د چامپیۆنزێ دا لیڤەرپۆل و ریال مەدرید دێ شەڕێ تۆلڤەكرنێ كەن
ئەڤرۆ
دهێتە چاڤەڕێ كرن ئەڤرۆ ل دەمژمێر 11 شەڤ دو یاریێن دی یێن چوونێ ژ هەڤڕكیێن قۆناغا 16 یا قارەمانیا یانەیێن ئۆرۆپا قارەمانێن خولا چامپیۆنز لیگ یا تەپا پێی ل هەردو وەلاتێن ئنگلتەرا و ئەلمانیا بهێنە ئەنجامدان،
لیڤەرپۆل- ریال مەدرید
یاریگەها ئانفێلد دێ بیتە مەیدانا شەڕێ ئێكێ بۆ وەرزێ ئەڤ سالە دناڤبەرا هەردو یانەیێن لیڤەرپۆل یا ئنگلتەرایێ خودانا ئەردی و مێڤانا وێ ریال مەدرید یا ئسپانی د یاریەكا ئاگرین دا كو دبیتە دیدارێن دۆبارە دناڤبەرا هەردو یانەیێن ئۆرۆپی دا، ژ سەرجەمێ نەه یاریان پێنچ سەركەفتن بۆ ریالێ بووینە بەرانبەر سێ بۆ لیڤەرپۆلێ و ئێك وەكهەڤی، بۆهاترین سەركەفتن یا ریالێ دەستڤەئینانا ئینانا چامپیۆنزێ بوو ل كیستێ لیڤەرپۆلێ د وەرزێ بوری دا، لەوما یانەیا ئنگلتەرایێ دێ شەڕی بۆ تۆلڤەكرنێ ئەوا دخولا ئنگلتەرایێ دا كاودانێن باش دا نینە ب 35 خالان رێزا هەشتێ دهێت لێ ڤەگەڕیانا وێ بۆ سەركەفتنان باوەری دایە یاریزانێن وێ د یاریا ئەڤ شەڤە دا هزرا سەركەفتنێ بكەن، ژلایێ خوەڤە یانەیا ریال مەدرید قارەمانا وەرزێ بۆری و خودانا 14 ناسناڤان باش دزانیت دناڤ یاریگەها ئانفێلد ئەركێ وێ ب سانەهی نابیت لێ شارەزاهی و سەرەدەریا وێ دچامپیۆنز لیگ دا وەكو یا خولا ئسپانیا نینە و هەردەم بوویە یانەكا هەڤڕك و بەربژار بۆ ناسناڤی، بەرانبەری وێ ئارمانجا لیڤەرپۆل تۆلڤەكرنە و مفا ژ ئەردێ خوە وەربگریت ژبەركو هیڤیێن ناسناڤی و رێزێن پێشیێ و دیسان كۆپا ئنگلتەرایێ ژ دەستداینە و چو بژاردە نینن ژبلی شەڕی بۆ چامپیۆنزێ بكەت ئەو بتنێ بوویە هیڤیێن وێ یێن دووماهیێ.
ئانتراخت فرانكفۆرت- ناپۆلی
هەر ژ یاریێن دی یێن ب هێز یێن ئەڤ شەڤە یانەیا ئانتراخت فرانكفۆرت دێ ل یاریگەها خوە دۆتش بانك مێڤانداریا ئێك ژ زلهێزێن نوكە یێن خولا ئیتالیا كەت یانەیا ناپۆلی ئەوا بەربژارەكا بهێز بوو ناسناڤێ وەرزێ ئەڤ سالە یێ ئیتالیا ئەوا ب جۆداهیا 15خالان سەرێ لیستا خولێ پاراستی خوە نێزیكی ناسناڤی كریە، لێ د چامپیۆنزێ دا جوداهیەكا مەزن هەیە و دڤێت زێدەتر خوە زەحمەت بدەت هەكتا بگەهیتە ئارمانجا ناسناڤی، خودانێن ئەردی تیمەكا ب سانەهی نابیت هەرچەندە د خولا ئەلمانیا دا رێزا شەشێ دهێت لێ بوو چامپیۆنزێ شێواز و هەڤڕكیەكا جودا هەیە، ئۆلیڤەر چلاسنەر راهێنەرێ وێ دیاركر هەكە بۆ یاریا ئەڤ شەڤە راندەل كۆلۆ، دایتشی كامادا و رافائێل بووری د رۆژا خوە دابن گەشبینن سەركەفتنێ تۆماركەت لێ بەرانبەری وێ ناپۆلی دێ پشت بەستنێ ل سەر سێ گۆشا مرنێ یا پێكهاتێ خوە كەت ژ فیكتۆر ئۆسمین گۆلكەرێ ناپۆلی و یێ جۆرجی خڤیچا كڤاراچیلا و جیۆڤانی سیمیۆنی، ئەڤ یاریە دێ سەروسیمایێ تیما دەربازبوویی تا رادەیەكێ باش بۆ قۆناغا هەشتێ دیاركەت، دو جاران بتنێ هەردو یانە بەرانبەری ئێك بووینە ل 1994ێ ژ كۆپا ئێكەتیا ئۆرۆپا و هەردو یاریان دا یانەیا ئەلمانی سەركەفتن ئینابوو.
