دهۆك ب سەركەفت و زاخۆ بەرانبەری خودانا سەرێ لیستێ یە
ئەڤرۆ
تیما تەپا پیێ یا یانەیا دهۆك سێ خالێن گرنگ د ناڤ ئەرد و جەماوەرێ خوە دا ب دەستڤە ئینان پشتی ب سێ گۆلان بەرامبەر گۆلەكێ سەركەفتن لسەر مێڤانا خوە یانەیا نەفت میسان ئینایی د یاریا واندا ئەوا دوهی ژ چارچووڤێ گەڕا 17 یا قۆناغا ئێكێ بۆ یانەیێن پلا نایابا ئیراقێ ل یاریگەها سەرەكی یا دهۆكێ هاتیەكرن
د نیڤا ئێكێ دا تیما دهۆكێ باشتر هاتبوو دیتن و چەندین هێرشێن مەترسی ل سەر گۆلا مێڤان هەبوون و شیان د خولەكا 42ێ دا ب گۆلەكا پیشەكارێ خوە یانیگ زاكێری پێشكەڤن، لێ یانەیا مێڤان شیا ڤەگەڕێتە ناڤ هەڤڕكیێ و ئەنجامێ یاریێ راستڤەكەت بەری ب دووماهی هاتنا نیڤا ئێكێ پشتی یاریزانێ وان یۆنس عەبد شیایی ژ فاولەكا ئێكسەر د خولەكا 45 دا گۆلا وەكهەڤیێ بینت، د نیڤا دویێ دا تیما دهۆكێ باشتر هاتە دناڤ یاریێ دا و شیا دو گۆلان تۆماربكەن كو ژلایێ پیشەكارێ خوە برێنس ئۆبۆكۆ د خولەكێن52 و لێدانا پەنەلتیێ د خولەكا63ێ دا و یاری ب سێ گۆلان بەرامبەر گۆلەكێ ب پێشكەفتنا دهۆكێ ب دووماهی بینن.
یاریا تەلەبە و زاخۆ
بڕیارە ئەڤرۆ ل دەمژمێر چارێ ئێڤاری تیما یانەیا زاخۆ ل یاریگەها شەعب باژێرێ بەغدا ببیتە مێڤانا یانەیا تەلەبە ئێك ژ بهێزترین یاریێن ڤێ حەفتیێ بۆ نوونەرا كوردستانێ، كوڕێن خابووری 18 خال كۆمكرینە ژ چار سەركەفتن، شەش وەكهەڤی و شەش خوسارەتی رێزا13ێ دهێت، تەلەبە خودانا سەرێ لیستێ یە ب33خالان، ئەڤ یاریە دێ بیتە بهێزترین تاقیكرن بۆ زاخۆ و راهێنەرێ وێ حەیدەر عەبدولئەمیر، ل دۆر دووماهی بەرهەڤیێن تیما زاخۆ راهێنەرێ ناڤهاتی بۆ ئەڤرۆ گۆت: ئێك ب هێزترین تاقیكرنا تیما مە یە د خولێ دا، ژبەركو دێ دگەل ئێك ژ هەڤڕكێن ناسناڤێ و سەرێ لیستێ بیت و یاری ژ دەرڤەیی یاریگەها مەیە، لێ بەرهەڤیێن مە دباشن و مە چو هنگاڤتی و دووركەڤتن نینن، بۆ سەركەفتنێ دێ هێنە دناڤ یاریێ دا ژبەركو ئەم پێدڤی خالاینە ژبۆ باشتكرنا هەلوەستێ خوە، ب هیڤی نە یاریزان دێ ل دووڤ پلانێن مە یاریێ كەن و سەركەفتنی ئینین.
یاریێن رۆژا ئەڤرۆ، زەورا- حدوود، كەربەلا- دیوانیە، نەفتا بەسرا- كەرخ، ئەلقاسم- نەفت، نەفت ئەلوەسەت- نەجەف.
