخۆ كه‌فت بوو لبن ئاریشه‌یان و تووشی چه‌ندین خوساره‌تیا و وه‌كهه‌ڤیان بوو لێ ئه‌و گوهۆڕینین ڤێ دووماهیێ په‌یدابووین دیاربوو د سه‌ركه‌فتی بوون سه‌رباری یاریا ئێكێ یه پشتی راوه‌ستیانێ و تیما دیوانیه ئێك ژ یانه‌یێن داكه‌فتنێ دایه، له‌وما دڤێت له‌زێ ل سه‌ر ئاست و ئه‌نجامێن داهاتی یێن زاخۆ دا نه‌كه‌ین، یا دروست دڤێت راهێنه‌ر به‌رده‌وام بیت هه‌تا خول ب دووماهی بهێت ژبه‌ركو 13 یاریزانێن نوو ئیناینه و ده‌م دڤێت هه‌تا باش ل گه‌ل تیمێ ب گۆنجن، سه‌ركه‌فتنا ل سه‌ر دیوانیه پالده‌ره به‌رده‌وامیێ بده‌ته ئه‌نجامێن باش و خوه ژ رێزا داكه‌فتنێ دووربێخیت و ڤه‌گه‌ڕێته هه‌ڤڕكیان لێ ئه‌و سه‌ركه‌فتن نه پیڤه‌ره بۆ هێزا تیما زاخۆ و یاریێن بهێت دڤێت خوه دیاربكه‌ن باشترین ئه‌نجام.