ب پشته‌ڤانیا جه‌ماوه‌رێ خوه دهۆك گه‌شبینه بۆ سه‌ركه‌فتنێ
ئه‌ڤرۆ،
دهێته چاڤه‌ڕێ كرن ئه‌ڤرۆ ل ده‌مژمێر 4:30 ئێڤاری جه‌ماوه‌رێ وه‌رزشی یێ یانه‌یا دهۆك ب ژڤانه بۆ پشته‌ڤانیا تیما خوه یا ته‌پا پێی ئه‌وا دێ ل یاریگه‌ها خوه مێڤانداریا یانه‌یا ئه‌لقاسم یا پارێزگه‌ها بابل ژ ناڤه‌راستا ئێراقێ كو بڕیاره ژ چارچووڤێ هه‌ڤڕكیێن گه‌ڕا 14ێ یا هه‌ڤڕكیێن خولا ئیراقێ بۆ یانه‌یێن پلا نایاب.
تیما یانه‌یا دهۆك د ده‌مه‌كێ باش ده‌رباز دكه‌ت ب سه‌رپه‌رشتیا راهێنه‌رێ باژێرێ دهۆكێ سلێمان ره‌مه‌زان ئه‌وا پێنچ سه‌ركه‌فتن، شه‌ش وه‌كهه‌ڤی و دو خوساره‌تی هه‌نه ل رێزا هه‌شتێ دهێت ب18 خالان، سه‌ركه‌فتنا یاریا بۆری ل گه‌ل یانه‌یا نه‌جه‌ف پالده‌ره‌كێ سه‌ره‌كی یه بۆ ڤێ یاریێ به‌رده‌وامیێ بده‌نه ئه‌نجامێن خوه یێن باش و دێ د ناڤ ئه‌رد و جه‌ماوه‌رێ خوه دا كه‌ت، به‌رامبه‌ری وێ یانه‌یا ئه‌لقاسم خودانا رێزا 14ێ ب كۆمكرنا 13 خالان دێ بزاڤێن ده‌ستڤه ئینانا ئێك خال ژی كه‌ت.
ل دۆر دووماهی به‌رهه‌ڤیێن تیما دهۆكێ سلێمان ره‌مه‌زان راهێنه‌رێ بۆ رۆژناما ئه‌ڤرۆ گۆت: هه‌ر یاریه‌كا ئه‌م دكه‌ین دڤێت ب هۆشداری بیت و ئه‌و تیما به‌رامبه‌ری مه ژی خوزیێن وێ سه‌ركه‌فتنن له‌وما یاری ب سانه‌هی نابیت، ئاست و ئه‌نجام دباشن لێ دڤێت باشتربن و زێده‌تر خوه ماندی بكه‌ین پێخه‌مه‌ت ده‌ستڤه‌ئینانا سێ خالێن یاریێ، هه‌موو یاریزان د به‌رهه‌ڤبن لێ ژبه‌ر سێ كارێن زه‌ر گۆلپارێز ئه‌حمه‌د به‌شار یاریێ ناكه‌ت د وێ باوه‌رێ دا مه ئه‌ڤچه‌نده كارتیكرنێ ناكه‌ت ژبه‌ركو پێكگۆرێ وی ژی خودان شیانه، ب هیڤی نه وه‌كو ده‌ستپێكا خولێ جه‌ماوه‌رێ یانێ به‌رهه‌ڤبیت و پشته‌ڤانیا تیمێ بكه‌ن و دێ زاخا یاریزانان بلندكه‌ن بۆ سه‌ركه‌فتنێ.
ژ یاریێن دی یێن ئه‌ڤرۆ، جه‌ویه خودانا سه‌رێ لیستێ ب 28 خالان دێ به‌رامبه‌ری زه‌ورا بیت ئه‌وا رێزا دویێ دهێت ب26خالان د كۆپیتكا یاریێن ڤێ حه‌فتیێ دا ئه‌وا دێ ل ده‌مژمێر 7:30 هێته كرن، ژلایه‌كێ دووڤه كه‌ربه‌لا- حدوود، سیناعه -نه‌فت ئه‌لوه‌سه‌ت، كاره‌با- نه‌فت ئه‌لمیسان.
